TSABURI 28 - IBIBILIA INDAKATIFU MU LUTIRICHI LWITAKHO NENDE LWISUKHA

Lisaala liu Khureeva Khukhonywa

¹ Mwami Nyasaye, ndilanga tsikhwili khu yivi; Yivi uli khuli lwanda lwanje, nuyaanza umbulishitsi; niiva uliitsa khwambakhana khumbulishitsa, niitsa khuva khuli vandu vakhutsa.

² Mbulila lwa saalanga khu yivi ukhonye, lwa njinganga makhono kaanje mwikulu nimbenza khu Litempeli liolio litakatifu.

³ Lekha khumbukula shilala na vandu vatamanu, yavo vakholanga vindu vitamanu, vandu valomolomanga vulahi khu vareende vavo, navutswa vayitsula mu mioyo chiavo vindu viu khusalilitsa vandi.

⁴ Vanzila vikholwa vitamanu via vakhola, khandi shichila mihinzilu mitamanu chia vakhola. Vanzila vutamanu vwa vene vakhola, vakhole khuli kenyekhanga!

⁵ Lwa vachayanga mihinzilu chiu Mwami Nyasaye, inoho vikholwa via yakhola; aliitsa khuvativitsa, vuchila khuvumbakha vuyia.

⁶ Mwami Nyasaye yitsominywi; shichila umali khuhulila lisaala lianje liu khuvelwa tsimbavasi.

⁷ Mwami Nyasaye neye umbetsanga tsingulu nu khuninda khuli ingavo; lisuuvilitsa lianje lili muye. Neye ukhonyanga, khali akhola khusangala. Mwitsominyilanga mu lwimbo lwanje.

⁸ Mwami Nyasaye neye uheetsanga vandu veve tsingulu; mwami wewe wavekhwa makura yilushilanga mu vuhonyinyi vwevwe.

⁹ Mwami Nyasaye, nuyaanza uhonyinyi vandu vovo, ukasitse vandu vovo shichila ni miandu chiochio uve mwayi wavo, utsililile khuvalinda mihika ni mihika.