TSABURI 119 - IBIBILIA INDAKATIFU MU LUTIRICHI LWITAKHO NENDE LWISUKHAMalako ku Mwami Nyasaye 1 Vali ni ikhaavi vandu vavula vutamanu vwosi mu limenya liavo, vamenyanga khulondokhana khu malako ku Mwami Nyasaye. 2 Vali ni ikhaavi vandu valondanga mivaalo keke, vamukhavanga nu mwoyo kwosi, 3 valekhana nu vutamanu, navutswa vamenyanga khulondokhana khu lienya lielie. 4 Mwami Nyasaye, nivi wakhuha malako koko khukalonde nu mwoyo kwosi. 5 Nzikombanga khuva musuuvilwa lwa nondanga mivaalo koko! 6 Nalwo lwa nilivula khunyola tsisoni, nimenya khulondokhana khu malako koko. 7 Niitsa khukhwitsominya nindi nu mwoyo mulahi, lwa manyakhu shindu khu malako koko likhola liu vulunji. 8 Niitsa khulonda mivaalo koko; uvuli khunzivililakhu khali hati hene! Khulonda Malako ku Mwami Nyasaye 9 Ni shina shiu muyayi muvukha anyala khukhola khu amenye limenya lilahi? Nu khumenya khulondokhana khu likhuva liolio. 10 Njelitsanga khukhukhava nu mwoyo kwosi; unzikalile khukoyana mu malako koko! 11 Mali khuvikha likhuva liolio mu mwoyo kwanje, nikanyalikha mbuli khukhukholela vwoni. 12 Yivi Mwami Nyasaye, khutukha uheelwi vukhumi! Unzechitsi mechitso koko. 13 Ngalushilanga nimbola nu mwoyo mukali malako koosi ka wamba. 14 Nyanzililanga mu mivaalo koko, khuvira khuva ni miandu minyishi. 15 Niitsa khuparakhu mivaalo koko, khukhola ka wenyanga. 16 Niitsa khuyaanzilila mu mechitso koko; shinyala khwivilila likhuva liolio tawe. Vuyaanzi mu Malako ku Mwami Nyasaye 17 Mwami Nyasaye, kholela malahi, khu mbe mwoyo; nikanyalikha nonde mechitso koko. 18 Unzikule tsimoni tsianje, khu ndole, vindu viatoto viu khuchenyinya mu malako koko. 19 Ndi vutswa mundu mucheni mu shivala shinu; uvuli khumbisakhu malako koko. 20 Mwoyo kwanje kuminikhanga nu khwenya khumanya khumatukhu koosi mivaalo koko. 21 Nivi ukondeshelanga vandu vilola, valaamwa; vambakhananga khulonda malako koko. 22 Ukhole khuva muvoholole khurula mu lichaya nende manyeko, shichila nondanga mivaalo koko. 23 Khali niiva vimilili vikhalanga nivavoolelana khuli vanziira, inzi murumishi wowo nzitsanga khuparakhu mechitso koko. 24 Mivaalo koko nako kanyanzitsanga! Nako kakhonyanga inganakani. Vulamu mu Malako ku Mwami Nyasaye 25 Ndi himbi khukhutsa; umbonyinyi khuvirila mu likhuva liolio. 26 Lwa navoola havulavu ka nali nikholi, nivi wanjipa; unzechitsi mechitso koko. 27 Umbe limanya khulondokhana khu mechitso koko; ninzi mparekhu shindu khu vikholwa viovio viu khuchenyinya. 28 Ndi nu vuveleli mu mwoyo kwanje; ndinyilitsa khuvirila khu likhuva liolio! 29 Unzikalile khuvoola vuvehi; unzechitsi khulonda malako koko mu tsimbavasi tsiotsio. 30 Mali khurovola injila yatoto; mivaalo koko kali mu mwoyo kwanje. 31 Mwami Nyasaye, mbandanga khu mivaalo koko; undulitsi mu tsisoni! 32 Ndi nu mwoyo kukhweka shia shindu shiosi mu malako koko; shichila nivi uchilanga mba ni limanya linyishi. Lisaala liu Khwenya Khuva ni Limanya 33 Mwami Nyasaye, unzechitsi khuli nyala khulonda mechitso koko; nzililile khukalonda khutukha mulimalilikha. 34 Nzivaalilakhu shindu khu malako koko, kalonde; niitsa khukalonda nu mwoyo kwosi. 35 Unzimilile mu likhola khuli malako koko kenyanga, shichila ka nombanga mba nu vuyaanzi. 36 Umbe lienya liu khulonda malako koko, khuvira khuva ni miandu. 37 Unzikalile khukorela khu vindu vi shikhaya; ukholele malahi khuvirila mu lira liolio. 