SAMWELI 11 - IBIBILIA INDAKATIFU MU LUTIRICHI LWITAKHO NENDE LWISUKHA

Saulu Yakuura Vaamoni

¹ Himbi mweli mulala nu kwakhavira, Mwami Nahashi wa Vaamoni yasimukha na vasikali veve, natsia khukwana vandu vi litaala lia Yabeshi, lili mu lusomo lwa Gileadi, nalivotokhana. Vandu vi litaala lia Yabeshi, vavoolela Nahashi, “Khola lilakano li milembe na khutsi, uve mwamihi weru.”

² Navutswa Nahashi yavavoolela, “Nzitsanga khukhola lilakano na munyi, numuhuchilila khole shindu shilala: niitsa khuhutuula shia imoni isatsa yu mundu wosi khu mbe mbele Vaisraeli voosi tsisoni.”

³ Vimilili vi litaala lia Yabeshi vavoola, “Khuhe matukhu saba khu khurumi varumwa shia havundu hosi mu shivala shia Israeli. Niiva mundu unyala khukhuhonyinya aliitsa khuvula khuvaho, khuliitsa khukwa mu makhono koko.”

⁴ Varumwa venavo, vatukha mu litaala lia Gibeha lia Saulu yamenyamu, nivavoolela vandu makhuva kenako. Vandu voosi valila tsikhwili.

⁵ Isaa yeneyo, Saulu yali niyakharula mu mulimi ni tsihili tsietsie, nareeva, “Ni shina shitamanu na vandu? Shichila shina valilanga tsikhwili?” Nalwo lwa vamuvoolela, ka vandu vi litaala lia Yabeshi vali nivavavoolele.

⁶ Lwa Saulu yahulila makhuva kenako, Roho wa Nyasaye yitsa khuye ni tsingulu, navalolela vurima.

⁷ Yavukula tsihili tsivili, nareema mu vitonye, naruma varumwa nivachinji vitonye vienevo, khutsia shia havundu hosi ni lichelihitsa yili: “Yaka nako kaliitsa khwikholekha khu ihili ya shia mundu wosi uliitsa khwambakhana khulonda Saulu nende Samweli.” Vaisraeli varia makhuva ku Mwami Nyasaye anyala khukhola; ma vandu voosi nivitsa halala.

⁸ Saulu yavalaanga halala mu litaala lia Bezeki: Khwaliho na vandu tsiheelefu tsimia tsivaka khurula mu lusomo lwa Israeli nende vandi tsiheelefu makhomi kavaka khurula mu lusomo lwa Yuda.

⁹ Vavoolela varumwa vali nivaruli mu litaala lia Yabeshi, “Vooleli vandu venyu ndi mukamba tsisaa sita tsiu mbasu nitsishili khutukha mukamba valiitsa khuhonyinywa.” Lwa vandu vi litaala lia Yabeshi vahulila makhuva kenako, vali nu vuyaanzi vunyishi muno,

¹⁰ nivavoolela Mwami Nahashi, “Khuliitsa mukamba khumukwa mu makhono kenyu, mukhukhole shia shindu shiosi shia mukanakananga munyala khukhola.”

¹¹ Litukhu lialondakhu, Saulu yakavula vandu veve mu vituma vivaka. Lwa kwali nu kushili mu mavwevwe, vasimukha nivatsia mu maheemo ka vatsiku vavo vamenyamu, nivakwana; vaviira himbi tsisaa sita tsiu mbasu. Vandu vihonolokha vasalana; khandi khali vavili khuvo, shivarikwakhu nivali havundu halala tawe.

¹² Khulwa yako, Vaisraeli vavoolela Samweli, “Ni viina wareeva, ‘Saulu anyala khukhwamiha?’ Khulereli vandu venavo, khuviiri!”

¹³ Navutswa Saulu yavoola, “Mundu avulakhuho uliitsa khwiirwa khulitukhu linu; shichila yili nalio litukhu liu Mwami Nyasaye ahonyinyi Vaisraeli.”

¹⁴ Khulwa yako, Samweli yavoolela vandu, “Hambi, chendi khutsi mu litaala lia Gilugali, khwamihitsa khandi Saulu khuva mwami weru.”

¹⁵ Vandu voosi vasimukha nivatsia mu litaala lia Gilugali; nivahuchilila Saulu Havundu Hatakatifu henaho khuva mwami. Vakhola musango ku khulera milembe, ma Saulu nende Vaisraeli voosi nivakhola mulukha ku khwikhoya mukali muno.