TSABURI 40 - IBIBILIA INDAKATIFU MU LUTIRICHI LWITAKHO NENDE LWISUKHA

Lwimbo lu Khwitsominya Nyasaye

¹ Nalindililanga mu vwikhutsili mu Mwami Nyasaye; yambulishitsa khali nahulila khulila khwanje.

² Yandulitsa mu vwina vwa maraava, khurula mushitohi havundu ha mundu anyala khukhaamila. Yasinjilitsa vulahi khu lwanda, nanomba khuva mu vulindi vulahi.

³ Yanzechitsa lwimbo luyia, lwimbo lu khwitsominya Nyasaye weru. Vandu vanyishi valiitsa khukalola nu khuria, nu khusuuvilila mu Mwami Nyasaye.

⁴ Ali ni ikhaavi mundu usuuvililanga mu Mwami Nyasaye, wambakhananga khusanga na vandu vilola, halala na vandu vasaalanga khu vanyasaye vu vuvehi.

⁵ Nivi Mwami Nyasaye, uli Nyasaye wanje, umali khukhukholela vindu viu khuchenyinya vinyishi; vindu via wakhuloshitsila khukhola ni vinyishi, mundu avulakhuho unyala khwilekhanyinya khu yivi! Mba nu vunyala vu khuvoola viosi -- isavu yi vindu vienevo yakhakhayi khumanya!

⁶ Shiunyala khwikomba misango nende vihanwa tawe; navutswa nivi wamba maroyi ku khuhulila. Khali wayambakhana shihanwa shiu khusambwa nende shihanwa shiu khurulitsaho vwoni.

⁷ Nalwo lwa nahuchilila, nimbola, “Ndi hanu; Ndushili khukhola kahandikwa mu shitabu shia malako.

⁸ Nyasaye wanje, nyanzililanga khukhola lienya liolio; malako koko kali mu mwoyo kwanje.”

⁹ Mwami Nyasaye, mali khulanditsa makhuva malahi kukhusangala khulondokhana khu vuhonyinyi imbeli wi shikhaalo shia vandu vanyishi. Mwami Nyasaye, khuli lwa yivi mwene umanyi, shili khwiyikalilakhu khulanditsa.

¹⁰ Shili khwikholelakhu mu mwoyo kwanje makhuva koko malahi ku vuhonyinyi. Namala khulanditsila vandu khuli uli musuuvilwa khandi muhonyinyi wanje. Shili khulekhakhu khuvoolela vandu vanyishi mu shikhaalo shioshio, makhuva khu vuyaanzi vwovwo.

¹¹ Mwami Nyasaye, uvuli khunyima tsimbavasi tsiotsio; vuyaanzi vwovwo nende katoto koko vitsililile khuninda khumatukhu koosi.

Lisaala liu Khureeva Vukhonyi

¹² Ndi nu vutiinyu vukhanyala khuvalitswa khurulila mu tsimbeka tsiosi! Vwoni vwanje vwakhaya, mbulakhu shianyala khulola; nu vunyishi khuvira liswi khu murwi kwanje, khali ndimukhanga ikholo.

¹³ Mwami Nyasaye, yaanzitswa ninzi, umbonyinyi! Mwami Nyasaye, khola vwangu ukhonye!

¹⁴ Vandu vakhavanga khunziira vanyole tsisoni nu khukoyanyinywa. Yavo vayaanzililanga vutiinyu vwandimu vakhungwi nu khuheelwa tsisoni.

¹⁵ Vandu vakholelanga shihenye henye vanyole tsisoni, nivamali khukuurwa.

¹⁶ Voosi vakhavanga yivi vikhoye nivasangala mu yivi; yavo voosi vasanditsanga shichila vuhonyinyi vwovwo vavoole shia khase khosi, “Mwami Nyasaye ali ni tsingulu tsinyishi!”

¹⁷ Mwami Nyasaye, ndi mumanani khandi mbula khwandilakhu; navutswa unzitsushitsanga. Nivi mukhonyani wanje khandi muhonyinyi wanje; Nyasaye wanje -- ukhacheleva khwitsa tawe!