38 Ndweshitsila inzi murumishi wowo lilako liolio, lia walaaka khukholela vandu vakhuheetsanga luyali. 39 Undulitsi mu manyeko ka naria; shichila mivaalo koko ni malahi! 40 Nzikombanga khulonda mechitso koko; umbe vulamu vuyia, shichila likhola liolio liu vulunji. Khusuuvilila mu Malako ku Mwami Nyasaye 41 Mwami Nyasaye, manyinya vuyaanzi vwovwo, umbonyinyi khuli walaaka uliitsa khumbonyinya. 42 Nalwo lwa niitsa khuchipa vandu vanyekanga shichila suuvililanga mu likhuva liolio. 43 Ukhonye nomolome katoto khumatukhu koosi, shichila lisuuvilitswa lianje lili mu mivaalo koko. 44 Natsililila khuhulishitsa malako koko, mihika ni mihika. 45 Niitsa khumenya mu vuvoholole vwatoto, shichila njelitsanga khulonda mechitso koko. 46 Niitsa khuvoolela vami malako koko, khali mbuli khunyola tsisoni. 47 Nayaanzilila khulonda malako koko, shichila nakayaanza. 48 Mbetsanga malako koko ka nayaanza luyali, khali mparakhu mivaalo koko. Lisuuvilitsa mu Malako ku Mwami Nyasaye 49 Witsushitse lilaaka lia walaaka inzi murumishi wowo; lilaaka lichilanga nimba ni lisuuvilitswa. 50 Khali nindi mu vutiinyu neminywangwa mwoyo, shichila lilaaka lia wamba lichilanga nimba mwoyo. 51 Vandu vilola vamenya nivanjayanga, navutswa shili khwambakhanakhu khulonda malako koko. 52 Mwami Nyasaye, ninganakanakhu mivaalo koko khurula khale, inzi mwene nzileminyanga mwoyo. 53 Vurima vululu muno vungumilanga, nindoli vandu vatamanu ni vamenekanga malako koko. 54 Mechitso koko nako kali khuli tsinyimbo tsianje, mumatukhu mati ka ndi mwoyo khulilova khunu. 55 Mwami Nyasaye, nzitsushitsanga lira liolio khali mu vutukhu, ninonda malako koko. 56 Nivi wangasitsa, shichila nondanga mechitso koko. Khwihaana Khulonda Malako ku Mwami Nyasaye 57 Mwami Nyasaye, nivi wa nzikombanga wonyene; ndakanga nalonda makhuva koko. 58 Khureevanga nu mwoyo kwosi umbele tsimbavasi, khuli walaaka ulakholela. 59 Mali khukanakanakhu shindu khu kakholanga mu liiva lianje, ngalushi khulonda mivaalo koko. 60 Kholanga vwangu vuchila khucheleva, khutsililila khulonda malako koko. 61 Khali niiva vandu vatamanu vandekanga ni mireeko, navutswa shinyala khwivilila malako koko tawe. 62 Muvutukhu hakari mbukhanga mu tsindolo khukhwitsominya, shichila mivaalo koko ku vulunji. 63 Ndi mulina wa vandu voosi vakhuheetsanga luyali, wa yavo valondanga mechitso koko. 64 Mwami Nyasaye, lilova liayitsula vuyaanzi vwovwo; unzechitsi mechitso koko. Vulahi vwa Malako ku Mwami Nyasaye 65 Mwami Nyasaye, ukholele inzi murumishi wowo malahi, khuli lwa wali nu walaaka uliitsa khumukholela. 66 Umbe vusitsa nende vucheli, shichila suuvilanga mu malako koko. 67 Nishili khusalilitswa, nali nanala khukhola vutamanu, navutswa nunundi nondanga likhuva liolio. 68 Nivi mulahi, khandi kukholanga ni malahi; nzechitsa khuli nyala khulonda mechitso koko. 69 Khali niiva vandu vilola valambolela vuvehi, nzilililanga khulonda nu mwoyo kwosi mivaalo koko. 70 Vayitsula likhola liu vuyiingwa mu mioyo chiavo, navutswa nyanzililanga mu malako koko. 71 Nali nu vukhala lwa nasalilitswa, shichila kanomba khweka mechitso koko. 72 Malako ka wamba kali nu vukhonyi khwinzi, khuvira vunyishi vwi ifetsa nende itsahabu. Malako ku Mwami Nyasaye ni ku Vulunji 73 Nivi wanoonga na makhono koko; umbe limanya, nikanyalikha manye malako koko. 74 Yavo vakhuheetsanga luyali valiitsa khusangala nivandoli, shichila ndi ni lisuuvilitswa mu likhuva liolio. 