TSABURI 30 - IBIBILIA INDAKATIFU MU LUTIRICHI LWITAKHO NENDE LWISUKHA

Lisaala liu Khusanditsa

¹ Mwami Nyasaye, khwitsominyanga shichila umali khumbonyinya khandi umali khwikalila vatsiku vaanje khunzikhoyela.

² Mwami Nyasaye, uli Nyasaye wanje, nalila khu yivi ukhonye, numbonyinya;

³ Khali nivi Mwami Nyasaye wandulitsa mu shihatisi. Nivi wangalushitsila vulamu vwanje, nundulitsa mu vandu vatsitsanga mu shihatisi.

⁴ Munyi vandu vasuuvilwa veve, mwimbile Mwami Nyasaye tsinyimbo tsiu khumwitsominya! Mwitsushitse vutakatifu vwevwe, nu mumusanditsa.

⁵ Vurima vwevwe nu vu vwangu, navutswa vulahi vwevwe nu vwi mihika ni mihika. Tsikhwili tsinyala khuvaho mu vutukhu, navutswa khuli nu vuyaanzi mu mavwevwe.

⁶ Lwa nalola ndi mu vulindi vulahi, navoola, “Shinyala khukuurwa tawe.”

⁷ Mwami Nyasaye, nivi wakholela vulahi; nivi washinga ni lisisi likali khuli shikulu shiraambi. Navutswa lwa wanzivala, nalwo lwa naheenda mwoyo.

⁸ Mwami Nyasaye, nivi wa nasaalakhu; nakhureeva tsimbavasi:

⁹ “Vukhala shina vwa nyala khunyola nimali khukhutsa, nikava nyala khuyeveelwa mu shilindwa? Vandu vakhutsa vanyala khukhwitsominya? Vanyala khulanditsa vusuuvilwa vwovwo?

¹⁰ Mwami Nyasaye, nuyaanza umbulishitsi, umbele tsimbavasi! Mwami Nyasaye, nuyaanza ukhonye!”

¹¹ Nivi wakalukhanyinya likhula lianje nilikwa vuyaanzi; wamala khurulitsaho vuveleli vwanje khunderela vuyaanzi.

¹² Khulwa yako, natsililila khukhwitsominya, mbuli khuhonjela; Mwami Nyasaye, nivi Nyasaye wanje, niitsa khukhusanditsa mihika ni mihika.