SAMWELI 25 - IBIBILIA INDAKATIFU MU LUTIRICHI LWITAKHO NENDE LWISUKHA

Likhutsa lia Samweli

¹ Samweli yakhutsa; ma Vaisraeli voosi nivakanila halala khumwikhula. Khulwa yako, vayeveela mmbili kwekwe mu shilindwa ingo wewe mu litaala lia Raama. Nikamali khwikholekha kario, Daudi yasimukha natsia Mwichendanyama mwa Parani.

Abigaili nende Daudi

² Khwaliho nu mundu mulala, wali ni miandu mu litaala lia Karameli. Yali mundu muhinda muno, khandi yali wavaya tsimbuli iheelefu indala nende makondi tsiheelefu tsivaka, ka yakhalaakanga vwoya mu litaala lia Karameli.

³ Mundu mwenoyo yalaangwangwa Nabali, na mukhali wewe nalaangwa Abigaili. Abigaili yali wacheliha khandi wakaasa likoondo muno; navutswa musatsa wewe yali mwimani, khandi yali nu mwiima mutamanu.

⁴ Lwa Daudi yali nali mwichendanyama, yahulila ndi Nabali akhalaakanga vwoya khu makondi.

⁵ Nabali yaruma vayayi vavukha likhomi, navavoolela, “Simushi mutsi khuha Nabali wi litaala lia Karameli milembe chianje.”

⁶ Muvoolele ndi, Daudi ukhuheele milembe chiechie, khandi yikombanga ndi yivi nende vandu vi inzu yoyo mumenye mu milembe, khali vindu viali navio viosi vive mu milembe!

⁷ Mali khuhulila ndi matukhu kanu, nako kamukhalaakanga vwoya khu makondi. Khushili khunyashitsakhu vayi vovo, lwa vamenyanga na khutsi; khandi vashili khukoritsakhu shindu shiosi mumatukhu koosi ka vamenyanga mu litaala lia Karameli.

⁸ Reeva varumishi vovo makhuva kenako, navo valiitsa khukhuvoolela ni katoto. Khwitsi khulitukhu liu khwikhoya. Daudi akhureevanga nuyaanza ukhwinjilitsi vulahi muno. Nuyaanza ukhuhe khutsi varumishi vovo nende mulina wowo wa wayaanza Daudi shia shindu shiosi shiulolanga unyala khuvaha.

⁹ Lwa vandu va Daudi vatukhaho, vavoolela Nabali makhuva ka Daudi yali navooli vamuvoolele. Nalwo lwa valindilayo.

¹⁰ Nabali yachipa varumishi va Daudi, “Daudi ni viina? Mwana wa Yese ni viina? Varumishi vanyishi vilukhanga khurula khu varuchi vavo matukhu kanu!

¹¹ Khulwa yako, shichila shina mbukuli mukati kwanje nende matsi, halala ni miruku chiasinzile vandu vakhalaakanga vwoya khu makondi, mbane khu vandu varulanga havundu hakhamanyi ni hena wa varulanga?”

¹² Vandu va Daudi vakalukha nivavoolela Daudi makhuva ka Nabali yali navavoolele.

¹³ Daudi yavoolela vandu veve, “Mwiyavaale vivavi venyu!” Viyavaala vivavi viavo, khandi Daudi niyiyavaala shivavi shieshie. Vandu himbi tsimia tsine vasimukha nivatsia na Daudi, nikhali vandu tsimia tsivili varikala nivalinda misiko chiavo.

¹⁴ Mundu mulala khu varumishi va Nabali yavoolela Abigaili, wali nali mukhali wa Nabali, “Daudi yaruma likhuva nali mwichendanyama liu khwitsa khuha muruchi weru Nabali milembe. Navutswa muruchi weru Nabali yavanyekanyinya.

¹⁵ Navutswa vandu venavo vakhuvukula munjila indahi, khandi shindu shitamanu shivulakhuho shia vakhukhukhola. Shindu shivulakhuho shia vakhuhuuvila, khumatukhu koosi ka khwamenyanga navo.

¹⁶ Vakhulinda mbasu nu vutukhu khumatukhu koosi ka khwali navo nu khwayitsanga miruku chieru.

¹⁷ Kanakanakhu nunundi, ulole kunyala khukhola, shichila matiinyu katsitsanga khunyola muruchi weru nende vandu vi inzu yeye voosi. Nu mundu mutamanu, khali mundu avulakhuho, unyala khulomoloma khuye munjila indahi.”

¹⁸ Abigaili yavukula vwangu mikati tsimia tsivili, misiko chivili chiali nichialombwa khu liseelo nichitsule idivai, makondi karanu kali nikahembelwa, imu yasihilwa tsikilo 16, visia imia indala vi vinzaali, nende tsikeki tsimia tsivili tsia makhuyu kuminywa, manivachikha khu tsipunda.

¹⁹ Nalwo lwa Abigaili yavoolela varumishi veve, “Kholi nu mutsia imbeli; namulonda inyuma.” Navutswa shiyavoolelakhu musatsa wewe Nabali tawe.

²⁰ Abigaili yali nahilanga ipunda yeye ha injila yashiamila khundulu khwi shikulu; nonoho lwa yakana na Daudi nende vandu veve nivitsanga wa yali naruli.

²¹ Daudi yali ninganakani, “Shichila shina nininda miandu chiu mundu woyo mwichendanyama yumu? Khali shindu shivulakhuho mu vindu vievie, shia nahuuvakhu; khandi nindi avanzilanga vindu vitamanu khu vilahi via namukholela!

²² Nyasaye anziiri, niiva nzitsanga khuvula khwiira khali mundu wu khumalilikha mu vandu venavo, nuvushili khu shia mu mavwevwe!”

