TSABURI 141 - IBIBILIA INDAKATIFU MU LUTIRICHI LWITAKHO NENDE LWISUKHA

Lisaala lia Halukolovo

¹ Mwami Nyasaye, ndilanga tsikhwili khu yivi; khola vwangu ukhonye! Umbulishitsi, lwa ndilanga tsikhwili khu yivi!

² Lekha lisaala lianje livukulwi khuli nu vubani imbeli wowo, khandi lwa njinganga mwikulu makhono kaanje khuli musango kwa halukolovo!

³ Yivi Mwami Nyasaye, uninde mulilomoloma lianje, unzikalile khulomoloma vutamanu.

⁴ Unzikalile khukhola vindu vitamanu, mbuli khukhola vikholwa vitamanu; mbuli khusanga na vandu vatamanu mu likhola liavo, inoho khusanga navo mu milukha chiavo chi lilia.

⁵ Nu vulahi mundu mulahi khundumula inoho khungondeshela munjila indahi; navutswa khuvula khuhuchilila khwitsominywa na vandu vatamanu, shichila lwa saalanga ngayanga vikholwa viavo vitamanu.

⁶ Lwa vamihi vavo valiitsa khuhilwa khu vandu vu khuvakhalachila, nalwo lwa valiitsa khuhuchilila ndi likhuva liolio ni liatoto.

⁷ Khuli lukhuyi lwa visiakanyinyamu mu visia, nindio khandi vikuumba viavo viliitsa khusalanyinywa khundulu khwi shilindwa.

⁸ Yivi Mwami Nyasaye, uli Nyasaye wanje, nivi wambenzikhu; nivi wa nzilushilakhu khulindwa; lekha khunzivala mu maraava ki likhutsa!

⁹ Ndulitsa mu mireeko chia vamali khureeka vangumile, khurula mu mireeko chia vandu vatamanu venavo.

¹⁰ Vandu vatamanu vakwi vene mu mireeko chiavo, lwa mbiraho mu vulindi vulahi.