TSABURI 38 - IBIBILIA INDAKATIFU MU LUTIRICHI LWITAKHO NENDE LWISUKHA

Lisaala liu Mundu Unyakhananga

¹ Mwami Nyasaye, uvuli khungondeshela mu vurima vwovwo, inoho khusalilitsila mu vululu vwovwo.

² Mivanu chiochio chimali khundivira, umali khusalilitsa.

³ Mbulilanga vutamanu mu mmbili kwanje, shichila wambukulila vurima; ndwalanga mmbili shichila vwoni vwanje.

⁴ Vutamanu vwanje vwanditohela; vwalitoha khuli musiko kwakhanyala khwitiukha nachinga tawe.

⁵ Makule kaanje kakuunda kahuunyanga, shichila inzi mwene nali muyiingwa.

⁶ Mukongo kwanje kwayilinga, mbwele tsingulu; nzikhulaanga mbasu kwosi.

⁷ Murengo kwa ngumila muno shimbulilanga vulahi mu mmbili kwanje tawe.

⁸ Nakwa mulwale khandi navwa tsingulu tsiosi; ndilanga tsikhwili shichila nyakhananga mu mwoyo kwanje.

⁹ Mwami Nyasaye, nivi wamanya koosi ka nzikombanga; nivi uhulilanga khulila khwanje khwosi.

¹⁰ Mwoyo kwanje kukhupakananga, mbwele tsingulu; khali tsimoni tsianje tsiamwama, tsiambakhane khulola.

¹¹ Valina vaanje nende vareende vaanje vayikhala ihale wene shichila nakwa mu matiinyu, khali vandu vi inzu yanje vachendelanga ihale wene.

¹² Vandu vali ni lienya liu khunziira vandekanga mu mireeko chiavo; yavo vakhavanga khusalilitsa vasiomanga khuli vandivitsa; valoshitsa khuli vanziira mbasu kwosi.

¹³ Navutswa nakwa khuli mundu wikala maroyi, shinyala khuhulila tawe; khuli mundu muyiingwa, unyala khuvula khulomoloma.

¹⁴ Ni kilikali, nakwa khuli mundu wakhaywa khuhulila, khuli mundu unyala khuvula khwishinga mulilomoloma.

¹⁵ Navutswa ndetsanga lisuuvilitswa lianje mu yivi Mwami Nyasaye; khandi yivi Mwami Nyasaye, uli Nyasaye wanje, uliitsa khunjipa.

¹⁶ Saalanga khu yivi, “Uvuli khulekhakhu vatsiku vikhoye shichila inzi; yavo vichinjililanga ninakhakwa mu matiinyu.”

¹⁷ Ndi himbi khukwa; namenya nimbulilanga isalila khumatukhu koosi.

¹⁸ Nziyamanga havulavu vutamanu vwanje; vwoni vwanje vumbelelitsanga mu mwoyo.

¹⁹ Vatsiku vaanje valolekhanga ni valamu, vali ni tsingulu; vanyishi valiho vambukulanga khuva mutamanu munjila indamanu.

²⁰ Vandu vambanzilanga vutamanu khu vulahi, navo vatsiku vaanje shichila kholanga malahi.

²¹ Mwami Nyasaye, lekha khunzivilila. Nyasaye wanje, uvuli khuva ihale wene khwinzi!

²² Mwami Nyasaye, khola vwangu ukhonye, nivi muhonyinyi wanje!