TSABURI 2 - IBIBILIA INDAKATIFU MU LUTIRICHI LWITAKHO NENDE LWISUKHA

Mwami wa Nyasaye Yarovola

¹ Shichila shina vandu vi tsimbia tsindi vikholanga shileeche? Shichila shina vakanakananga khukhola makhuva kavo ki shikhaya?

² Vami vi vivala vayirechekha, vamihi vavo vavoolelana khuli vakhola, khuhinganyinya Mwami Nyasaye nende mwami wa yarovola.

³ Vavoolanga, “Chendi khuve vavoholole khuvuli khwamihwa navo; leshi vavuli khukhwimilila.”

⁴ Mwami Nyasaye wamihanga mwikulu, avasekhanga nu khuvakholela shihenye henye.

⁵ Khali avakondeshelanga mu vurima vwevwe, nu khuvatechelitsa mu vululu vwevwe, navoola,

⁶ “Mali khwamihitsa mwami wa narovola, yamihanga khu shikulu shianje shitakatifu shia Sayoni.”

⁷ Mwami avoolanga, “Niitsa khulanditsa ku Mwami Nyasaye aviritsi khukhola. Yambolela, ‘Uli mwana wanje; nunundi mali khuva tata wowo.

⁸ Ndeva shia wenyanga ninzi niitsa khukhuha vivala khuva viovio; lilova liosi liliitsa khuva liolio.

⁹ Uliitsa khuvamiha nu vunyali muno; uliitsa khuvaraanyinya khuli inyungu yatikhanga mu vikonjio.’ ”

¹⁰ Munyi vami, muve nu vusitsa; munyi vamihi vi shivala mwechitswi liechitso yili.

¹¹ Murumishile Mwami Nyasaye nu khumuha luyali; khali mwikhoye numutechela.

¹² Mutechele nu mumwinamila; nikakhavele kario aliitsa khuva nu vurima, nu khumutivitsa vurima vwevwe nu vu vwangu. Vali ni ikhaavi voosi vilushilanga muye avakhonye.