TSABURI 147 - IBIBILIA INDAKATIFU MU LUTIRICHI LWITAKHO NENDE LWISUKHA

Vulahi vu khwitsominya Mwami Nyasaye

¹ Mwami Nyasaye yitsominywi! Nu vulahi khwitsominyila Nyasaye weru mu tsinyimbo; neye wi tsimbavasi, utushili khwitsominywa.

² Mwami Nyasaye yumbakhanga vuyia litaala likali lia Yerusalemi; akalushitsanga Vaisraeli vali nivahilwa mu vuhaambe.

³ Ahonyinyanga vandu vali nu vuveleli mu mioyo; nu khuvavoha makuule kavo.

⁴ Neye wamanya isavu yi tsinyining'ini, khali neye utsiheetsanga mira katsio.

⁵ Mwami Nyasaye, uli Nyasaye weru neye uli ni tsingulu tsinyishi nende vunyali; ali ni limanya mu vunyishi khuvira shichelo.

⁶ Mwami Nyasaye achingulanga vandu vatambitswangwa, navutswa amionolelanga hasi vandu vatamanu.

⁷ Mwimbile Mwami Nyasaye lwimbo lu khumusanditsa; khuvili Nyasaye weru vukhana vwi shilili.

⁸ Akhunikhanga likulu na malesi; nakhuvitsa imbula khulilova, khali achila vunyasi nuvumeela khu vikulu.

⁹ Neye uheetsanga tsinyama shiukhulia, alishitsa viminyoli via makhokho vili ni inzala.

¹⁰ Avulakhu shia yaanzililanga mu tsifarasi tsi tsingulu, inoho khuyaanzilila khuva nu vucheli khuli vu musikali wiliihe.

¹¹ Mwami Nyasaye ayaanzililanga vandu vamuheetsanga luyali; mu yavo vali ni lisuuvilitswa mu vuyaanzi vwevwe.

¹² Yivi litaala likali lia Yerusalemi, witsominyi Mwami Nyasaye! Yivi Sayoni, witsominyi Nyasaye wowo,

¹³ shichila neye utinyinyanga milondi chi vilivwa vienyu, khandi akasitsa vandu venyu.

¹⁴ Neye uchilanga numuva ni milembe khu mipaka chienyu; khali amwikuritsa ni inganu indahi.

¹⁵ Neye uheetsanga vandu lilako lielie khulilova, khali likhuva lielie likholekhanga vwangu.

¹⁶ Neye uvambalalitsanga imparafu iva khuli ipamba; khali asalanyinya liime liva khuli lukuushi.

¹⁷ Neye urumanga imbula ya machina iva khuli mashindi; Ni viina unyala khwikhutsila mu vushindu vwevwe?

¹⁸ Neye uhaananga lilako lielie, machina ki imparafu nikayekulukha; neye urumanga vushindu, matsi nikakholomokha.

¹⁹ Neye uvoolelanga Yakobo likhuva lielie, khali khwivaalila Vaisraeli mechitso nende mivaalo keke.

²⁰ Ashili khukholelakhu vandu vi tsimbia tsindi shikholwa khuli shienesho; khali vakorwa malako keke. Mwami Nyasaye yitsominywi!