TSABURI 109 - IBIBILIA INDAKATIFU MU LUTIRICHI LWITAKHO NENDE LWISUKHAKhulila khu Mundu Uli mu Vutiinyu 1 Nyasaye, nivi wa nzitsominyanga; nuyaanza uvuli khuhonjela! 2 Vandu vatamanu nende vakaati vangwananga, valomolomanga vuvehi khwinzi -- 3 khandi vavoolanga vindu vitamanu khwinzi, vangwananga vuchila shivune shiosi. 4 Khali nikava nali navayaanza, vanzaala, khali nivasaalila. 5 Vambanzila vutamanu khu vulahi, khali nivakholela vutsiku khu vuyaanzi vwanje. 6 Rovola mukhalachi mutamanu khukhalachila vatsiku vanje; lekha mulala khu vatsiku amuhile mushiina. 7 Namali khukhalachilwa, anyoleshe nu vutamanu; khali lisaala lielie linyolekhane khuva vwoni! 8 Nzikombanga ndi ave nakhutsanga vwangu yuvu; mundu wundi avukule muhinzilu kwekwe! 9 Khali vaana veve vave vavisandu, mukhali wewe ave mukhutsakhali! 10 Nzikombanga ndi vaana veve vahuyahuyi nivasava shia valia; vakhunganyinywi khurula mu tsinzu tsiavo tsiapomolanyinywa! 11 Vandu vamwikopitsa shindu vamunuuli miandu chiechie; khali vandu vacheni vamuyaaye murungu kwekwe. 12 Nzikombanga ndi avuli khuva nu mundu uliitsa khumulolela malahi, inoho khulinda vaana veve vavisandu! 13 Vitsukhulu veve voosi vave nivativitswangwa, mira kavo karulitswi mu vandu vi likhula lilondakhu! 14 Mwami Nyasaye atsililile khwitsushitsa vwoni vwa vakuuka veve khandi avuli khusameha vwoni vwa mama wewe. 15 Mwami Nyasaye atsililile khwitsushitsa vwoni vwavo, nu khuvativitsa khurula khulilova. 16 Mundu mwenoyo yambakhanila vandi malahi; navutswa yatambitsa vamanani nende vavula khwavatiila khali niyiira vandu vateteshele. 17 Yali wayaanza khulaama -- khutukha alaamwi! Yali wayambakhana khukasitsa vandi -- khutukha avuli khukasitswa! 18 Yali wanala khulaama khuli ni inguvu yu khwifwala, leshi vilaamo vievie vimutsinzivitse khuli matsi, vinjile mu vikuumba vievie khuli makura! 19 Vilaamo vimukhunishi khuli ni inguvu, vimuvotokhane shia khase khosi khuli lukhanda lu mu shisiindi. 20 Yivi Mwami Nyasaye, nu vulahi khuvanzila munjila yeneyo yavo vanzaalanga -- yavo valomolomanga vindu vitamanu khwinzi! 21 Navutswa yivi Mwami Nyasaye, uli Nyasaye wanje, ukhonye khulu khuha lira liolio luyali; umbonyinyi shichila vulahi vu vuyaanzi vwovwo! 22 Ndi mundu mumanani khandi mbula khwandilakhu, khali nyakhananga vululu muno mu mwoyo kwanje. 23 Khaamanga khuli shinini shia halukolovo; ndi khuli isichi yu vushindu vuhuutsanga. 24 Masikamo kaanje kateteshela lwa mbonganga vuchila khulia; nang'aha narikala vutswa makuumba. 25 Nakwa shindu shiu khukholelwa shihenye henye na vandu; nivandolikhu ni tsimoni tsiavo, vanuyanga mirwi chiavo. 26 Yivi Mwami Nyasaye, uli Nyasaye wanje, ukhonye; shichila vuyaanzi vwovwo nu vwi mihika ni mihika, nu vulahi khumbonyinya. 27 Lekha vandu vamanye ndi nivi warumishila tsingulu tsiotsio, Mwami Nyasaye, nivi wakhola kenako. 28 Vanyala khunaama, navutswa nivi ungasitsa. Lwa vangwana, vanyole tsisoni, inzi murumishi wowo sangale. 29 Nzikombanga ndi vatsiku vaanje vaheenditswi mwoyo; vanyole tsisoni khuli vifwalanga tsinguvu. 30 Niitsa khusanditsa Mwami Nyasaye khuvirila mu makhuva kaanje; niitsa khumwitsominyila mu shikhaalo shia vandu vanyishi, 31 shichila neye ukhonyanga mumanani, amuhonyinyanga khurula khu vandu vamukhalachilanga likhutsa. |
© The Bible Society of Kenya, 2013
Bible Society of Kenya