SAMWELI 30 - IBIBILIA INDAKATIFU MU LUTIRICHI LWITAKHO NENDE LWISUKHA

Daudi Yakwana Namulula Vaamaleki

¹ Lwa matukhu kavili kali nikakhavira, Daudi nende vandu veve vakalukha nivatukha mu litaala lia Zikulagi. Vaamaleki vali nivaseeri luveka luli ikuvanda wu lusomo lwa Yuda, khandi vali vakwani litaala lia Zikulagi. Vali nivasambi nu mulilu litaala lienelo,

² khandi nivakumile ni tsingulu vandu vakhali voosi, vuchila khwiirakhu mundu wosi, navutswa vali vavukuli vandu voosi nu khurulamu.

³ Lwa Daudi nende vandu veve vatukhaho, vanyola litaala nilisambilwi nu mulilu khandi ndi vakhali vavo, vaana vavo vi shiyayi nende vi shikhana vavukulwi khurulamu.

⁴ Nalwo lwa Daudi nende vandu veve varaanga khulila tsikhwili, khutukha lwa vavwa tsingulu tsiu khulila.

⁵ Khali vakhali vavili va Daudi, nivali Ahinohamu nende Abigaili, nali mukhutsakhali wali wa Nabali wi litaala lia Karameli, vali vakumilwi ni tsingulu.

⁶ Daudi yali mu vutiinyu vunyishi muno, shichila vandu veve valomolomanga khuli vanyala khumulesa na machina. Shia mundu wosi yali nu vurima vululu mu mwoyo kwekwe, shichila vaana veve vi shiyayi nende vi shikhana. Navutswa Mwami Nyasaye yaha Daudi tsingulu.

⁷ Daudi yavoolela musalisi Abiatsari mwana wa Ahimeleki, “Nderela shiambala.” Nalwo lwa Abiatsari yamulerela.

⁸ Daudi yareeva Mwami Nyasaye, “Nyala khuhitsanyinya shituma shia vaseeri yavo? Nyala khuvakumila?” Mwami Nyasaye yamuchipa, “Vahitsanyinye; ni kilikali, uliitsa khuvakumila nu khuhavina vandu va vakumila ni tsingulu mu liihe.”

⁹ Daudi nende vandu veve varaanga luchendo lwavo, khandi lwa vali nivakhatukha ha Muchela kwa Besori, valala khuvo varikalaho.

¹⁰ Daudi yatsililila nu luchendo lwelwe na vandu tsimia tsine. Vandu vandi tsimia tsivili vali nivavwele tsingulu tsiu khwambukha muchela varikalaho.

¹¹ Vandu vali halala na Daudi vanyola mwana wi shiyayi Mumisri mumbulimu, manivamulera khu Daudi. Vamuha matsi ku khung'wa nende shiukhulia shialia --

¹² makhuyu malala kuminywa, khandi tsikhovi tsivili tsia matunda kuuma ki misabibu. Mwana wi shiyayi mwenoyo yalia nanyola tsingulu, shichila yali nashili khuliakhu shiukhulia shiosi, inoho khung'wakhu matsi koosi khumatukhu kavaka, mbasu nu vutukhu.

¹³ Daudi yamureeva; “Uli murukwa wa viina, khandi ni hena wa urulanga?” Mwana vi shiyayi mwenoyo yamuchipa, “Ndi Mumisri, murukwa wu Mumaleki. Muruchi wanje yanzivala inyuma matukhu kaviri kavaka yako, lwa nali nindwalanga.

¹⁴ Khwaseera Vakeretsi vamenyanga khuluveka luli ikuvanda wu lusomo lwa Yuda nende lusomo lwa vandu vu lwivulu lwa Kalebu, manukhusamba nu mulilu litaala lia Zikulagi.”

