TSABURI 105 - IBIBILIA INDAKATIFU MU LUTIRICHI LWITAKHO NENDE LWISUKHA

Nyasaye Ahonyinyanga Vandu Veve

¹ Musanditse Mwami Nyasaye, landitsili vandu vikholwa vievie vi tsingulu; vooleli vandu vi tsimbia tsindi ka yakhola.

² Mumwimbile, mumwimbile tsinyimbo tsiu khwitsominya; numuvoola makhuva shichila vikholwa vievie viu khuchenyinya!

³ Musangale khuvirila mu lira lielie litakatifu; vandu vakhavanga Mwami Nyasaye khutukha vikhoye.

⁴ Mukhave Mwami Nyasaye khu muve ni tsingulu; mutsililile khumukhava shia khase khosi!

⁵ Mwitsushitse vikholwa viu khuchenyinya via yakhola, viloleshitsu vievie, khandi khuli yakhalachila vandu.

⁶ Munyi vitsukhulu va Aburahamu, murumishi wewe; munyi vitsukhulu va Yakobo, vandu veve va yarovola!

⁷ Neye Mwami Nyasaye, uli Nyasaye weru; malako keke kali khu vilombe viosi mu shivala.

⁸ Yitsushitsanga lilakano lielie mihika ni mihika, khali lilaaka lielie khu vandu vu likhula linyishi;

⁹ lilakano lia yakhola na Aburahamu ka yali ni yalaaka aliitsa khurweshitsila Isaka.

¹⁰ Mwami Nyasaye yarweshitsila Yakobo lilaaka lielie khuli ni lilako, niliva khuli lilakano li mihika ni mihika khu Israeli.

¹¹ Yavoola, “Niitsa khukhuha shivala shia Kanaani; shiliitsa khuva shioshio shiu khumenyamu.”

¹² Lwa vandu va Nyasaye vali isavu indititi, va vandu vali nivakorwa; vacheni mu shivala shia Kanaani,

¹³ vahuya huyanga khurula mu shivala yishi khutsia mu shindi, khurula mu vwami vulala khutsia mu vundi,

¹⁴ navutswa yikalila shia mundu wosi khuvanyashitsa; yakondeshela vami shichila vo,

¹⁵ navoola, “Muvuli khusalilitsa varumishi vaanje va navekha makura; muvuli khutiilakhu khu vaprofeti vaanje.”

¹⁶ Mwami Nyasaye yalera inzala mu shivala shiavo; khali niyononyinya shiukhulia shiavo.

¹⁷ Navutswa yaruma mundu khutsia imbeli wavo, walaangwangwa Yosefu, wali niyakuulitswa khuli murukwa.

¹⁸ Vavoha vilenje vievie ni minyololo; nivafwala mwing'ori mwemwe lukhanda lwi shivia;

¹⁹ khutukha ka yali niyaprofeta karweshitswi. Likhuva lia Nyasaye lialolekha khuva liatoto.

²⁰ Mwami wa Misri yahaana lilako navohololwa; mwamihi wa vandu yamukhola khuva vavoholole.

²¹ Mwami wa Misri yamuha vunyali vu khusinjilila inzu yeye, khali vu khwamiha miandu chiechie chiosi;

²² khuvoolela varumishi veve muhinzilu ku khukhola, nu vunyali vukhuvoolela vandu vamukhonyanga inganakani ku khukhola.

²³ Nalwo lwa Israeli yinjila mu shivala shia Misri; Yakobo nava mundu mucheni mu shivala shia Hamu.

²⁴ Mwami Nyasaye yachila vandu veve nivivula vaana mu vunyishi; navakhola khuva ni tsingulu tsinyishi khuvira vatsiku vavo.

²⁵ Yachila Vamisri nivahima vandu veve; khali nivavukula varumishi veve khuvirila mu vupeele.

²⁶ Yaruma murumishi wewe Musa, halala na Haruni, wa yali niyarovola.

²⁷ Vakhola vikholwa via Nyasaye viu khuchenyinya muvo, khali viloleshitsu mu shivala shia Misri.

²⁸ Nyasaye yaruma shisuundi, shivala nishimwama; navutswa vamuhinganyinya.

²⁹ Yakhola matsi kavo nikakwa masahi, khali namulula tsisutsi tsiavo tsiosi.

³⁰ Tsing'alo tsiali tsinyishi mu shivala shiavo, khali inzu yu vwami yitsula tsing'alo.

³¹ Yalomoloma, khali tsinji nende tsisuna nitsiva tsinyishi shia havundu hosi mu shivala shiavo.

³² Nyasaye yakhuvitsa imbula ya machina khuva imbula yavo; luheni lwahemukhanga shia havundu hosi mu shivala shiavo.

³³ Yononyinya misabibu nende mikhuyu chiavo; khali narinyuula misala mu shivala shiavo.

³⁴ Yalomoloma, khali tsisichi nitsilolekha, tsisichi tsinyana tsinyala khuvula khuvalitswa;

³⁵ nitsilia shia shindu shiosi shiviisi mu shivala shiavo; khali nitsilia viraakwa viu mu milimi.

³⁶ Nyasaye yamulula vaana vi shiyayi vakhulundu mu shivala shiavo; vaana vu khuraanga khwivulwa va Vamisri.

³⁷ Nalwo lwa yarulitsa Israeli mu shivala shienesho; varulamu ni ifetsa nende itsahabu, mundu avulakhuho yiirwa mu vandu vi tsimbia tsiavo.

³⁸ Vamisri vasangala lwa valola Vaisraeli nivarulamu, varishitswa shichila Vaisraeli.

³⁹ Nyasaye yakhunikha vandu veve na malesi; khali navaha mulilu khuvakholitsila mu vutukhu.

⁴⁰ Lwa vareeva, yavalerela tsisindu, khali navaha shiukhulia khurula mwikulu.

⁴¹ Yaraanyanyinya lwanda, matsi ni kamitsukhamu; kakholomokha mu shiangalangwi khuli muchela.

⁴² Nyasaye yitsushitsa lilaaka lielie litakatifu khu murumishi wewe Aburahamu.

⁴³ Nyasaye yarulitsayo vandu veve nu vuyaanzi, vandu veve va yarovola vimba tsinyimbo nivikhoya.

⁴⁴ Yavaha vivala via vandu vi tsimbia tsindi; navahuchilila khuvukula milimi chiavo,

⁴⁵ khu vandu veve valonde mivaalo keke; nu khulonda malako keke. Mwami Nyasaye yitsominywi!