75 Mwami Nyasaye, manyi ndi ukhalachilanga vandu khuvirila mu vulunji, khandi wasalilitsa shichila uli musuuvilwa. 76 Lekha vuyaanzi vwovwo vuneminyi mwoyo; khuli lwa wandaka inzi, uli murumishi wowo. 77 Mbela tsimbavasi, nikanyalikha mbe mwoyo; shichila nyanzililanga mu malako koko. 78 Vandu vilola vanyole tsisoni, shichila vanyashitsanga vuchila shivune shiosi; navutswa khulwanje naparakhu mivaalo koko. 79 Vandu vakhuheetsanga luyali vakalushi khwinzi, vamanye khuli vanyala khulonda mivaalo koko. 80 Nzikombanga khulonda mechitso koko munjila yatoto, nikanyalikha mbuli khunyola tsisoni! Lisaala liu Khwenya Khuhonyinywa 81 Mwami Nyasaye, mbwele tsingulu ninindililanga umbonyinyi; mbikhanga lisuuvilitswa lianje mu likhuva liolio. 82 Khayilwi khulola ninindililanga shia walaaka ulamba. Ndevanga, “Ni litukhu shina lia uliitsa khwitsa ukhonye?” 83 Khali niiva ndi khuli liseelo li idivai liu mwooshi kwatuumakhu; shili khwivililakhu mechitso koko. 84 Nu luhono shina lwa inzi murumishi wowo nzililila khulindilila? Ni litukhu shina lia uliitsa khusalilitsa vandu vandambitsanga? 85 Vandu vilola vanzeveela vwina ngwimu, vandu valekhana na malako koko. 86 Malako koko koosi ni ku khusuuvilwa; ukhonye, shichila vandu vandambitsanga vuchila shivune shiosi. 87 Vali nivali himbi khunziira, navutswa shili khwivililakhu mivaalo koko 88 Umbe vulamu shichila vuyaanzi vwovwo vwi mihika ni mihika, nikanyalikha nonde mechitso koko. Suuvila mu Malako ku Mwami Nyasaye 89 Mwami Nyasaye, likhuva liolio lihindilanga mihika ni mihika; liasimiikhwa mwikulu. 90 Vusuuvilwa vwovwo vuliho khu likhula liosi; nivi wasinjilitsa lilova mu makono kalio, nalio litsilililanga khuvaho. 91 Malako koko kashiliho nunundi, shichila vindu viosi vikhurumishilanga yivi. 92 Niiva malako koko kakhavuli khunyanzitsa, khani nakhutsila mu vutiinyu vwanje. 93 Mbulakhu khuli niitsa khwivilila mivaalo koko, shichila wachila ndi mwoyo khuvirila muko. 94 Ninzi wowo -- umbonyinyi! Njelitsanga khuli nyala khulonda malako koko. 95 Vandu vatamanu vangonekhanga khundivitsa, navutswa nzitsanga khuparakhu mechitso koko. 96 Manyi vulahi ndi shia shindu shiosi shilitsa khutukha khushihakamo; navutswa malako koko ni maseletse. Khuyaanza Malako ku Mwami Nyasaye 97 Nayaanza muno malako koko! Nako kamparakhu khulitukhu liosi. 98 Malako koko kachilanga mba nu vusitsa vunyishi khuvira vatsiku vaanje, shichila namenya nako khumatukhu koosi. 99 Ndi ni limanya linyishi khuvira veechitsi vaanje voosi; khali mivaalo kaanje nako kamparakhu. 100 Ndi ni limanya linyishi khuvira vasakhulu, shichila nondanga malako koko. 101 Nalekhana nu mwiima mutamanu, shichila nyenyanga nonde likhuva liolio. 102 Shili khwambakhanakhu mivaalo koko, shichila nivi mwene wanzechitsa. 103 Mechitso koko ni malahi khwinzi, ni malahi muno khuvira vushi vwi tsinzushi. 104 Nyolanga vusitsa khurula mu malako koko; khulwa yako, nayambakhana mwiima mutamanu. Malako ka Nyasaye Kahaananga Vulavu 105 Likhuva liolio lili khuli itaaha yu khunzimilila, khuli vulavu munjila yanje. 106 Niitsa khurweshitsa ka nalaaka, niitsa khulonda mivaalo koko ku vulunji. 107 Mwami Nyasaye, nyakhananga vululu muno; umbe vulamu, khuli lwa walaaka ulamba. 