TSABURI 112 - IBIBILIA INDAKATIFU MU LUTIRICHI LWITAKHO NENDE LWISUKHA

Mundu Mulahi Akholanga Vindu Yivi Mayaanza

¹ Mwami Nyasaye yitsominywi! Ali ni ikhaavi mundu uheetsanga Mwami Nyasaye luyali, wayaanzilila nu mwoyo kwosi khulonda malako keke.

² Vitsukhulu veve valiitsa khuva nu vunyali vunyishi mu shivala; vandu vi likhula lia vandu valahi valiitsa khukasitswa.

³ Vandu vi inzu yeye valiitsa khuva ni miandu nende vuhinda; aliitsa khuva nu vuhinda mihika ni mihika.

⁴ Mundu mulahi yashitsilwangwa vulavu mu shisuundi, neye ulolelanga vandi tsimbavasi, nu muhonjelu khandi wi likhola liu vulunji.

⁵ Ali ni ikhaavi mundu ulolelanga vandu mwoyo mulahi nu khuvikopitsa tsisenti, wu kholanga mihinzilu chiechie munjila indahi.

⁶ Ni kilikali, mundu wi likhola liu vulunji aliitsa khuvula khukuurwa; aliitsa khwitsushitswa mihika ni mihika.

⁷ Avulakhu liaritsanga khali nakwili mu maraava, lisuuvila lielie ni li tsingulu, wasuuvilila mu Mwami Nyasaye.

⁸ Lisuuvilitsa lielie ni li tsingulu, avulakhu shia yaria; nikhali khulola vatsiku veve nivamali khukuurwa.

⁹ Akhonyanga vamanani nu mwoyo mulala, likhola lielie liu vulunji liliho mihika ni mihika; aliitsa khuva ni tsingulu khandi aheelwi luyali.

¹⁰ Vandu vatamanu valolanga kenako ma vitsula vurima; valolanga vutamanu, nivakhutsa mwoyo; lisuuvilitswa liavo liliitsa khuva li shikhaya.