TSABURI 143 - IBIBILIA INDAKATIFU MU LUTIRICHI LWITAKHO NENDE LWISUKHALisaala liu Khwenya Khukhonywa 1 Mwami Nyasaye, hulila lisaala lianje, uhulishitsi ka nyenyanga ukholele lwa uli musuuvilwa; ukhonye shichila likhola liolio liu vulunji! 2 Uvuli khumbikha inzi murumishi wowo mu machelitso; shichila mundu wi likhola liu vulunji avulakhuho imbeli wowo. 3 Mutsiku wanje umali khumbitsanyinya; khali umali khungwishitsa hasi; uchili menyanga mu shisuundi khuli vandu vakhutsa khale. 4 Khulwa yako, mali khukhutsa mwoyo; mbendanga mwoyo. 5 Nzitsushitsanga matukhu kakhale, khali nganakananga khu koosi ka wakhola, mparakhu shindu khu vikholwa viovio viosi. 6 Njinganga makhono kaanje ikulu khu yivi mu lisaala; mwoyo kwanje kuli nu vuluhu khuli mulimi kumakana shichila yivi. 7 Yivi Mwami Nyasaye, khola vwangu unjipe! Mali khukoritsa lisuuvilitswa lianje! Uvuli khunzivala, inoho nava mulala khu yavo vayeveelwangwa mu shilindwa. 8 Umanyinyi mu mavwevwe vuyaanzi vwovwo, shichila suuvililanga mu yivi. Unzechitsi mwiima kwandushili khulonda, shichila nivi wasaalakhu. 9 Yivi Mwami Nyasaye, umbonyinyi khurula mu vatsiku vaanje, shichila nivi wa nzilushilamu umbe vulindi vulahi! 10 Unzechitsi khukhola lienya liolio, shichila uli Nyasaye wanje! Ukholela malahi, khali unzimilile khu injila inunji! 11 Mwami Nyasaye, umbonyinyi khuli yivi mwene walaaka, undulitsi mu vutiinyu vwanje shichila likhola liolio liu vulunji! 12 Yiira vatsiku vaanje, shichila vuyaanzi vwovwo, nu khutivitsa vandu voosi vandambitsanga, shichila ninzi murumishi wowo. |
© The Bible Society of Kenya, 2013
Bible Society of Kenya