108 Mwami Nyasaye, uhuchilile lisaala lianje liu khusanditsa, unzechitsi mivaalo koko. 109 Khali niiva vulamu vwanje vuli mu maraava shia litukhu, mbulakhu khuli nyala khwivilila malako koko. 110 Vandu vatamanu vandeka nu mureeko, navutswa shili khwambakhanakhu malako koko. 111 Mechitso koko kali mwinzi mihika ni mihika; nako kanyanzitsanga mu mwoyo. 112 Ndovole khulonda mechitso koko khutukha khulitukhu lia niitsa khukhutsa. Vulindi Vulahi mu Malako ku Mwami Nyasaye 113 Nayambakhana vandu vahaya hayanga shichila yivi, navutswa nayaanza malako koko. 114 Yivi uli khuli shivisilu shianje nende ingavo yanje; ndi ni lisuuvilitswa mu likhuva liolio. 115 Munyi vandu vooni, mulekhane ninzi, nikanyalikha nonde malako ka Nyasaye wanje. 116 Mbe tsingulu, khuli lwa wali nu walaaka, mbe mwoyo; mbuli khunyolakhu tsisoni mu lisuuvilitswa lianje. 117 Uninde vulahi, menye mu vulindi vulahi, khali nzililile khuhulishitsa mivaalo koko. 118 Nivi wambakhana vandu vambakhananga khulonda mivaalo koko; vupele vwavo nu vwi shikhaya. 119 Vandu vatamanu voosi khulilova vali khuli indakala khu yivi; khulwa yako, nayaanza mivaalo koko. 120 Mmbili kwanje kutechelanga shichila nakhuria yivi; khali naria lwa ukhalachilanga vandu. Nalonda Mechitso ku Mwami Nyasaye 121 Mali khukhola katoto khandi likhola liu vulunji; lekha khunzivala mu vatsiku vaanje. 122 Uninde vulahi vwene inzi murumishi wowo, uvuli khuha vandu vilola vwiyangu vukhundambitsa. 123 Khayilwi khulola shichila ninindililanga umbonyinyi, khurweshitsa lilaaka liolio lia walaaka khuvirila khu likhola liu vulunji. 124 Ukholele ka inzi murumishi wowo nyenyanga shichila vuyaanzi vwovwo vwi mihika ni mihika, unzechitsi mechitso koko. 125 Ninzi murumishi wowo; umbe limanya, nikalikha manye mechitso koko. 126 Mwami Nyasaye, ukholekhu shindu isaa yinu, shichila vandu vameneka malako koko. 127 Nayaanza muno malako koko khuvira itsahabu, khali khuvira itsahabu indahi yene. 128 Khulwa yako, nondanga mivaalo koko koosi; shinayaanza khukhola vindu vitamanu tawe. Nzikombanga Khulonda Malako ku Mwami Nyasaye 129 Mechitso koko nu ku khuchenyinya; kalondanga nu mwoyo kwosi. 130 Khwivaala khwi likhuva liolio khuhaananga vulavu; khuchilanga vandu vakorwa shindu vanyola limanya. 131 Neselananga ning'avuli munwa, shichila nzikombanga khumanya malako koko. 132 Ngalushila khali undolele tsimbavasi, khuli wu kholelanga yavo voosi vakhuyaanza. 133 Unzimilile mbuli khukwa, khuli lwa walaaka; vutamanu vuvuli khunzamiha. 134 Mbonyinya khurula mu vandu vandambitsanga, nikanyalikha nonde malako koko. 135 Ungasitsi inzi murumishi wowo, unzechitsi malako koko. 136 Tsimoni tsianje tsichetulukhanga miliika khuli muchela, shichila vandu vayambakhana khulonda malako koko. Malako ku Mwami Nyasaye ni Katoto 137 Mwami Nyasaye, nivi wi likhola liu vulunji, malako koko ni katoto. 138 Malako ka wahaana ni ki likhola liu vulunji; kanyala khusuuvilwa. 139 Ndi nu vurima vululu mwinzi khuli mulilu, shichila vatsiku vaanje vayivilila makhuva koko. 140 Lilaaka liolio liachelitswa vulahi; khali inzi murumishi wowo naliyaanza. 141 Khali niiva mbula vukhonyi khali njaywangwa, shinyala khwivililakhu mechitso koko tawe. 142 Vulunji vwovwo nu vwi mihika ni mihika, khali malako koko ni katoto. 143 Vutiinyu nende liheenda mwoyo viangwila, navutswa malako koko nako kambetsanga vuyaanzi. 