TSABURI 22 - IBIBILIA INDAKATIFU MU LUTIRICHI LWITAKHO NENDE LWISUKHA

Khunyakhana khandi Khwitsominya

¹ Nyasaye wanje, Nyasaye wanje, shichila shina unzivale? Ndilanga tsikhwili ninyakhana shichila nyenyanga ukhonye, navutswa wambakhane khukhonya.

² Nyasaye wanje, ndilanga tsikhwili mbasu, nikhali wambakhane khunjipa; ndilanga tsikhwili mu vutukhu, nikhali mbula lihulukha.

³ Khali ndio, nivi mutakatifu, nivi wikhala khu shisoko shiu vwami, wa Vaisraeli vitsominyanga.

⁴ Vakuuka veru vali ni lisuuvilitsa mu yivi; vali ni lisuuvilitsa liavo mu yivi, nu vahonyinya.

⁵ Valila tsikhwili khu yivi, nu vahonyinya; vali ni lisuuvilitsa mu yivi, nivavula khukhutsa mwoyo.

⁶ Navutswa inzi ndi vutswa inyende, shindi khuli mundu tawe; ninzi wa vandu vakholelanga shihenye henye, khandi wa vachayanga.

⁷ Vandu voosi nivandolikhu vakholelanga shihenye henye; vanyekanga, nivanuya mirwi chiavo.

⁸ Vavoolanga, “Yali ni lisuuvilitsa lielie mu Mwami Nyasaye. Leshi amurulitse mu matiinyu, leshi Nyasaye amuhonyinyi, shichila wayaanzitswa naye!”

⁹ Khali ndio, nivi wachila mama wanje nanzivula; khali waninda vulahi lwa mama wanje yanunyinyanga.

¹⁰ Nasuuvilila mu yivi khuraanjila khulitukhu lia nivulwa, khurula mama wanje nanzivula nivi Nyasaye wanje.

¹¹ Lekha khuva ihale wene khwinzi! Vutiinyu vuli himbi khutukha, ninzi mbulakhu mundu unyala khukhonya.

¹² Vatsiku vambotokhane khuli tsichilishi; vandele hakari havo khuli tsichilishi tsindulu mu shivala shia Bashani.

¹³ Vamali khung'avulila minwa chiavo, vali khuli isimba ihuma humanga nitwelanyinya inyama ya imali khukumila.

¹⁴ Mbwele tsingulu, khuli matsi kasuundulwa hasi; Vikuumba viu mmbili kwanje vitivanile; mwoyo kwanje kuli khuli ilaamu, kuchemulilanga mwinzi.

¹⁵ Mwing'ori mwanje mukari mumakane khuli lukuushi; lulimi lwanje lwitiili khu miino kaanje; umali khunzivala nzeveelwi mu shilindwa.

¹⁶ Shituma shia vandu vatamanu shimbotokhane; khuli tsisiimbwa mu shituma tsili himbi khundukhakhu; tsinumache makhono kaanje nende vilenje vianje.

¹⁷ Vikuumba viu mmbili kwanje vinyala khuvalitswa -- vatsiku vaanje vambenzanga nivasekha.

¹⁸ Vene vakavulananga tsinguvu tsianje, khali khukhuvila ikura khu tsinguvu tsienetso.

¹⁹ Mwami Nyasaye, nuyaanza uvuli khuva ihale wene khwinzi! Yivi uli mukhonyani wanje, khola vwangu ukhonye!

²⁰ Mbonyinya mbuli khwiirwa ni shivavi; umbonyinyi khurula khu tsisiimbwa tsienetso.

²¹ Mbonyinya khurula khu tsisimba; umbonyinyi khurula khu tsichilishi tsindulu tsienetso.

²² Niitsa khuvoolela vandu vaanje vikholwa viovio; niitsa khukhwitsominyila mu shikhaalo shia vandu:

²³ “Munyi vamuheetsanga Mwami Nyasaye luyali, mumwitsominye! Munyi vitsukhulu va Yakobo, mumuhe luyali! Munyi Vaisraeli, musaale khuye!

²⁴ Shikali wachaya vandu vamanani inoho wayambakhana khuvakhonya nivanyakhananga tawe; navutswa avakholelanga ka venyanga lwa vasaalanga khuye avakhonye.”

²⁵ Niitsa khukhwitsominyila mu shikhaalo shiosi shichila vikholwa viovio; niitsa khurweshitsa lilaaka lianje imbeli wa vandu vakhuheetsanga luyali.

²⁶ Vandu vamanani valiitsa khulia nu khwikura; yavo vakhavanga Mwami Nyasaye valiitsa khumwitsominya. Nyasaye atsililile khuvakholela malahi mihika ni mihika!

²⁷ Vandu vi tsimbia tsiosi valiitsa khwitsushitsa Mwami Nyasaye, nivakalukha khuye. Vandu voosi mu shivala valiitsa khusaala khuye;

²⁸ shichila Mwami Nyasaye neye mwamihi; yamihanga vandu vi tsimbia tsiosi.

²⁹ Vandu vilola voosi khulilova khunu valiitsa khumwinamila; vandu voosi vakhutsanga valiitsa khumusikamila, khali mundu unyala khukhaywa khutsililila khuva mwoyo.

³⁰ Vitsukhulu vaanje valiitsa khumurumishila; vandu vi likhula liliitsa khuvaho valiitsa khuvoolelwa makhuva ku Mwami Nyasaye.

³¹ Vandu vashili khwivulwa valiitsa khuvoolelwa: “Mwami Nyasaye neye wakhola kenako.”