TSABURI 137 - IBIBILIA INDAKATIFU MU LUTIRICHI LWITAKHO NENDE LWISUKHA

Khuli Vaisraeli Vikhula

¹ Khwikhala nukhuli himbi ha michela chia Babilonia; nu khulila lwa khwitsushitsa Sayoni.

² Khwasunga vilili vieru mu misala chili mu shivala shienesho.

³ Vandu vali nivakhukumili venyanga khuvimbile tsinyimbo; vandu vakhunyashitsanga vali ni lienya khuvayaanzitsi, nivavoola, “Khwimbilikhu lulala khu tsinyimbo tsia Sayoni.”

⁴ Khunyala khwimba khurina lwimbo lu Mwami Nyasaye nukhuli mu shivala shicheni?

⁵ Yivi litaala likali lia Yerusalemi, niiva nyala khukhwivilila, mbuli khukhuvakhu shilili khandi!

⁶ Mbuli khuva nu vunyali vu khwimbakhu khandi, niiva nyala khuvula khukhwitsushitsa, niiva nakhaywa khukhuvukula khuva litaala likali lichilanga nimba nu vuyaanzi muno.

⁷ Mwami Nyasaye, nuyaanza witsushitse ka Vaedomu vakhola, khulitukhu li litaala likali lia Yerusalemi liakumilwa. Yitsushitsa khuli valomolomanga nivavoola, “Pomolanyinyi litaala likali lia Yerusalemi! Rinyuuli musinji kwalio!”

⁸ Yivi Babilonia, uliitsa khutivitswa! Ali ni ikhaavi mundu uliitsa khukhuvanzila vutamanu vwa yivi wakhukholela!

⁹ Ali ni ikhaavi mundu uliitsa khukhunuula vaana vovo vatoro nu khuvasionola khu lwanda.