TSABURI 146 - IBIBILIA INDAKATIFU MU LUTIRICHI LWITAKHO NENDE LWISUKHA

Katoto ka Nyasaye

¹ Mwami Nyasaye yitsominywi! Nzitsominyanga nu mwoyo kwosi Mwami Nyasaye!

² Niitsa khwitsominya Mwami Nyasaye khumatukhu koosi kashili mwoyo; nishili mwoyo niitsa khwitsominyila Nyasaye wanje mu lwimbo.

³ Muvuli khura lisuuvilitsa lienyu mu vimilili va vandu, mu mwana wu mundu, unyala khuvula khumukhonya.

⁴ Namali khukhutsa, akalukhanga khu lukuushi; ka yali niyaloshitsa khukhola kativanga khulitukhu lilala lienelo.

⁵ Ali ni ikhaavi mundu wa Nyasaye wa Yakobo akhonyanga; uli ni lisuuvilitswa mu Mwami Nyasaye, uli Nyasaye wewe,

⁶ waloonga likulu nende lilova, inyanza, nende shia shindu shiosi shilimu; urweshitsanga lilaaka lielie mihika ni mihika;

⁷ wu kholelanga vandu vatambitswangwa katoto; khali aha vandu vali ni inzala shiukhulia. Mwami Nyasaye akholanga vandu vavohwa khuva vavoholole;

⁸ khali khwikula tsimoni tsia vavekhu. Mwami Nyasaye achingulanga vandu vateteshele; Mwami Nyasaye wayaanza vandu vi likhola liu vulunji.

⁹ Mwami Nyasaye alindanga vandu vacheni; akhonyanga vakhutsakhali nende vavisandu; navutswa ativitsanga vikholwa via vandu vatamanu.

¹⁰ Mwami Nyasaye aliitsa khwamiha mihika ni mihika! Yivi Sayoni, Nyasaye wowo aliitsa khwamiha vandu vi likhula liosi. Mwami Nyasaye yitsominywi!