²³ Lwa Abigaili yalola Daudi, yikha vwangu khurula khu ipunda yeye, khandi nasikama hasi

²⁴ hi vilenje via Daudi, namuvoolela, “Mwami, nuyaanza mbulishitsa! Lekha vutamanu vuve khwinzi.

²⁵ Nuyaanza, uvuli khulonda makhuva ka Nabali, mundu uvula vukhonyi akhuvoolele. Ali vutswa khuli lira lielie livoolanga -- mundu muyiingwa! Mwami, shinali nindiho lwa varumishi vovo vatukhaho tawe.

²⁶ Mwami Nyasaye neye wakhwikalila yivi, khuvanzila khandi khuvula khwiira vatsiku vovo. Nzisuuhanga khu yivi khuvirila mu lira liu Mwami Nyasaye uli mwoyo ndi vatsiku vovo halala na yavo voosi venyanga khusalilitsa yivi, valiitsa khusalilitswa. Lekha vatsiku vovo khandi yavo vakhavanga khusalilitsa yivi, mwami wanje vakwi khuli Nabali.

²⁷ Mwami, nuyaanza, huchilila shihanwa shiakhulerele yishi, ma uhe vandu vovo.

²⁸ Mwami, nuyaanza semeha khurula mu vutamanu vwanje inzi murumishi wowo, shichila vutamanu vwakholi. Mwami Nyasaye aliitsa khukhukhola yivi uve mwami, khali vitsukhulu vovo khandi, shichila ukwananga maahe keke; khandi shiuliitsa khukholakhu shindu shitamanu shiosi khumatukhu koosi, ka uliitsa khuva nushili mwoyo tawe.

²⁹ Niiva mundu aliitsa khukhukwana khandi achelitsi khuli akhwiira, Mwami Nyasaye, uli Nyasaye wowo aliitsa khukhulinda vulahi muno, khuli mundu alindanga livishilu lilahi muno. Navutswa aliitsa khusiuva ihale wene vatsiku vovo, khuli mundu arumishilanga ifandili khulesa lichina ihale wene.

³⁰ Lwa Mwami Nyasaye aliitsa khuva ni yakhakhola vindu viosi vilahi, via yali niyalaaka aliitsa khukholela yivi khandi niyakhakhulomba khuva mwami wi shivala shia Israeli,

³¹ liiva liolio liu mukari mu tsinganakani liliitsa khuva lilahi, shichila shiuliitsa khuva nukholi vutamanu khuvanzila nu khwiira vandu vakhakholi vindu vitamanu tawe. Lwa Mwami Nyasaye aliitsa khuva nakhukasitse, nuyaanza uvuli khunzivilila inzi murumishi wowo.”

³² Daudi yavoolela Abigaili, “Yitsominyi Mwami Nyasaye, Nyasaye wi shivala shia Israeli, ukhurumi nunundi khwitsa khumbukanila!

³³ Sanditsanga Nyasaye shichila uli ninganakani indahi khandi shichila ka ukholi nunundi, lwa unzikalile khuvula khusuundula shisahi khandi khuvula mwene khuvanzila.

³⁴ Mwami Nyasaye unzikalile mbuli khukhusalilitsa. Navutswa nzisuuhanga khuvirila mu lira lia Nyasaye uli mwoyo wi shivala shia Israeli ndi niiva wakhavuli khukhola vwangu khwitsa khumbukanila, vandu va Nabali voosi vakhakhutsi mu mavwevwe!”

³⁵ Khu, Daudi yahuchilila shia yali namulerele navoola, “Kalukha ingo vuchila khukheendakhu mwoyo. Niitsa khukhola ka wenyanga khole.”

³⁶ Abigaili yakalukha khu Nabali, wali nali hango nakholanga mulukha kwi lilia kwenyekhanga mwami akholelwi. Yali utandi khandi yihulilanga vulahi muno; khu shiyamuvoolelakhu shindu shiosi mavwevwe nikashili khutukha khulitukhu lialondakhu tawe.

³⁷ Khu, lwa Nabali yali niyakhalava tsimoni, Abigaili yamuvoolela shia shindu shiosi. Yali nu vulwale vu mwoyo manakwa khuli lichina.

³⁸ Matukhu likhomi nikakhavira, Mwami Nyasaye yamushuta shivoko nakhutsa.

³⁹ Lwa Daudi yahulila makhuva ndi Nabali umali khukhutsa, yavoola, “Mwami Nyasaye yitsominywi! Uvanzili Nabali lwa yanyeka khandi wayikalila inzi murumishi wewe khuvula khukhola shindu shitamanu. Mwami Nyasaye umali khusalilitsa Nabali, shichila vindu vitamanu vievie.” Daudi yaruma vandu khu Abigaili vamuvoolele ye mwene yenyanga amuhile khuva mukhali wewe.

⁴⁰ Varumishi veve vasimukha nivatsia khulola Abigaili mu litaala lia Karameli, nivamuvoolela, “Daudi ukhurumi khwitsa khukhuvukule khukhuhile khuye uve mukhali wewe.”

⁴¹ Abigaili yinaminya murwi kwekwe hasi navoola, “Ninzi murumishi wewe, wirecheshe khusavitsa vilenje via varumishi veve.”

⁴² Abigaili yasinjila vwangu nanina khu ipunda yeye. Vakhana varukwa varanu vamuheeleshitsa; yasimukha natsia na varumishi va Daudi nava mukhali wewe.

⁴³ Daudi yali wahila Ahinohamu wi litaala lia Yezireli; vo vavili vali vakhali va Daudi.

⁴⁴ Nikhali, Saulu yali wavekha mwana wi shikhana wewe Mikali, wavelenje mukhali wa Daudi khu mundu walaangwangwa Paliti mwana wa Lahishi, wi litaala lia Galimu.