Biblia Todo Logo
Bìoball air-loidhne

- Sanasan -

TSABURI 18 - IBIBILIA INDAKATIFU MU LUTIRICHI LWITAKHO NENDE LWISUKHA


Lwimbo lwa Daudi Yimba lwa Yakuura
( 2 Sam 22:1-51 )

1 Mwami Nyasaye, nakhuyaanza, shichila umbetsanga tsingulu tsiu khuninda.

2 Mwami Nyasaye neye unindanga; ali khuli lwanda lwanje, imbinga yanje, khandi muhonyinyi wanje; Nyasaye wanje, ali khuli lwanda lwanje, wa nzilushilamu mbe nu vulindi vulahi, ali khuli ingavo yu khuninda, neye umbonyinyanga nu khushinga khurula khu vatsiku vaanje.

3 Nasaala khu Mwami Nyasaye, utushili khwitsominywa, khandi mali khuhonyinywa khurula khu vatsiku vaanje.

4 Maraava kaleranga likhutsa kambotokhana mu tsimbeka tsiosi; maruundu ku khutivitsa kambira ni tsingulu.

5 Maraava kaleranga likhutsa kambotokhana mu tsimbeka tsiosi, nimba himbi khukwa mu mureeko kwi shilindwa.

6 Lwa nali nindi mu vutiinyu nasaala khu Mwami Nyasaye; nasaala khu Mwami Nyasaye, uli Nyasaye wanje akhonye. Nali mu Litempeli lielie yahulila mwoyo kwanje, yahulila khulila khwanje khukhwenya khukhonywa.

7 Shivala shiatechela manishinuyanuya; misinji chi vikulu chiatechela nu khwinuya shichila Nyasaye yali nu vurima.

8 Mwooshi kwarula mumulu keke mulilu kusambanga kulaalitsa vindu nende mandaa kakhanga mulilu nikarula mu munwa kwekwe.

9 Yalaminya malesi maniyikha hasi; malesi mamwamu hasi hi vilenje vievie.

10 Yanina khu vilombe vi tsimbaha manapulukha; yapulushila mu vushindu khuli linyonyi lipulukhanga.

11 Yikhunikha mwene ni shisuundi; malesi malitoho, nikitsule matsi kamuvotokhana.

12 Machina ki imbula nende tsimemo tsiu mulilu tsiarula mutsimbeni imbeli wewe manitsivirila mu malesi mamwamu.

13 Mwami Nyasaye yahilikana mwikulu khuli lukulu; ma mwoyo kwa Nyasaye Uli Ikulu khu Viosi nu kuhulilikhana.

14 Yalesa mivanu chiechie manasalanyinya vatsiku veve; yarumishila tsimemo tsi tsimbeni khuvakhunganyinya.

15 Yakhaaminya matsi mu inyanza nirikala inzele, khali misinji chi lilova nichilolekha vutswa; Mwami Nyasaye lwa wakondeshela vatsiku vovo, khandi nu valindula khuvirila mu vurima vwovwo.

16 Mwami Nyasaye yikha hasi khurula mwikulu nangumila; yakhwesa khurula mu luliiva lwa matsi.

17 Yanzihonoloshitsa khurula mu vatsiku vaanje vitsingulu khumbira khandi khurula khu yavo voosi vambimanga -- vali ni tsingulu tsinyishi muno khumbira.

18 Vangwana, nindi mu vutiinyu, navutswa Mwami Nyasaye yaninda.

19 Yakhonya khurula mu maraava; yambonyinya shichila nali namuyaanzitsa.

20 Mwami Nyasaye yandunga shichila likhola lianje liu vulunji; yangasitsa shichila mbula vutamanu vwosi vwa nali nikholi.

