TSABURI 101 - IBIBILIA INDAKATIFU MU LUTIRICHI LWITAKHO NENDE LWISUKHA

Yaka Nako ku Mwami Yalaaka Aliitsa khukhola

¹ Niitsa khukhwimbila lwimbo khulondokhana khuli wakhuyaanza khandi wu kholanga likhola liu vulunji; Mwami Nyasaye, niitsa khukhwimbila lwimbo lu khukhwitsominya.

² Mwiima kwanje shiukuliitsa khuva ni imbala yosi tawe. Litukhu shina lia uliitsa khwitsa khwinzi? Niitsa khumenya limenya lilahi mu inzu yanje,

³ khandi shinyala khuyaanzilila vindu vitamanu tawe. Nayambakhana vikholwa via vandu vambakhananga khulonda malako ka Nyasaye; mbulakhu shindu shiosi shianyala khukhola navo.

⁴ Shinyala khuva mundu muvehi, nu khuyaanzilila khukhola vindu vitamanu tawe.

⁵ Niitsa khumulula mundu wosi uvoolanga tsimbemba khu mureende wewe. Shinyala khuyaanzilila mundu mwiloli khandi mwichinjilili tawe.

⁶ Niitsa khuhuchilila yavo vasuuvilanga Nyasaye khandi valeshe vamenye mu inzu yanje yu vwami. Vandu vamenyanga limenya lilahi valiitsa khuhuchililwa khundumishila.

⁷ Mundu muvehi shialiitsa khumenya mu inzu yanje yu vwami tawe; mundu wikholanga khuva wi likhola liu vulunji shialatsilila khuva imbeli wanje tawe.

⁸ Shia litukhu niitsa khumulula vandu vatamanu mu shivala shieru; Niitsa khukhunga vandu vatamanu voosi khurula mu litaala liu Mwami Nyasaye.