TSABURI 103 - IBIBILIA INDAKATIFU MU LUTIRICHI LWITAKHO NENDE LWISUKHA

Nyasaye Wayaanza Vandu Veve

¹ Inzi mwene ndushili khwitsominya Mwami Nyasaye! Nzitsanga khwitsominya nu mwoyo kwosi lira lielie litakatifu!

² Inzi mwene nzitsominyanga Mwami Nyasaye, khandi mbula khuli nyala khwivililakhu vulahi vwevwe vwosi.

³ Neye usemehanga vwoni vwanje vwosi, nu khumbonyinya mu vulwale vwanje vwosi.

⁴ Neye unindanga khurula mu likhutsa, khali andolelanga vuyaanzi nende tsimbavasi.

⁵ Neye umbetsanga vindu vilahi lwa inzi mwene shili mwoyo, nzililile khuva muvukha khandi mundu wi tsingulu khuli shilitsa.

⁶ Mwami Nyasaye akholanga likhola liu vulunji; akholelanga vandu vanyashitswangwa katoto.

⁷ Neye wavoolela Musa mivaalo keke, khali namanyinya Vaisraeli vikholwa vievie.

⁸ Mwami Nyasaye nu mwikhutsili khandi nu wi tsimbavasi; khandi wayitsula vuyaanzi vwi mihika ni mihika.

⁹ Shialiitsa khutsililila khukondekha, inoho khuva nu vurima khumatukhu koosi tawe.

¹⁰ Shiakhusalilitsanga khuli kenyekhanga inoho khuvanzila khulondokhana khu vwoni vweru khandi vutamanu vweru tawe.

¹¹ Khuli likulu lili ihale wene khu shivala, nindio khandi khuli vuyaanzi vwi mihika ni mihika vu Mwami Nyasaye vuli khu yavo vamuheetsanga luyali.

¹² Khuli ivukwi ili ihale wene khurula khu imbo, nindio khandi Nyasaye arulitsaho vwoni vweru.

¹³ Khuli tata akholelanga vaana veve vindu vilahi nindio khandi Mwami Nyasaye akholelanga vandu vamuheetsanga luyali vindu vilahi;

¹⁴ shichila Nyasaye wamanya khuli khwaloongwa khali wamanya vulahi ndi khuli malova.

¹⁵ Navutswa khutsi vandu, vulamu vweru vuli khuli vunyasi; khuvilukhanga makhuneera khuli liua liu mu mulimi;

¹⁶ shichila vulihuutsanga, malikora, avulakhuho mundu unyala khulilola khandi.

¹⁷ Navutswa Mwami Nyasaye wayaanza yavo vamuheetsanga luyali mihika ni mihika, khandi aliitsa khuvayaanza nu khuvakholela malahi khumatukhu koosi --

¹⁸ yavo varweshitsanga ka lilakano lielie lienyanga munjila yatoto khandi yavo valondanga malako keke mu vusuuvilwa.

¹⁹ Mwami Nyasaye wavikha mwikulu shisoko shieshie shiu vwami; nu Mwami wamihanga shia shindu shiosi.

²⁰ Mwitsominye Mwami Nyasaye, munyi tsinjelosi tsili ni tsingulu khandi tsiu vunyali, tsinjelosi tsilondanga malako keke, tsihulilanga ka avoolanga.

²¹ Mwitsominye Mwami Nyasaye, munyi voosi vamuli ni tsingulu mwikulu, munyi varumishi veve, vamukholanga khuli yenyanga!

²² Mwitsominye Mwami Nyasaye, munyi vindu viosi via yaloonga shia havundu hosi ha yamihanga. Nzitsominyanga nu mwoyo kwosi Mwami Nyasaye!