TSABURI 50 - IBIBILIA INDAKATIFU MU LUTIRICHI LWITAKHO NENDE LWISUKHA

Injila Yatoto yu Khusaala khu Nyasaye

¹ Nyasaye Uli Ikulu khu Viosi, uli Mwami Nyasaye, umali khulomoloma; alaanganga vandu voosi khulilova, khuraanjila ivukwi khutukha imbo.

² Nyasaye yang'ang'ilanga khurula mu Sayoni, litaala likali liakasa liseletse.

³ Nyasaye weru yitsanga, vuchila khuhonjela; mulilu kumemanga nukwakha imbeli wewe, imbuutsa inditoho imuvotokhane.

⁴ Alaanganga likulu nende lilova khuva khuli vashiahidi veve khulola khuli akhalachilanga vandu veve.

⁵ Avoolanga, “Ndereli halala vandu vaanje vasuuvilwa khwinzi, nivali yavo va nakhola navo lilakano khuvirila khu musango.”

⁶ Likulu limanyinyanga likhola liu vulunji lia Nyasaye, shichila Nyasaye mwene neye mukhalachi.

⁷ “Vandu vaanje, muhulishitsi, kambolanga; Yivi Israeli, nzitsanga khuhaana vushiahidi khu yivi. Ninzi Nyasaye, uli Nyasaye wowo.

⁸ Shinyala khukhukondeshela shichila misango chiochio tawe; vihanwa vu khusambwa viovio vili imbeli wanje.

⁹ Mbula shihunwa shianyala khuvukula munzu mwomwo, inoho imbuli isatsa khurula mu vitioli viovio;

¹⁰ shichila inyama yosi ili mu muliru ni yanje, tsing'ombe tsiosi mu vikulu vinyishi ni tsianje.

¹¹ Manyonyi koosi kapulukhanga nakamanya, khali viosi vimolakanga hasi ni vianje.

¹² Mba ni inzala, mbele nalekha khukhuvoolela; shichila shivala nende shia shindu shiosi shilimu ni vianje.

¹³ Munyala khuva mukanakananga nyala khulia inyama yi vihuunwa, inoho khung'wa masahi ki tsimbuli?

¹⁴ Mukholele Nyasaye musango kukhumusanditsa, khandi murweshitsile Nyasaye Uli Ikulu khu Viosi shia mwalaaka muliitsa khumuha.

¹⁵ Musaale khwinzi mumatukhu kamuli mu vutiinyu; niitsa khumukhonya, mulikhuminya.”

¹⁶ Navutswa Nyasaye avoolelanga vandu vatamanu, “Vunyali shina vwa muli navwo khukalushila khuvoola malako kaanje, inoho khulomoloma makhuva khu lilakano lianje?

¹⁷ Mwayambakhana khulonda mivaalo kaanje mwachaya makhuva kaanje.

¹⁸ Nuloli shihuuvi, wu kholanga vulina nashio; khali wu kholanga vuheeyi na vaheeyi.

¹⁹ “Wayirechekha khulomoloma vindu vitamanu; ukaatanga vandi mu makhuva koko.

²⁰ Wayikhalila amwavo wowo mulilomoloma, toto, umoonyanga amwavo wowo mwene.

²¹ Wakhola vindu vienevo viosi, nimbonjeli; wakanakananga ndi khuli mulala khu yivi. Navutswa nunundi khukondeshelanga, khandi nyenyanga khukhuyaala.

²² “Munyi vamwanzivilila, kanakanikhu vulahi kambolanga, inoho nzitsanga khumutivitsa, vuchila mundu unyala khumuhonyinya.

²³ Mundu usanditsanga khuli ni shihanwa shieshie shiu musango neye umbetsanga luyali; mundu wu kholanga lienya lianje, neye wa niitsa khuhonyinya.”