21 Mali khulonda lilako liu Mwami Nyasaye; shili khukholakhu shindu shitamanu shiu khulekhana na Nyasaye wanje.

22 Malako keke koosi kali imbeli wanje shili khwambakhanakhu khukhola ka yenyanga khole.

23 Wamanya ndi mbula imbala yosi, khandi mbulakhu vwoni vwa kholanga.

24 Khulwa yako, Mwami Nyasaye undunji shichila kholanga likhola liu vulunji, shichila wamanya ndi mbula vutamanu vwosi.

25 Mwami Nyasaye, uli musuuvilwa khu yavo vali vasuuvilwa khu yivi; nivi uli mulahi muno khu yavo vali vaseletse.

26 Uli munihu khu yavo vali vanihu; navutswa mululu khu yavo vakholanga vindu vitamanu.

27 Uhonyinyanga yavo vali vichehitsi, navutswa uchehitsanga yavo vilola.

28 Mwami Nyasaye, nivi umbetsanga vulavu; nivi wandulitsa mu shisuundi shianje.

29 Umbetsanga tsingulu tsiu khukwana vatsiku vaanje khandi tsingulu tsiu khuvakuura.

30 Nyasaye uyu, shia shindu shiosi shia kholanga ni shiseletse, khandi likhuva liolio ni liatoto. Ali khuli ingavo khu yavo vilushilanga mu vulindi vwevwe.

31 Ni viina uli Nyasaye, navutswa Mwami Nyasaye wonyene? Ni viina uli khuli lwanda, navutswa Nyasaye weru?

32 Neye Nyasaye umbetsanga tsingulu, ulombanga limenya lianje khuva liu vulindi vulahi.

33 Anombanga nzilukhaka maliviri muno khuli impongo; anindanga vulahi vwene nindi khu vikulu.

34 Anzechitsanga khuli nyala khukwana muliihe, khurumishila vura vwi tsingulu.

35 Mwami Nyasaye, nivi unindanga numbonyinya; vulindi vwovwo vukholi khuva ni tsingulu, khandi tsingulu tsiotsio tsiakhaninda vulahi vwene.

36 Nivi waninda nimbula khukumilwa, vuchila khukwakhu hasi.

37 Nilukhanyinya vatsiku vaanje, nivakumila; shinasinjilakhu nishili khuvativitsa tawe.

38 Navakuura, nivavula tsingulu tsiu khungwana; vakhutsila imbeli wanje.

39 Nivi wamba tsingulu tsiu khukwana liihe khandi tsiu khukuura vatsiku vaanje.

40 Nivi walomba vatsiku vaanje nivanzilukha; namulula yavo vahimanga inzi.

41 Valila nivenyanga khukhonywa, navutswa mundu avulakhuho wali unyala khuvahonyinya; vasaala khu Mwami Nyasaye, navutswa yambakhana khuvachipa.

42 Navakhuva nivakwa khuli lukuushi lwa vushindu vuhuutsanyinyanga. Navatuuvaka khuli vandu vatuuvakanga matohi khu tsinjila.

43 Nivi wambonyinya khurula khu vandu vakwananga vandi; nukhola khuva mwamihi wa vandu vi tsimbia tsindi tsiosi; vandu va nali nakorwa, navo vanzamihanga.

44 Vandu vacheni va nzinamilanga; lwa vambulilanga, valondanga malako kaanje.

45 Varimukhanga ikholo nivatechela lwa vali nivarulanga mu tsimbinga tsiavo.

46 Mwami Nyasaye ashili mwoyo! Mwitsominyanga shichila ali khuli lwanda lwanje lu khushinga! Muhe Nyasaye umbonyinyanga vukhumi!

47 Neye umbetsanga tsingulu tsiu khukuura vatsiku vaanje; nu khumba vunyali vu khwamiha vandu vi tsimbia tsindi tsiosi.

48 Neye umbonyinyanga khurula khu vatsiku vaanje. Mwami Nyasaye, nivi umbetsanga tsingulu tsiu khukuura vatsiku vaanje; khali unindanga khurula khu vandu vasalilitsanga vandi.

49 Khulwa yako, niitsa khukhwitsominya mu vandu vi tsimbia tsindi tsiosi; niitsa khukhwimbila tsinyimbo khukhwitsominya.

50 Nyasaye aheetsanga mwami wewe likuura li tsingulu. Shia khase khosi wayaanza yavo va yarovola, khali Daudi nende vitsukhulu veve mihika ni mihika.

© The Bible Society of Kenya, 2013

Bible Society of Kenya
Lean sinn:



Sanasan