TSABURI 19 - IBIBILIA INDAKATIFU MU LUTIRICHI LWITAKHO NENDE LWISUKHA

Vukhumi vwa Nyasaye mu Vilombe Vievie

¹ Likulu limanyinyanga havulavu vukhumi vwa Nyasaye! Malesi kamanyinyanga havulavu muhinzilu kwa yakhola!

² Shia litukhu livoolelanga litukhu lilondakhu luyali lwelwe; khandi vutukhu vwivaalilanga vutukhu vulondakhu.

³ Lilomoloma livulakhuyo, khali makhuva kavulakhuyo; mwoyo kuvulakhuyo kuhulilikhananga.

⁴ Khali ndio, mwoyo kwavio kuhulilikhananga khulilova, makhuva kavio kahulilikhananga mu tsimbeka tsiosi khulilova. Nyasaye walombela liuva hango mu malesi;

⁵ lilolekhanga mu mavwevwe khuli musatsa uselelanga mwiiha arulanga munzu mwemwe; lili nu vuyaanzi khuli mwilukhachi uli nu mwoyo ku khwilukhaka maliviri.

⁶ Liranjililanga khuluveka lulala lwa malesi lishiama nilivotokhana khutukha khuluveka lundi. Shindu shivulakhuho shinyala khwivisa luya lwi liuva.

Lilako liu Mwami Nyasaye

⁷ Lilako liu Mwami Nyasaye ni liseletse; likhuheetsanga tsingulu vuyia; mechitso ku Mwami Nyasaye ni katoto, kachilanga vandu vavula vusitsa vanyola vusitsa.

⁸ Malako ku Mwami Nyasaye ni likhola liu vulunji, khandi yavo vakalondanga vali nu vuyaanzi. Makhuva ku Mwami Nyasaye ni katoto, kachelihitsanga mundu.

⁹ Khuha Mwami Nyasaye luyali ni shindu shilahi; lulatsililila khuvaho mihika ni mihika. Mivaalo ku Mwami Nyasaye ni katoto; koosi ni likhola liu vulunji.

¹⁰ Ni malahi khwikomba khuvira itsahabu, khuvira itsahabu indahi yene, kanuula khuvira vushi vwi tsinzushi, khuvira vushi vu mu mulinga vunulu muno.

¹¹ Navutswa inzi murumishi wowo njelihitswangwa khuvirila muko; nikalonda mbelwangwa shihanwa shikali.

¹² Navutswa ni viina unyala khulola vutamanu vwevwe mwene? Mwami Nyasaye, ndulitsa mu vutamanu vwaviswa.

¹³ Shinga khurula mu vwoni vwakholanga nimanyi; lekha vuvuli khunzamihakhu! Nalwo lwa niitsa khuva museletse, khuvula khuva nu vutamanu vwosi.

¹⁴ Makhuva kaanje nende tsinganakani tsili mu mwoyo kwanje, vimali khuhuchililwa imbeli wowo yivi Mwami Nyasaye, uli khuli lwanda lwanje lu khuninda khandi muhonyinyi wanje!