TSABURI 27 - IBIBILIA INDAKATIFU MU LUTIRICHI LWITAKHO NENDE LWISUKHA

Lwimbo lu Khwitsominya Mwami Nyasaye

¹ Mwami Nyasaye neye vulavu vwanje khandi vuhonyinyi vwanje. Ni viina wanyala khuha luyali? Mwami Nyasaye ali khuli imbinga yanje mu limenya, mbulakhu mundu wa niitsa khuria.

² Lwa vandu vatamanu vangwananga, nivenya khundivitsa, vatsiku vaanje venavo valiitsa khwisikarila nivakwa.

³ Khali niiva mukaanda kwa vasikali vanyishi vanyala khumbotokhana, niitsa khuvula khuria. Khali niiva vatsiku valiitsa khungwana, niitsa khuva ni lisuuvilitsa.

⁴ Ni shindu shilala shia ndevanga khurula khu Mwami Nyasaye, shiatushili akholele; khumatukhu kaanje koosi kashili mwoyo; khumenya mu inzu yu Mwami Nyasaye khulola vulahi vwevwe, khali khureeva vwimilili vwevwe mu Litempeli lielie.

⁵ Mumatukhu ka niitsa khuva nindi mu vutiinyu, aliitsa khumbikha mu vulindi vulahi mu Litempeli lielie; aliitsa khumbisa mu liheemo lielie nu khusinjilitsa vulahi ikulu khu lwanda lwi tsingulu.

⁶ Niitsa khukuura vatsiku vaanje vambotokhananga. Niitsa khumukholela misango mu Litempeli ni liyooko liu vuyaanzi; niitsa khwimba tsinyimbo, ninzitsominya Mwami Nyasaye.

⁷ Mwami Nyasaye, mbulila lwa ndilanga tsikhwili khu yivi! Mbela tsimbavasi, ukhonye!

⁸ Nzivoolelanga mu mwoyo, “Hamba usaale khu Mwami Nyasaye!” Nachipa, “Mwami Nyasaye, nzitsanga khu yivi.”

⁹ Lekha khunzivala! Lekha khukhunga inzi murumishi wowo khuvirila mu vurima vwovwo. Nivi wakhonyanga. Lekha khukhunga, lekha khunzivilila, Nivi Nyasaye uchilanga nimbonyinywa!

¹⁰ Khali niiva tata wanje nende mama wanje vanyala khunzivala, Mwami Nyasaye aliitsa khunzinjilitsa.

¹¹ Mwami Nyasaye, nzechitsa ka wenyanga khole, unzimilile khuvirila khu injila indahi, shichila vatsiku vaanje.

¹² Lekha khunzivala mu makhono ka vatsiku vaanje, shichila vashiahidi vu vuvehi vangwananga, vasiomelanga khuli vanyala khusalilitsa.

¹³ Ndi ni lisuuvila ndi niitsa khulola vulahi vu Mwami Nyasaye, mu shivala shia vandu vashili mwoyo.

¹⁴ Usuuvilile mu Mwami Nyasaye. Uve ni tsingulu, uvuli khurimukha ikholo! Ni kilikali, ure lisuuvilitswa liolio mu Mwami Nyasaye.