TSABURI 14 - IBIBILIA INDAKATIFU MU LUTIRICHI LWITAKHO NENDE LWISUKHA

Vikholwa Vitamanu via Vandu Vakholanga

¹ Vandu vayiingwa vivoolelanga mu mioyo, “Nyasaye avulakhuho!” Vandu venavo vakoyana, vakhola vindu vitamanu; mundu avulakhuho wu kholanga shindu shilahi.

² Mwami Nyasaye aheenzeshitsanga khurula mwikulu khulola niiva mundu alikhuho khali mulala khuvo uli nu vusitsa, woyo wukhavanga Nyasaye.

³ Navutswa voosi vayambakhana khuva vasuuvilwa; vandu venavo vakoyana. Mundu avulakhuho khali mulala khuvo wu kholanga kali malahi, khali mulala khuvo avulakhuho.

⁴ Mwami Nyasaye avoolanga, “Vandu vatamanu voosi vavula vucheli. Vamenya nivanuulanga vandu vaanje miandu chiavo, navutswa khali valekha khusaala khwinzi.”

⁵ Navutswa valiitsa khutechelitswa, shichila Nyasaye ali mu shikhaalo shia vandu vi likhola liu vulunji.

⁶ Vandu vatamanu vakoyanyinyanga lienya lia vandu vamanani, vilushilanga mu Mwami Nyasaye.

⁷ Vuhonyinyi vwa Israeli vuliitsa khurula Sayoni! Lwa Mwami Nyasaye aliitsa khukhola vandu veve khuhindahala, vandu vi inzu ya Yakobo valiitsa khuva nu vuyaanzi khushila muno, Vaisraeli valiitsa khusangala.