144 Mivaalo koko ni ku vulunji mihika ni mihika; umbe limanya nikanyalikha nzililile khuva mwoyo. Lisaala liu Khureeva Khuhonyinywa 145 Khulililanga nu mwoyo kwosi; Mwami Nyasaye, unjipi, saalanga khu yivi nu mwoyo kwanje kwosi ukhonye, manonde malako koko. 146 Khulililanga, nuyaanza umbonyinyi; nikanyalikha nonde mivaalo koko. 147 Liuva nilishili khwakha saalanga khu yivi ukhonye; mali khura lisuuvilitswa lianje mu makhuva koko. 148 Ndeminyanga tsimoni tsianje mu vutukhu vwosi, nikanyalikha mbe nimparakhu lilako liolio. 149 Mwami Nyasaye, shichila vuyaanzi vwovwo vwi mihika ni mihika, umbulili; umbonyinyi khuvirila mu vwatoto vwovwo. 150 Vandu venyanga khunyashitsa vuchila shivune shiosi visuundanga himbi khwinzi, vayambakhana khulonda malako koko. 151 Navutswa Mwami Nyasaye, nivi uli himbi khwinzi, malako koko koosi ni katoto. 152 Khurula khale, nayeka khurula mu mivaalo koko; ka walomba khuvaho mihika ni mihika. Khwenya Nyasaye Akhonye 153 Lolakhu khuli nyakhananga, umbonyinyi, shichila shili khwambanakhu khulonda malako koko. 154 Ulinde vulamu vwanje, ukhole khuva muvoholole; umbonyinyi, khuli yivi mwene walaaka. 155 Vandu vatamanu valiitsa khuvula khuhonyinywa, shichila vayambakhana khulonda malako koko. 156 Navutswa Mwami Nyasaye, nivi uli ni tsimbavasi tsinyishi; undolele tsimbavasi, umbonyinyi! 157 Ndi na vatsiku vanyishi vanyashitsanga, navutswa shili khulekhakhu mivaalo koko. 158 Sinyishilanga vandu vambakhana khuva vasuuvilwa, shichila vayambakhana khulonda malako koko. 159 Mwami Nyasaye, lolakhu khuli nayaanza mivaalo koko! Ulinde vulamu vwanje, shichila vuyaanzi vwovwo. 160 Makhuva koko koosi ni katoto; mivaalo koko koosi ni katoto, khali kaliho mihika ni mihika. Khuyaanza Khulonda Malako ku Mwami Nyasaye 161 Vamihi vanyashitsanga vuchila shivune shiosi, navutswa khuheetsanga luyali shichila likhuva liolio. 162 Nzikhoyanga shichila likhuva liolio, khuli mundu uyaayanga miandu minyishi. 163 Nayambakhana vuvehi vwosi khandi vuvehi vwasiinya, navutswa nayaanza malako koko. 164 Khwitsominyanga hali saba khulitukhu, shichila malako koko ni ki likhola liu vulunji. 165 Vandu vayaanza malako koko vali ni milembe chiatoto; shindu shivulakhuho shinyala khuvisikaritsa. 166 Mwami Nyasaye, nivi wa nindililanga umbonyinyi, ndweshitsanga malako koko. 167 Nondanga mechitso koko; nakayaanza nu mwoyo kwanje kwosi. 168 Nondanga malako koko nende mivaalo koko; wamanya shia shindu shiosi shia kholanga. Lisaala liu Khwenya Khukhonywa 169 Mwami Nyasaye, khulila khwanje khukhutushili! Umbe limanya, khuli lwa yivi mwene walaaka. 170 Uhulishitsi lisaala lianje, umbonyinyi khuli walaaka uliitsa khumbonyinya. 171 Niitsa khukhwitsominya khumatukhu koosi, shichila unzechitsanga mechitso koko. 172 Niitsa khukhwimbila lwimbo khu malako koko, shichila malako koko ni ki likhola liu vulunji. 173 Wirecheshe shia khase khosi khukhonya, shichila nondanga malako koko. 174 Mwami Nyasaye, nivi wa nindililanga umbonyinyi, khali nyanzililanga mu malako koko. 175 Lekha mbe mwoyo, nikanyalikha khwitsominyi yivi; lekha mivaalo koko kakhonye. 176 Mbaya hayanga iyi neyo khuli likondi liakora; ukhave inzi murumishi wowo, shichila shili khwivililakhu malako koko. |
© The Bible Society of Kenya, 2013
Bible Society of Kenya