TSABURI 41 - IBIBILIA INDAKATIFU MU LUTIRICHI LWITAKHO NENDE LWISUKHA

Mulwale Areevanga Nyasaye Amukhonye

¹ Ali ni ikhaavi mundu uheendelanga mwoyo vandu vamanani; Mwami Nyasaye aliitsa khumuhonyinya nali mu vutiinyu.

² Mwami Nyasaye neye wu mulindanganga nu khumukhola khuva mwoyo; aliitsa khuva nu vuhinda mu shivala. Nyasaye aliitsa khumuhonyinya khurula khu vatsiku veve.

³ Mwami Nyasaye aliitsa khumukhonya nalwalanga; aliitsa khumuha vulamu khurula mu vulwale vwevwe vwosi.

⁴ Nalwo lwa navoola, “Yivi Mwami Nyasaye, undolele tsimbavasi; mbonyinya, shichila mali khukhukholela vwoni!”

⁵ Vatsiku vaanje vavoolanga vindu vitamanu khwinzi, “Ni litukhu shina lia aliitsa khukhutsa, lira lielie likore?”

⁶ Lwa mundu yitsanga khunjendelela, lilomoloma lielie ni li shikhaya, nikhali akanakananga mu mioyo kwekwe vindu viu khusalilitsa; Lwa arulaho, alanditsilanga vandu shia havundu hosi.

⁷ Vandu vanzambakhana valomolomanga vindu vitamanu shichila inzi, vanganakanilanga vindu viu khusalilitsa.

⁸ Vavoolanga, “Lukhutsu lwa mulwalitsa; watorela khu shitali.”

⁹ Khali mulina wanje wa nayaanza, wa nali ninasuuvila, mulina wa khwaliitsanga naye shiukhulia, wangalukhana angwananga!

¹⁰ Navutswa Mwami Nyasaye, nuyaanza undolele tsimbavasi, umbe vulamu, nambula navanzila.

¹¹ Nikamali khwikholekha kario, nyala khumanya uyaanzitswangwa ninzi; shichila mutsiku wanje ashili khungura.

¹² Navutswa wakhonya shichila kholanga likhola liu vulunji; nivi unindanga mihika ni mihika.

¹³ Mwami Nyasaye, uli Nyasaye wa Israeli yitsominywi, nunundi khandi mihika ni mihika! Amina! Amina!