TITO 1 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Ninzi Paulu, uli murumishi wa Nyasaye khandi murumwa wa Yesu Kristo. Ninzi warovolwa khandi nindumwa khukhonyila lisuuvila lia vandu va Nyasaye yarovola, nu khuvimilila mu katoto kechitswangwa ni idini yeru,

² khulondokhana ni lisuuvilitswa liu vulamu vwi mihika ni mihika. Nyasaye, wambakhana vuvehi, yakhulaaka vulamu yuvu shivala, nishishili khuraanga khuloongwa.

³ Khulwa yako, lwa isaa yatoto yatukha, Nyasaye uli Muhonyinyi weru wa khumanyinya kenako khuvirila mu likhuva lielie, khali namba vunyali vu khwilwatsa likhuva lienelo.

⁴ Mbandichilanga Tito, mwana wanje watoto wa khusanganga naye lisuuvila. Nyasaye, uli Tata nende Muhonyinyi weru Yesu Kristo, vamulolele tsimbavasi khandi vamuhe milembe.

Muhinzilu kwa Tito mu Litaala lia Kurete

⁵ Nakhulekha mu litaala lia Kurete, khulu khulunjishitsa shia shindu shiosi shiali nishishili khulunjishitswa khandi urovole vasakhulu vi likanisa mu shia litaala. Yitsushitsa mivaalo kaanje:

⁶ Bishopu yenyekhanga ave mundu uvula imbala yosi; ave musatsa wahila mukhali mulala wonyene, khandi vaana veve vave nivasuuvila khandi vavula mwiima ku khuva valulu inoho khuvula khwenya khulonda malako.

⁷ Lwa Bishopu yaheelwa vunyali vu khukhola muhinzilu kwa Nyasaye, khutukha avuli khuva ni imbala yosi. Yenyekhanga avuli khuva nu vwichinjililu, khandi nu vurima vu vwangu, mutandi, wi shileeche inoho nu vwilili vwi tsisenti.

⁸ Yenyekhanga ave mwinjilitsi wa vacheni, khandi wayaanza khukhola malahi. Yenyekhanga ave unyala khwilinda munjila indahi yene, wi likhola liu vulunji mu likhola, mutakatifu nende mwiima mulahi.

⁹ Yenyekhanga ahande ni tsingulu khu mechitso kanyala khusuuvilwa, khandi katsianakananga na mechitso katoto. Munjila iyi, aliitsa khuva nu vunyali vu khutinyilitsa vandu khulondokhana khu mechitso katoto; khandi aliitsa khuva nu vunyali vu khumanyinya vutamanu vwa vandu vakahinganyinyanga vali navwo.

¹⁰ Khuliho na vandu vanyishi, khushila muno yavo vakalukhanyinywa khurula mu idini ya Vayahudi, vahingani vakaatanga vandu vandi nu vusilo vwavo.

¹¹ Khutukha vahonjelitswi, shichila vakoyanyinyanga vandu vi inzu yosi, lwa veechitsanga vindu via kenyekhanga vavuli khwechitsa; khandi vali ni lienya li tsisoni liu khunyola tsisenti.

¹² Khali mulala khu vaprofeti vavo yavoola, “Shia khase khosi Vakurete vashila vuvehi, vali khuli tsinyama tsindamanu tsiumbulimu; ni vakaara vayaanzilila khulia nu khunyesela.”

¹³ Livoola yili ni liatoto. Venyekhana khukondeshelwa vululu muno, khu vave ni lisuuvila liatoto

¹⁴ khandi vavuli khwenya khulonda tsinganu tsia matukhu ka khale, tsia Vayahudi inoho malako ka vandu vambakhananga khulonda katoto.

¹⁵ Shia shindu shiosi ni shinihu, khu vandu vanihu; navutswa shia shindu shiosi shilolekhanga shiayonekha khu vandu vakoyana khandi vavula lisuuvila; shichila vwoongo vwavo nende tsinganakani tsiu mukari viakoyana.

¹⁶ Vavoolanga vamanya Nyasaye, navutswa vamwambakhana khuvirila mu vikholwa viavo. Khali vayitsula vuhimwa, khandi vayambakhana khulonda malako; khali shivatushili khukhola shindu shiosi shilahi tawe.