TSABURI 104 - IBIBILIA INDAKATIFU MU LUTIRICHI LWITAKHO NENDE LWISUKHA

Lwimbo lu Khwitsominya Muloonji

¹ Nzitsominyanga nu mwoyo kwosi Mwami Nyasaye! Mwami Nyasaye, uli wanje, nivi uli ni tsingulu tsinyishi! Luyali nende vunyali ni viovio.

² Vulavu vukhwashilanga. Nivi wavambalitsa likulu khuli liheemo;

³ wayumbakha inzu yoyo ikulu khu matsi. Urumishilanga malesi khuli ni likaare liolio liliihe; khandi upulushilanga mu vushindu.

⁴ Nivi wurumishilanga vushindu khuli varumwa vovo, tsimemo tsiu mulilu khuli varumishi vovo.

⁵ Nivi wasinjilitsa lilova vutinyu mu musinji kwalio, livuli khusuundiitswa.

⁶ Nivi wakhunikha inyanza nu luliiva khuli ni inguvu, khali matsi nikavimba vikulu.

⁷ Lwa wakondeshela matsi, karulaho; kakholomokha lwa kahulila mwoyo kwokwo.

⁸ Kayembela khu vikulu, kakholomokha mu luhoongo, khutukha havundu ha wali nu wakalombela.

⁹ Nivi wasimiikha mupaka khukwikalila; kavuli khuyembelakhu khandi khulilova.

¹⁰ Nivi uchilanga virula via matsi nivikholomokha mu luhoongo, khali michela nichivirila hakari hi vikulu.

¹¹ Tsinyama tsiumbulimu tsiosi tsing'wetsanga matsi kenako; tsipunda tsiumbulimu tsimalanga vuluhu vwatsio.

¹² Manyonyi kumbakhanga vitsu viako mu misala chiliho himbi; katsiulilanga mu tsisia tsi misala chienecho.

¹³ Nivi ukhuvitsanga imbula mu vikulu, lilova lia yitsula vindu viovio vilahi.

¹⁴ Nivi uchilanga vunyasi nu vumeela shichila tsing'ombe; khali viraakwa via vandu varumishila, khurula mu malova khu vanyole shiukhulia shia valia;

¹⁵ khali idivai ichilanga mundu nasangala, makura ku khumuyaanzitsa, khali mukati kukhulia anyole tsingulu.

¹⁶ Misala chiu Mwami Nyasaye chiayikura matsi; misala chia ceda chiu mwene yaraaka.

¹⁷ Nachio chia manyonyi kumbakhamu vitsu viako; linyonyi liliitsanga tsisutsi liumbakhanga shitsu shialio mu misala chiu mweywe.

¹⁸ Visusu vimenyanga mu vikulu viaraambiha; khandi vikhome vivisanga mu machina.

¹⁹ Nivi waloonga mweli khukurumishila khumanyinya tsinyinga; khali liuva liamanya isaa yu khuyeela.

²⁰ Nivi uchilanga shisuundi nishivaho, vukwa vutukhu; khali tsinyama tsiumbulimu nitsirula mu muliru.

²¹ Tsisimba tsinyana tsihumanga nitsihitsa, tsikhavanga shiukhulia khurula khu Nyasaye.

²² Lwa liuva lirulilanga, tsikalukhanga wa tsiruli; nitsitsia khukona mushivisilu shiatsio.

²³ Nalwo lwa vandu vasamulanga khu mihinzilu chiavo, khukhola mihinzilu khutukha halukolovo.

²⁴ Mwami Nyasaye, wakhola vikholwa vinyishi muno! Khuvirila mu vusitsa vwovwo walomba viosi! Shivala shiosi shiayitsula vilombe viovio.

²⁵ Ihale wene khuliyo ni inyanza, nindaambi khandi yavambukha, vilombe vinyishi, vuchila isavu vimenyanga muyo, vikali khu viti.

²⁶ Tsimeeli tsielemanga khu matsi, khali Leviatsani, ya waloonga ivayilanga muko.

²⁷ Viosi viheenzanga khu yivi, khuviha shiukhulia mumatukhu ka vienyanga khulia.

²⁸ Nivi uviheetsanga, vilia; uviheetsanga shiukhulia shia vilia, nu khwikura.

²⁹ Nuvileshi, viheendanga mwoyo; lwa urulitsa miuya muvio, vikhutsanga vikalukha khulilova lia viarulakhu.

³⁰ Navutswa lwa uvuranga miuya muvio, vinyolanga vulamu; khali uvikalushitsa vuyia khulilova.

³¹ Mwami Nyasaye atsililile khuheelwa vukhumi mihika ni mihika! Mwami Nyasaye ayaanzitswi nu muhinzilu kwekwe kwa mwene yakhola.

³² Neye uheenzanga khulilova, nilitechela; utiilanga khu vikulu, mwooshi nu kurula muvio!

³³ Niitsa khwimbila Mwami Nyasaye tsinyimbo mu limenya lianje liosi; niitsa khwitsominyila Nyasaye wanje mu tsinyimbo mumatukhu koosi kashili mwoyo.

³⁴ Kandi nako mu mwoyo kwanje kave ku khukhuyaanzitsa, shichila nivi uchilanga nimba nu vuyaanzi.

³⁵ Tivitsa vandu vooni khulilova; vutamanu vuvuli khwikholekhakhu. Ndushili nu mwoyo kwosi khwitsominya Mwami Nyasaye! Mwami Nyasaye yitsominywi!