TSABURI 144 - IBIBILIA INDAKATIFU MU LUTIRICHI LWITAKHO NENDE LWISUKHA

Lisaala liu Mwimilili

¹ Mwitsominye Mwami Nyasaye, lwa ali khuli lwanda lwanje, neye unzechitsanga khukwana, nu khunzirecheshitsa muliihe.

² Neye uli khuli lwanda lwanje nende imbinga yanje, munaara kwanje kwi tsingulu khandi muhonyinyi wanje; neye uli khuli ingavo yanje, wa nzilushilamu, khali neye ukuuranga vandu nu khuvamiha.

³ Yivi Mwami Nyasaye, mundu ni shina kachilanga numuheendela mwoyo, inoho mwana wu mundu wa ukanakanilanga?

⁴ Mundu ali khuli miuya; matukhu keke ku khuva mwoyo kalolekhanga khuli shinini.

⁵ Yivi Mwami Nyasaye, yikula likulu witsi hasi; tiila khu vikulu, ma mwooshi kurulimu.

⁶ Ruma tsimemo tsi tsimbeni, usalanyinye vatsiku vovo; lesa mivanu chiochio khuvakhunganyinya!

⁷ Kholakhu shindu khurula mwikulu, ukhwese mu luliiva lwa matsi, umbonyinyi; umbonyinyi khurula khu tsingulu tsia vandu vacheni,

⁸ valomolomanga makhuva ku vuvehi, khali vavoola vuvehi lwa visuuhanga.

⁹ Nyasaye wanje, niitsa khukhwimbila lwimbo luyia; nindumishilanga vukhana khukhwimbila.

¹⁰ Nivi uheetsanga vami tsingulu tsiu khukuura, uhonyinya murumishi wowo Daudi.

¹¹ Umbonyinyi khurula mu vatsiku vaanje valula; khonya khurula mu tsingulu tsia vandu vacheni, valomolomanga makhuva ku vuvehi, khali vavoola vuvehi lwa visuuhanga.

¹² Vaana veru vi shiyayi vavilushi khuli viraakwa mu mulimi, vaana veru vi shikhana khuli tsirilu tsiu mukona, tsiakhongwa khulomba inzu yu vwami;

¹³ viachi vieru visumeele imu mu vunyishi lukanu. Makondi mu milimi kivulane mu vunyishi;

¹⁴ tsing'ombe tsieru tsivulane mu vunyishi, vuchila khuhulula inoho khukhutsa. Nzikombanga ndi vutiinyu vuvuli khukhukwilakhu mu mataala keru.

¹⁵ Vali ni ikhaavi vandu vakasitswangwa khuvirila munjila yeneyo! Vali ni ikhaavi vandu va Nyasaye wavo neye Mwami Nyasaye!