TSABURI 107 - IBIBILIA INDAKATIFU MU LUTIRICHI LWITAKHO NENDE LWISUKHA

SHITABU SHIA KHARANU ( Tsab 107—150 ) Khwitsominyi Vulahi vwa Nyasaye

¹ Khusanditsi Mwami Nyasaye, lwa ali mulahi; shichila vuyaanzi vwevwe nu vwi mihika ni mihika.

² Kalushili makhuva kenako khwitsominya Mwami Nyasaye, munyi voosi vayahonyinya. Nivi wamuhonyinya khurula khu vatsiku venyu,

³ nu mukalushitsa khurula mu vivala vicheni khurula khuluveka luli ivukwi nende imbo, khurula ivuluka nende ikuvanda.

⁴ Valala khuvo vahuya huyanga shia havundu hosi mu shiangalangwi shia vambalala, vuchila khunyola injila inyala khuvatushitsa mu litaala likali lia vamenyamu.

⁵ Vali ni inzala nu vuluhu manivakoritsa lisuuvilitswa liavo liosi.

⁶ Nalwo lwa valila tsikhwili khu Mwami Nyasaye nivali mu vutiinyu, navakhonya khurula mulinyakhana liavo.

⁷ Yavimilila khunjila inunji khutsia khutukha mu litaala likali lia vamenyamu.

⁸ Leshi vasanditsi Mwami Nyasaye shichila vuyaanzi vwevwe nu vwi mihika ni mihika, shichila wa vakholela vindu viu khuchenyinya.

⁹ Yikuritsanga yavo vali nu vuluhu nu khuha vandu vali ni inzala vindu vilahi.

¹⁰ Valala vamenyanga mu shisuundi shiamwama muno, vavohe nivanyakhana nivali mu minyololo,

¹¹ shichila vahinganyinya malako ku Mwami Nyasaye khandi vali vambakhane khulonda mivaalo keke.

¹² Vali vavwa tsingulu shichila muhinzilu mulitoho; khali vakwitsanga hasi, shivali nu mundu unyala khuvavushitsa tawe.

¹³ Valila tsikhwili khu Mwami Nyasaye nivali mu vutiinyu, navahonyinya khurula mulinyakhana liavo.

¹⁴ Yavarulitsa mu shisuundi shiamwama shia valimu navavoholola khurula khu minyololo.

¹⁵ Khutukha vasanditsi Mwami Nyasaye shichila vuyaanzi vwevwe vwi mihika ni mihika, khandi shichila vindu viu khuchenyinya via yakhukholela.

¹⁶ Apomolanga miliango chialombwa khu mukasa nu khumeneka milondi chialombwa khu shivia.

¹⁷ Valala khuvo vali vayiingwa, nivanyakhana shichila vwoni vwavo, khandi shichila vindu vitamanu viavo.

¹⁸ Shiukhulia shia vahuunyilanga likuundu, khandi nivava himbi khukhutsa.

¹⁹ Valila tsikhwili nivali mu vutiinyu khu Mwami Nyasaye, navahonyinya khurula mulinyakhana liavo.

²⁰ Yalomoloma likhuva nivahona; yavahonyinya khurula mu likhutsa.

²¹ Nu vulahi vo khusanditsa Mwami Nyasaye shichila vuyaanzi vwevwe vwi mihika ni mihika, khandi shichila vindu viu khuchenyinya via yavakholela.

²² Nu vulahi khumukholela misango chiu khusanditsa, nu khumwimbila tsinyimbo tsiu vuyaanzi khwitsominya ka yavakholela.

²³ Vandu valala velemela mu tsimeli khu inyanza, nivakhavanga khuli vanyola shiukhulia mu matsi kenako.

²⁴ Valola vikholwa viu Mwami Nyasaye, vikholwa vievie viu khuchenyinya mu inyanza.

²⁵ Yalomoloma, imbuutsa inditoho nihuutsa, khali maruundu mu inyanza nikaraanga khuhilila.

²⁶ Tsimeli tsiachinguulwa ikulu mu vushindu matsiyinikha mu luliiva lu mu inyanza. Maraava khuli kenako kachila vandu nivakoritsa ikholo;

²⁷ visikarila nivachenda nivakoyana khuli vandu vatandi vucheli vwavo vukhwelema khu matsi nuvuva vwa vutswa.

²⁸ Valila nivali mu vutiinyu khu Mwami Nyasaye, navahonyinya khurula mulinyakhana liavo.

²⁹ Yasinjilitsa imbuutsa inditoho yahuutsanga; ma maruundu nikahonjela.

³⁰ Vasangala shichila imbuutsa yeneyo yasinjila manavimilila vulahi khutsia khutukha havundu ha imeli yasinjila ha venyanga.

³¹ Valasanditsa Mwami Nyasaye shichila vuyaanzi vwevwe vwi mihika ni mihika, shichila wa vakholela vindu viu khuchenyinya.

³² Nu vulahi khulanditsa makhuva khu vunyali vwevwe mu mukaanda kwa vandu, nu khumwitsominyila imbeli wi Shikhaalo shia vimilili va vandu.

³³ Mwami Nyasaye yakhaaminya matsi mu michela nasinjilitsa virula khuvula khukholomokha.

³⁴ Yalomba shivala shinuulu khukwa shiangalangwi shiu munyu; shichila vandu vamenyamu vakhola vindu vitamanu.

³⁵ Yakalukhanyinya shiangalangwi nishiva na matsi khandi shivala shiumakana nishiva ni tsisieveye tsia matsi.

³⁶ Yalomba vandu vali ni inzala khumenyamu, nivumbakha litaala likali liu khumenyamu.

³⁷ Varaaka viraakwa mu milimi chiavo nivaraaka misala chi misabibu, nivanyola lichesa linyishi muno.

³⁸ Yakasitsa vandu veve, manivivula vaana vanyishi muno; yalomba tsing'ombe tsiavo khwivulana mu vunyishi.

³⁹ Lwa vandu va Nyasaye vakuurwa khandi nivalechelitswa, nu khutambitswa khandi khunyashitswa vululu muno,

⁴⁰ yanyashitsa vandu va vatambitsanga navalomba khuhuya huya mu shiangalangwi shia vambalala.

⁴¹ Navutswa yakhonya vandu vamanani khurula mu vutiinyu vwavo, nalomba vandu vavo khwivula vaana vanyishi khuva khuli shiayo shia makondi.

⁴² Vandu vi likhola liu vulunji valolanga kenako nivasangala, navutswa vandu vatamanu vavula shia vanyala khuvoola.

⁴³ Yavo vali nu vusitsa vakanakane shindu khu vindu vienevo; vamanye vuyaanzi vwi mihika ni mihika vu Mwami Nyasaye.