TSABURI 12 - IBIBILIA INDAKATIFU MU LUTIRICHI LWITAKHO NENDE LWISUKHA

Lisaala liu Khureeva Vukhonyi

¹ Mwami Nyasaye, nuyaanza ukhukhonye! Vandu valahi vamala khuvwa; vusuuvilwa vuvula mu vandu.

² Shia mundu wosi avoolelanga mureende wewe vuvehi; arumishilanga vupele mulilomoloma lielie khuvula khukhola kali mu mwoyo kwekwe.

³ Mwami Nyasaye, nzikombanga utivitsi lilomoloma liu vupele, vandu vichinjililanga mulilomoloma

⁴ nivavoola, “Khuliitsa khukuura mulilomoloma lieru, khuli ni minwa chiu khulomoloma, ni viina unyala khukhukaya?”

⁵ Navutswa Mwami Nyasaye avoolanga, “Lwa vandu vamanani vatambitswangwa, khandi vandu vavula khwavatiila valilanga, nzitsanga khwitsa, niitsa khuchila vamenye mu vulindi vulahi vwa valindililanga khunyola.”

⁶ Likhuva liu Mwami Nyasaye, ni likhuva liatoto; lili khuli ifetsa yasambwa mu mulilu kwi lijiko, yanihitswa hali saba.

⁷ Mwami Nyasaye, nuyaanza ukhulinde vulahi; nu khushinga khurula khu vandu vi likhula litamanu yili.

⁸ Vandu vatamanu vahuya huyanga shia havundu hosi; ni vitsominya vindu vitamanu via vandu vakholanga.