SAMWELI 1 - IBIBILIA INDAKATIFU MU LUTIRICHI LWITAKHO NENDE LWISUKHA

Livulwa lia Samweli

¹ Khwaliho nu mundu walaangwangwa Elikana, warulanga mu vandu vuluhia lwa Efurahimu wali niyamenya mu litaala lia Raama, lili mu shivala shi vikulu shia Efurahimu. Elikana yali mwana wa Yerohamu, mwana wa Elihu, khurula mu vandu vu lwivulu lwa Tohu, lulala khu tsinzivulu tsia Zufu.

² Elikana yali wahila vakhali vavili. Mulala khuvo yalaangwangwa Hana, na wundi Penina. Penina yali wayivula vaana; navutswa Hana yali nashili khwivulakhu khali mwana wosi.

³ Shia khumuhika, Elikana yarulanga mu litaala lia Raama atsia khusaala khandi khukholela Mwami Nyasaye wi Mikaanda Chiliihe musango mu litaala lia Shilo, wa Hofini nende Finiasi, vaana vi shiyayi vavili va Eli vamenyanga. Vaana vavili venavo vali vasalisi vu Mwami Nyasaye.

⁴ Shia litukhu lia Elikana yakholanga musango, yavukulanga shitonye shi inyama aha mukhali wewe Penina; khandi avukula shindi aha vaana veve vi shiyayi nende vi shikhana.

⁵ Navutswa yaheetsanga Hana inyama inyishi, shichila yali wamuyaanza muno, khali niiva Mwami Nyasaye yali wamwiima lwivulu.

⁶ Mbalikhaye wewe Penina yali wamenya namurindilanga shia litukhu khumukhola khuleka, shichila Mwami Nyasaye yali wamwiima lwivulu.

⁷ Kali kamenya ni kakholekhanga kario shia khumuhika nu kumali khuvwa khandi kundi nu kuraanga. Shia khulitukhu liosi lia Hana yatsitsanga mu inzu yu Mwami Nyasaye, Penina yamurindilanga, khali alila nu khwambakhana khulia.

⁸ Musatsa wewe Elikana yamureevanga, “Mukhali wanje Hana, shichila shina ulilanga? Shichila shina wambakhane khulia? Shichila shina wavelela mu mwoyo khumatukhu koosi? Nyala khuva ndi nu vukhonyi vunyishi muno khu yivi, khuvira vaana vi shiyayi likhomi?”

Hana Yasaala khu Nyasaye Anyole Mwana

⁹ Litukhu lindi, lwa vali nivamali khulia nu khung'wa mu litaala lia Shilo, Hana yasinjila. Musalisi Eli yali wikhale khu shisoko shieshie himbi ha muliango kwi Litempeli liu Mwami Nyasaye.

¹⁰ Hana yanyakhana vululu muno mu mwoyo kwekwe, nalila tsikhwili nu khusaala khu Mwami Nyasaye.

¹¹ Hana yisuuha, navoola, “Yivi Mwami Nyasaye wi Mikaanda Chiliihe, ukhonye lwa ndi murumishi wowo! Ulole khuli nyakhananga, unzitsushitse! Uvuli khunzivilila! Niiva uliitsa khumba mwana wi shiyayi, khusuuvilitsanga ndi niitsa khukhuha mwana mwenoyo, khukhurumishila khumatukhu koosi kaliitsa khuva nashili mwoyo, khandi vuchila khuvekwakhu liswi.”

¹² Hana yatsililila khusaala khuluhono khu Mwami Nyasaye, khali Eli namuheenza khu munwa kwekwe.

¹³ Yasaalanga kalaha mu mwoyo; munwa kwekwe nakwo kwinuyanga, navutswa mwoyo kwekwe shiukwali kwahulilikhana tawe. Khulwa yako, Eli yakanakana ndi Hana utandi

¹⁴ namuvoolela, “Nuluhono shina lutsililila khutanda? Lekha khung'wa idivai!”

¹⁵ Hana yachipa, “Yivi mwami wanje, shindandi tawe; ninzi mukhali unyakhananga muno. Shing'welekhu idivai inoho malwa tawe. Nakhasaalanga nimbolela Mwami Nyasaye vutiinyu vwanje.

¹⁶ Lekha khumbukula khuli mukhali uvula vukhonyi vwosi. Nakhasaalanga ndio, shichila ndi mundu uli mu vutiinyu vunyishi muno.”

¹⁷ Eli yamuchipa, “Simukha utsi mu milembe, khandi Nyasaye wa Israeli akhuhe shiureevi.”

¹⁸ Hana yavoola, “Nzikombanga ndi shia khase khosi undolele malahi.” Yasimukha narulaho, naliakhu shiukhulia khandi nalekha khuvela mu mwoyo.

Samweli Yivulwa Nahaanwa khu Nyasaye

¹⁹ Litukhu lialondakhu, Elikana nende vandu vi inzu yeye vavukha kushili mu mavwevwe, khandi lwa vali nivamali khusaala khu Mwami Nyasaye, vakalukha ingo wavo mu litaala lia Raama. Elikana yakona nu mukhali wewe Hana, khandi Nyasaye nachipa lisaala lielie.

²⁰ Matukhu mati nikakhavira, Hana yavelekha niyivula mwana wi shiyayi. Yamukulikha lira Samweli, navoola, “Ninzi wareeva Mwami Nyasaye, namba mwana uyu.”

²¹ Litukhu liatukha khandi lia Elikana nende vandu vi inzu yeye vatsia mu litaala lia Shilo, khukholela Mwami Nyasaye musango kwa shia khumuhika, khandi musango kundi mulahi muno, kwa yali niyalaaka aliitsa khumukholela.

²² Navutswa Hana shiyatsiakhu khu luchendo lwenolo tawe. Yavoolela musatsa wewe, “Lwa mwana aliitsa khuva namali khulekha khununa, niitsa khumuhila mu inzu yu Mwami Nyasaye, wa aliitsa khumenya shia khase khosi.”

²³ Elikana yamuvoolela, “Khola ka yivi mwene ulolanga ni malahi. Khola nushimenya hanu khutukha lwa mwana alekha khununa. Nzikombanga ndi Mwami Nyasaye wonyene akhurweshitsile lilaaka lia wamulaaka.” Khulwa yako, Hana yamenya hango, nalelanga mwana wewe khutukha lwa yalekha khununa.

²⁴ Lwa Hana yalekha khununyinya mwana, yavukula mwana, natsia halala ni shihunwa shili ni mihika chivaka, vusi tsikilo likhomi, nende shisiko nishitsule idivai. Yavukula Samweli, nashili mutititi, namuhila mu inzu yu Mwami Nyasaye mu litaala lia Shilo.

²⁵ Lwa vali nivamali khusinza shihunwa, vahila mwana mwenoyo khu Eli.

²⁶ Hana yamuvoolela, “Yivi mwami wanje, nuyaanza mbulishitsakhu hatititi. Unyala khumanyishitsa? Ninzi mukhali wa walola nasinjile hanu, nisaalanga khu Mwami Nyasaye.

²⁷ Nasaala nyole mwana uyu; khandi Mwami Nyasaye ukholele ka nali nindevi akholele.

²⁸ Khulwa yako, muhaananga nunundi khu Mwami Nyasaye. Aliitsa khurumishila Mwami Nyasaye khumatukhu keke kaliitsa khuva nashili mwoyo koosi.” Khulwa yako, vasaala khu Mwami Nyasaye nivaliyo.