RUTSI 4 - IBIBILIA INDAKATIFU MU LUTIRICHI LWITAKHO NENDE LWISUKHA

Rutsi nende Boazi Vahilana

¹ Lwa Boazi yasimukha natsia ha shilivwa shi litaala niyikhalaho, nonoho lwa mwiikho wa Rutsi wa hahimbi, wa Boazi yali nalomolomekhu, yatukhaho. Boazi yamulaanga, “Mulina wanje, hamba wikhale yaha.” Yatsiaho niyikhala hasi.

² Boazi yalaanga vasakhulu likhomi vimililanga litaala lienelo; navavoolela, “Yikhali hanu.” Nalwo lwa vikhalaho.

³ Nalwo lwa Boazi yavoolela mwiikho wewe mwenoyo, “Nahumi, ukalushi khurula Moabu, yenyanga khukuulitsa shitonye shiu mulimi shiali shia amwiru weru Elemeleki.

⁴ Ndoli nu vulahi nikhuvoolele makhuva kenako, makhuvoolele, ukuuli mulimi kwenoko, vandu vali hanu khandi vasakhulu vimililanga vandu vaanje nivalolanga. Niiva wenyanga, kuula. Navutswa niiva wambakhane khukuula, umbolele shichila mbulakhu mundu wundi unyala khukuula nikakhali yivi. Niiva uliitsa khulekha khukukuula, ninzi utsitsanga khukukuula.” Mwiikho mwenoyo yavoola, “Nzitsanga khukuula mulimi kwenoko.”

⁵ Nalwo lwa Boazi yavoola, “Nu vulahi muno, navutswa niiva uliitsa khukuula mulimi khu Nahumi, uliitsa khuvukula khandi Rutsi, mukhali mukhutsakhali wu mu shivala shia Moabu, khu mulimi kwenoko kutsililile khuva mu vandu vi inzu yu mundu wakhutsa khale mwenoyo.”

⁶ Mundu mwenoyo yavoola, “Niiva nikario shinyala khukuula mulimi kwenoko tawe; shichila kamanyinyanga ndi khali vaana vaanje shivaliitsa khumenya mukwo tawe. Yivi kenyekhanga ukuule mulimi kwenoko; navutswa inzi shingula mulimi kwenoko tawe.”

⁷ Mumatukhu kenako, vandu nivenyanga khukuulana via vali navio inoho khuchenganyinya miandu, khwali nu mwiima ndi mundu mulala ya navulanga shilaro shieshie maha mukuuli wu mulimi. Munjila yiyi, vandu Vaisiraeli vamanyinyanga ndi likhuva limali khuviritswa.

⁸ Lwa mundu mwenoyo yavoolela Boazi, “Khakuule mulimi kwenoko;” yanavula shilaro shieshie.

⁹ Nalwo lwa Boazi yavoolela vasakhulu nende vandu voosi, “Munyi voosi nunundi muli vashiahidi vaanje lwanguli khu Nahumi vindu viosi, viali via Elemeleki nende vaana veve Kilioni nende Maloni.

¹⁰ Mbukuli khali Rutsi warulanga mu shivala shia Moabu, mukhali wa Maloni yalekha lwa yakhutsa ave mukhali wanje. Yaka kalachila mulimi kutsililile khuva mu makhono ka vandu vi inzu yanga Elemeleki, khandi lwivulu lwelwe lulatsililila khuva mu vandu veve khandi mu litaala lielie. Muli vashiahidi va makhuva yaka nunundi.”

¹¹ Nalwo lwa vandu voosi vali nivasinjile ha shilivwa, halala na vasakhulu vavoola, “Khutsi khuli vashiahidi. Khwikombanga ndi Mwami Nyasaye alombe mukhali wowo ave khuli Raheli nende Leya, vivula vaana vanyishi khu Yakobo. Khwikombanga uve muhinda mu inzu ya Efuratsa, khandi uheelwi luyali mu litaala lia Betselehemu.

¹² Khwikombanga ndi vaana vu Mwami Nyasaye akhuha khuvirila mu mukhali muvukha uyu, valichila vandu vi inzu yoyo valiitsa khuva khuli vandu vi inzu ya Perezi, mwana wa Tamara yivula khu Yuda.”

Boazi nende Vitsukhulu Veve

¹³ Boazi yavukula Rutsi, manakwa mukhali wewe. Mwami Nyasaye yamukasitsa; yaheelitsa niyivula mwana wi shiyayi.

¹⁴ Nalwo lwa vandu vakhali vavoolela Nahumi, “Mwami Nyasaye yitsominywi! Ukhuheele koko muyayi nunundi wa nakhulinde vulahi vwene. Mwana mwenoyo aliitsa khuheelwa luyali shia havundu hosi mu Israeli!

¹⁵ Nakukhulu wowo wakhuyaanza, khandi wakhakhukholela makhuva makali muno khuvira vaana vi shiyayi saba. Umali khukhwivulila nunundi mwana wi shiyayi uliitsa khukhukhola uve nu vuyaanzi nu khukhulinda vulahi vwene nu wakhasakhula.”

¹⁶ Nahumi yavukula mwana manamulela, khandi namulinda vulahi.

¹⁷ Vakhali vamenyanga himbi hawenaho vakulikha mwana wi shiyayi mwenoyo wivulilwi lira Obedi. Vavoolela shia mundu wosi, “Nahumi wakhivulilwa mwana wi shiyayi.” Obedi yivula Yese, wivula Daudi.

¹⁸ Yaka nako mira ka vitsukhulu va Perezi: Perezi yivula Hezironi.

¹⁹ Hezironi niyivula Ramu; Ramu yivula Aminadabu;

²⁰ Aminadabu niyivula Nahashon. Nahashoni yivula Salamoni;

²¹ Salamoni niyivula Boazi. Boazi yivula Obedi;

²² Obedi niyivula Yese wivula Mwami Daudi.