TSABURI 113 - IBIBILIA INDAKATIFU MU LUTIRICHI LWITAKHO NENDE LWISUKHA

Khwitsominya Mwami Nyasaye

¹ Mwami Nyasaye yitsominywi! Munyi varumishi vu Mwami Nyasaye, mwitsominye lira lielie!

² Lira lielie litsominywi, khuraanjila nunundi khandi mihika ni mihika.

³ Lira liu Mwami Nyasaye litsominywi khurula lwa liuva lisenukhanga khutukha lwa liyeelanga.

⁴ Mwami Nyasaye neye wamihanga vandu vi tsimbia tsiosi; vukhumi vwevwe vwalanda khuvira likulu.

⁵ Ni viina uli khuli Mwami Nyasaye, uli Nyasaye weru, wikhalanga ikulu khu shisoko ihale wene,

⁶ navutswa aheenzanga hasi, khulola likulu nende lilova.

⁷ Achinguulanga vamanani khurula mu vumanani; akhonyanga vandu vavula khwavatiila khurula mu vutiinyu vwavo;

⁸ nu khuvakhola khusanga na vimilili; halala na vimilili vimililanga vandu veve.

⁹ Neye uchilanga mukhali mukuumba nava nu luyali hango hehe; amukhola khuva nu vuyaanzi lwa yivula vaana. Mwami Nyasaye yitsominywi!