RUTSI 3 - IBIBILIA INDAKATIFU MU LUTIRICHI LWITAKHO NENDE LWISUKHA

Rutsi Yanyola Musatsa Ukhumuhila

¹ Litukhu lindi, Nahumi wali nali nakukhulu Rutsi yavoolela Rutsi, “Mwana wi shikhana wanje, nu vulahi nikhuheenzele musatsa unyala khukhuhila, nikanyalikha uve na hango hoho mu milembe.

² Kenyekhanga umanye ndi khuli nu vwiikho nu mundu Boazi uyu, wamukholienje muhinzilu wa muhinzilenje na vahinzili vakhana veve. Lola! Nunundi halukolovo aliitsa khuva niyilulanga imu ishayiri havundu wu khwilulila.

³ Yisinji nunundi ulave khandi wiveshe makura malahi, mawifwale tsinguvu tsiotsio tsivetsanga tsindahi. Tsia havundu ha yilulilanga imu, navutswa ukhimanyinya uliho nashili khamala khulia nu khung'wa tawe.

⁴ Uheenze vulahi vwene havundu hava nakonanga. Lwa tsindolo tsiva ni tsiakhamuvukula, tsiaho umuvimbuli mulinjeti ma ukoneho. Aliitsa khukhuvoolela ka yenyanga ukhole.”

⁵ Rutsi yamuvoolela, “Nzitsanga khukhola shia shindu shiosi shiumbolela.”

⁶ Rutsi yasimukha natsia havundu ha Boazi yali nahinzililanga; nakhola shia shindu shiosi khuli Nahumi yali navooli akhole.

⁷ Lwa Boazi yali niyakhamala khulia nu khung'wa, yihulila vulahi mu mwoyo kwekwe. Boazi yasimukha natsia havundu ha shituma shi imu yali nili, nakona tsindolo. Rutsi yinjilaho kalaha, namuvimbula mulinjeti khandi nakona ha vilenje hehe.

⁸ Muvutukhu hakari, Boazi yavumbulukha mu tsindolo. Yali ni lichenya lwa yanyola mundu mukhali ukoni ha vilenje hehe.

⁹ Yamureeva, “Uli viina?” Yamuvoolela, “Ninzi Rutsi, uli murumishi wowo. Mbukula mbe mukhali wowo, shichila uli mwiikho weru.”

¹⁰ Boazi yamuvoolela, “Mwana wi shikhana wanje, Mwami Nyasaye akhukasitse. Umanyinyanga vulahi vwovwo khwinzi nunundi khuvira ka wakholela nakukhulu wowo. Kanyala khuva wakhavanga musatsa ushili muvukha unyala khukhuhila, ave muhinda inoho mumanani, navutswa ushili khumunyola.

¹¹ Navutswa khali nikava ninzi mwiikho wowo watoto, Rutsi, ukhaheenda mwoyo tawe. Nakhukholela shindu shiosi shia wenyanga. Shia mundu wosi wumenyanga mu litaala linu wamanya ndi uli mukhali wu mwiima mulahi.

¹² Navutswa ni kilikali ndi mwiikho wenyu wenyekhanga khukhuhila, khuliho nu mwiikho wundi wa hahimbi muno khumbira.

¹³ Ukone hanu vutukhu vunu, khu nuvwakhashia mu mavwevwe mureeve niiva anyala khuhuchilila khukhuhila uve mukhali wewe. Niiva aliitsa khwambakhana khuhuchilila khukhuhila, nzisuuhanga imbeli wu Mwami Nyasaye uli mwoyo ndi inzi mwene niitsa khuchinga musiko kwenoko. Khulwa yako, ukone hanu khutukha lwa vushia mu mavwevwe.”

¹⁴ Khulwa yako, Rutsi yakona ha vilenje hehe khandi, navutswa yavukha mu mavwevwe nuvushili khu shia shichila Boazi shiyenyanga mundu amanye ndi mukhali yali ukoni havundu ha vilulilanga imu tawe.

¹⁵ Boazi yamuvoolela, “Voholola shitambaya shioshio ma ushiale hasi hanu.” Rutsi yakhola khuli lwa yali navoolelwi, ma Boazi namusumiinya ishayiri himbi tsikilo makhomi kavili. Yamukhonya khwitiukha khu maveeka. Niyakhakhola ndio, yakalukha mu litaala nachinji musiko kwenoko.

¹⁶ Lwa yali niyakhatukha ingo, nakukhulu wewe yamureeva, “Mwana wi shikhana wanje, wachenda vulahi toto?” Rutsi yamuvoolela shia shindu shiosi shia Boazi yali namukholele.

¹⁷ Yatsililila khumuvoolela, “Boazi yasumiinya ishayiri iyi, shichila shiyenyanga ngalushi vutswa khu yivi makhono mele vuchila khukhulerelakhu shindu shiosi tawe.”

¹⁸ Nahumi yamuvoolela, “Rutsi, lindilila ulole katsitsanga khwikholekha; shichila Boazi shiatsitsanga khuhulukha nunundi nashili khuviritsa likhuva yili tawe.”