TSABURI 48 - IBIBILIA INDAKATIFU MU LUTIRICHI LWITAKHO NENDE LWISUKHA

Litaala Likali lia Nyasaye lia Sayoni

¹ Mwami Nyasaye nu wi tsingulu tsinyishi; utushili khwitsominywa muno mu litaala likali lia Nyasaye weru, khali khu shikulu shieshie shitakatifu.

² Shikulu shia Nyasaye ni shiraambi shiakasa; nashio shilerelanga vandu voosi vuyaanzi khulilova. Shikulu shia Sayoni, shili ihale wene ivuluka, nishili litaala likali liu Mwami wi tsingulu tsinyishi.

³ Nyasaye neye ulindanga tsimbinga tsietsie; wamanyinya ndi neye imbinga yu vulindi vulahi.

⁴ Ni kilikali, vami vakanila halala, varoonjela khulala nivatsia khukwana Shikulu shia Sayoni.

⁵ Navutswa lwa valola shikulu shienesho, vali nilichenya; vatechela nivilukha.

⁶ Vatechela nivaria, nivahulila isalila khuli yu mukhali wivulanga mwana.

⁷ Nivi wavononyinya khuli tsimeli tsia Tarishishi tsi imbuutsa irulanga ivukwi imenekanyinyanga.

⁸ Kosi ka khwahulila nako ka vene khuloli mu litaala likali liu Mwami Nyasaye wi Mikaanda Chiliihe, mu litaala likali lia Nyasaye weru, lia Nyasaye alindanga mihika ni mihika.

⁹ Nyasaye, nu khuli mukari mu Litempeli liolio, khukanakane likhuva shichila vuyaanzi vwovwo khumatukhu koosi.

¹⁰ Nyasaye, lira liolio litsominywangwa shia havundu hosi, vandu vakhwitsominyanga shia havundu hosi khulilova. Likhola liolio ni liu vulunji khuvirila mu tsingulu tsiotsio.

¹¹ Vandu va Sayoni vasangale! Vandu va Yuda vikhoye, shichila ukhalachilanga vandu khuvirila khu vulunji!

¹² Vandu va Nyasaye, chendi numuvotokhana mu litaala lia Sayoni numuvalitsa minaara chialio.

¹³ Lolikhu masisi kalio numuheenza khu tsimbinga tsialio; mulivoolela vandu vi likhula liliitsa khuvaho,

¹⁴ “Uyu neye Nyasaye, uli Nyasaye weru mihika ni mihika! Aliitsa khukhwimilila mihika ni mihika.”