TSABURI 102 - IBIBILIA INDAKATIFU MU LUTIRICHI LWITAKHO NENDE LWISUKHA

Lisaala liu Mundu Uli Mulinyakhana

¹ Mwami Nyasaye, nuyaanza hulila lisaala lianje, ndilanga tsikhwili khu yivi!

² Nindi mu vutiinyu, uvuli khunzivala! Mbulishitsa, ukhonye vwangu lwa saalanga khu yivi!

³ Matukhu kaanje kavwetsanga, manya khuli mwoshi kutuumanga makukora; mmbili kwanje kwakhanga khuli mulilu.

⁴ Mwoyo kwanje kuhangalale khuli vunyasi vwa mundu akhaayi ma vuniali; mwoyo kwanje kwambakhane shiukhulia.

⁵ Namenya nindilanga tsikhwili, nang'aha khandi narikala vikuumba viele.

⁶ Ndi khuli inditsu imenyanga mu shiangalangwi, lisasanga khuli linyonyi liumbulimu limenyanga mwichendanyama.

⁷ Ngonanga nindeminya tsimoni; nakwa khuli linyonyi lionyene khu shisulu shi inzu.

⁸ Vatsiku vaanje vanyekanga mbasu kwosi; yavo vakholelanga shihenye henye varumishilanga lira lianje khulaama vandi.

⁹ Nyanyanga likooshe khuli shiukhulia shianje, khandi nzukanyinya miliika chianje mu shia ng'wetsanga,

¹⁰ shichila vurima vwovwo vunyishi muno, wambila ikulu manusiuva hasi.

¹¹ Matukhu kaanje kavwetsanga khuli shinini shiu mbasu kwa halukolovo; nialanga khuli vunyasi.

¹² Navutswa yivi Mwami Nyasaye, uli Mwami mihika ni mihika; vandu khukhwitsushitsa khumatukhu koosi.

¹³ Uliitsa khumanyinya vunyali vwovwo ma ulolele tsimbavasi vandu vamenyanga Sayoni; isaa yu khuvavela tsimbavasi imali khutukha; neyo isaa yali niyalaakwa.

¹⁴ Varumishi vovo va vayaanza, khali niiva litaala likali lia Sayoni liativitswa; valilolelanga tsimbavasi, khali niiva liapomolwa.

¹⁵ Vandu vi tsimbia valiitsa khuha Mwami Nyasaye luyali; vami voosi vamihanga khulilova valiitsa khuhaana vukhumi khu tsingulu tsiotsio.

¹⁶ Mwami Nyasaye aliitsa khumbakha vuyia Sayoni; aliitsa khulolekha mu vukhumi vwevwe.

¹⁷ Aliitsa khuhulila vandu veve valekhwa nu khuhuchilila lisaala liavo.

¹⁸ Handichili likhula liliitsa khuvaho ku Mwami Nyasaye yakhola, khu vandu vashili khwivulwa valimwitsominya.

¹⁹ Mwami Nyasaye yaheenzela khurula havundu hehe hatakatifu hikulu, yaheenza mu shivala khurula mwikulu.

²⁰ Yahulila vandu vavohwa nivalilanga khandi nakhola yavo vakhalachilwa likhutsa khuva vavoholole;

²¹ khu lira liu Mwami Nyasaye lililanditswa mu Sayoni, nu khwitsominyilwa mu Yerusalemi,

²² lwa vandu voosi nende vami vamihanga vakana halala khusaala khu Mwami Nyasaye.

²³ Mwami Nyasaye wakhola khuva muteteshele nishili muvukha; wayimbihitsa matukhu kaanje ku khuva mwoyo.

²⁴ Yivi Nyasaye wanje, ukhahuchilila nakhutsa nishili khusakhula tawe. Mwami Nyasaye, uli Nyasaye wanje, nivi uli mwoyo mihika ni mihika;

²⁵ waloonga lilova mumatukhu kakhale, khandi nulomba likulu.

²⁶ Viliitsa khukora, navutswa yivi ulatsililila khumenya; viosi viliitsa khusakhula khuli tsinguvu. Uliitsa khuviambakhana khuli tsingulu tsivula vukhonyi khandi viliitsa khuvwaho.

²⁷ Navutswa shia khase khosi nivi uli mulala mwele, khandi uliho mihika ni mihika.

²⁸ Vaana veru valiitsa khumenya mu vulindi vulahi, khandi nivi uliitsa khulinda vitsukhulu vavo vulahi vwene.