¹⁵ Daudi yareeva mwana wi shiyayi mwenoyo, “Uliitsa khumbila khu shituma shia vaseeri venavo?” Mwana vi shiyayi mwenoyo yamuvoolela, “Niitsa khukhuhila niiva uliitsa khusuuvilitsa, khuvirila mu lira liu Mwami Nyasaye ndi uliitsa khulekha khunziira inoho khuvula khungalushitsa khu muruchi wanje.”

¹⁶ Mwana wi shiyayi mwenoyo yahila Daudi khuvo. Vaseeri venavo vali nivasalani havundu henaho hosi, nivaliitsanga shiukhulia, nivang'wetsanga, khandi nivikhoyanga shichila vindu vinyishi via vali nivayaayi khurula mu shivala shia Vafilisti nende lusomo lwa Yuda.

¹⁷ Daudi yavakwana khuraanjila mu mavwevwe khutukha khulukolovo khulitukhu lialondakhu. Khali mulala khuvo, avulakhuho wilukhakhu, nikakhali vandu tsimia tsine vavukha vahilanga tsingamia navo vilukha.

¹⁸ Daudi yahavina vandu voosi, khandi vindu viosi via Vaamaleki vali nivavukuli, khali khumeetakhu vakhali veve vavili.

¹⁹ Shindu shivulakhuho shiakora; Daudi yakalushitsa vaana vi shiyayi nende vi shikhana vali va vandu veve, khandi vindu viosi via Vaamaleki vali nivayaayi.

²⁰ Yanyola khandi makondi nende tsing'ombe; vandu veve vakhoma miruku chiosi, nichitsia imbeli wavo nivavoola, “Yichi nachio miandu chia Daudi!”

²¹ Nalwo lwa Daudi yakalukha khu vandu veve tsimia tsivili, vali nivavwa tsingulu tsiu khumulonda khandi va yali narichi inyuma ha Muchela kwa Besori. Vitsa nivakanila Daudi nende vandu veve va yali navo, ma Daudi natsia khuvo khandi navaha milembe minyishi muno.

²² Navutswa vandu viimani khandi vavula vukhonyi vwosi, vali nivatsia na Daudi vavoola, “Vambakhana khutsia na khutsi, khuvuli khuvaha vindu via khwali nu khwayaayayo. Vanyala khuvukula vakhali vavo nende vaana vavo ma varuli hanu.”

²³ Navutswa Daudi yachipa, “Vashieru, shikali kario tawe! Muvula vunyali vu khukhola kenako ni vindu viu Mwami Nyasaye akhuheele. Neye ukhulindi nu khukhuha tsingulu tsiu khukuura shituma shia vandu vakhuseeranga.

²⁴ Mundu avulakhuho, unyala khuhuchilila makhuva ka muvooli. Vandu voosi valiitsa khunyola shilala: mundu uliitsa khurikala inyuma ni misiko, aliitsa khunyola shilala na woyo uliitsa khutsia khukwana mu liihe.”

²⁵ Daudi yalomba makhuva kenako khuva khuli lilako mu shivala shia Vaisraeli; khandi lishirumikhayo nunundi.

²⁶ Lwa Daudi yakalukha mu litaala lia Zikulagi, yaruma vindu vilala via yali nayaayi khu vimilili vu lusomo lwa Yuda, nivali valina veve na makhuva yaka, “Yishi nashio shihanwa shienyu shia muheetsanga khurula khu vindu via khuyaayi, khurula khu vatsiku vu Mwami Nyasaye.”

²⁷ Yarumila vandu vi litaala lia Betseli, khu vandu vi litaala lia Raama khuluveka luli ikuvanda wu lusomo lwa Yuda, khandi khu vandu va mataala ka Yatiri,

²⁸ Aroheri, Sifumotsi, Eshitemoha,

²⁹ nende Rakali; khu vandu vu lwivulu lwa Yerahumeli, khandi vandu va mataala ka Vakeni,

³⁰ khandi khu vandu va mataala ka Horuma, Borashani, Atsachi,

³¹ nende Heburoni. Yaruma khandi khu yavo voosi vamenyanga havundu ha Daudi nende vandu veve vali nivachendakhu.