TSABURI 110 - IBIBILIA INDAKATIFU MU LUTIRICHI LWITAKHO NENDE LWISUKHA

Mwami Nyasaye Ahaananga Tsingulu tsiu Khukuura

¹ Mwami Nyasaye yavoolela mwami wanje, “Yikhala khuluveka lu mukhono kwanje musatsa khutukha lwa nduvachila hasi vatsiku vovo voosi.”

² Mwami Nyasaye aliitsa khuvambalitsa vwami vwovwo khuraanjila Sayoni; uliitsa khwamiha vatsiku vovo voosi.

³ Vandu valiitsa khwirulitsa khutsia vene, khulitukhu lia uliitsa khukwana vatsiku vovo. Vayayi vovo vavukha valiitsa khukhwitsila khu vikulu vitakatifu, khuli liime lilolekhanga mu mavwevwe.

⁴ Mwami Nyasaye umali khukhwisuuhila, shianyala khukalukhana inganakani yeye tawe: “Uliitsa khuva musalisi mihika ni mihika, khuli Melekizedeki.”

⁵ Mwami Nyasaye ali khuluveka lu mukhono kwokwo musatsa; lwa aliitsa khwitsula vurima aliitsa khumulula vami voosi.

⁶ Aliitsa khukhalachila vandu vi tsimbia tsindi tsiosi, khandi aliitsa khulomba vandu vanyishi khukhutsila havundu havakwanilanga yaho; aliitsa khukuura vami voosi vamihanga shivala.

⁷ Mwami aliitsa khung'wa matsi khurula mu muchela kuli himbi khu muhaanda, manyole tsingulu; khulwa yako aliitsa khunyola luyali, shichila wakuura vatsiku veve.