RUTSI 2 - IBIBILIA INDAKATIFU MU LUTIRICHI LWITAKHO NENDE LWISUKHA

Rutsi Yahinzila Mumulimi kwa Boazi

¹ Nahumi yali nu mwiikho walaangwangwa Boazi, mundu muhinda khandi wamanyikhana muno, warulanga mu vandu vu lwivulu lu musatsa wewe Elemeleki.

² Litukhu lindi, Rutsi yavoolela Nahumi, “Lekha nzi mu milimi khulokota imu ya vahinzili vivale inyuma. Ndi ni lisuuvila nanyolayo mundu wakhukhola naye mihinzilu.” Nahumi yamuvoolela, “Mwana wi shikhana wanje, khola ndio.”

³ Rutsi yasimukha natsia mu milimi, manavirila munyuma mwa vahinzili vali nivavirili khale, nalokotanga imu ya vali nivarichi inyuma. Kanyolekhana ndi yali mu mulimi kwa Boazi.

⁴ Tsisaa tsindititi nitsiakhavira, Boazi yatukhaho lwa yali niyakharula Betselehemu manashelitsa vahinzili; navavoolela, “Mwami Nyasaye ave na munyi!” Vamuvoolela khandi, “Mwami Nyasaye ave khandi nivi.”

⁵ Boazi yareeva muhinzili wasinjililanga vahinzili vandi, “Mukhali muvukha woyo ni viina?”

⁶ Muhinzili mwenoyo yamuvoolela, “Nu mwana wi shikhana khurula mu shivala shia Moabu wakalukha na Nahumi.

⁷ Andevi muhuchilile avirili munyuma mwa vahinzili nu khulokota imu. Akholi muhinzilu khurula mu mavwevwe khandi wakhahulukhakhu havundu ha shindu hatititi vutswa.”

⁸ Nalwo lwa Boazi yavoolela Rutsi, “Lekha khukhonye ninganakani. Ukhatsiakhu khulokota imu mu mulimi kundi kwosi kukhali yuku tawe. Khola muhinzilu na vakhali vali hanu.

⁹ Heenza ulole ha vavunanga wikhale navo. Mbolele vahinzili vaanje vavuli khukhusalilitsa tawe. Isaa yosi yuva nuhulila vuluhu, tsia ung'wi matsi kavitsulitsi mu tsinyungu.”

¹⁰ Rutsi yakwa hasi mahunama, navoolela Boazi, “Shichila shina umbendelanga mwoyo? Shichila shina wu kholelanga inzi mundu mucheni malahi?”

¹¹ Navutswa Boazi yamuchipa, “Mbolelwi shia shindu shiosi shia wakholela nakukhulu wowo khurula musatsa wowo nakhutsa; khandi khuli walekha tata wowo nende mama wowo khandi shivala shia wivulwamu manuwitsa khumenya mu vandu va wali nushili khumanyakhu khurula khale.

¹² Nzikombanga ndi Mwami Nyasaye wa Israeli akhuhe shihanwa khulondokhana khu koosi ka wakhola. Nzikombanga unyole shihanwa shiatoto khurula khu Mwami Nyasaye, uli Nyasaye wa Israeli wa wilushilakhu akhukhonye!”

¹³ Nalwo lwa Rutsi yamuvoolela, “Mwami Nyasaye, utsililile khumbendela mwoyo. Wakhanomba mbulilanga vulahi mu mwoyo lwa wakhanomolomela munjila indahi, khali niiva shiunyala khundekhanyinya khu mulala khu varumishi vovo tawe.”

¹⁴ Lwa isaa yu khulia shiukhulia yali niyakhatukha, Boazi yavoolela Rutsi, “Hamba hanu! Liakhu mukati yuku. Vukula shitonye shiu mukati utonjele mu ibakuli yi idivai yiyi.” Rutsi yalia khutukha lwa yikura ma shiukhulia shindi nishirikalakhu.

¹⁵ Lwa Rutsi yali natsitsanga khulokota imu, Boazi yavoolela vandu veve, “Leshi alokote imu mwamushili khuvuna! Leshi Khumukondeshela.

¹⁶ Nikhali, murulitsilikhu imu mu vituma via muvunjelitsi halala, khandi mwivale alokotemu. Muvuli khumukondeshela.”

¹⁷ Rutsi yatsililila khulokota imu mu mulimi khutukha halukolovo; khandi lwa yali niyakhahulaka imu yeneyo, yanyola inyala khutukha ishayiri himbi tsikilo likhomi.

¹⁸ Yavukula imu ya yali nalokote yeneyo natsia mu litaala khumanyinyakhu nakukhulu wewe. Yamuha khandi shiukhulia shiarikala khu shia yali naliilekhu.

¹⁹ Nahumi yamureeva, “Ni hena ha ulokote nunundi imu yiyi yosi? Mulimi kwa viina kulokotemu? Saalanga ndi Nyasaye akasitse mundu wakhuheendela mwoyo mwenoyo.” Rutsi yavoolela Nahumi ndi yakhakholanga muhinzilu mu mulimi ku mundu ulaangwangwa Boazi.

²⁰ Nahumi yahuka navoola, “Saalanga ndi Mwami Nyasaye akasitse Boazi! Mwami Nyasaye arweshitsanga lilaaka lielie shia khase khosi khu vandu vashili mwoyo khandi khu yavo vakhutsa.” Nahumi yatsililila khandi khuvoola, “Khuli nu vwiikho nu mundu mwenoyo, nu musahi kweru.”

²¹ Nalwo lwa Rutsi yamuvoolela, “Khali ye ambolele, ‘Wikhale hanu na varumishi vaanje khutukha lwa vamala khuchesa imu yanje yosi.’ ”

²² Nahumi yavoolela Rutsi, “Mwana wi shikhana wanje, nu vulahi nutsili khukhola mihinzilu na vakhana vamukholelanga muhinzilu yava, shichila nutsia khukhola mihinzilu mu mulimi ku wundi mundu, unyala khusalilitsilwamu.”

²³ Rutsi yatsililila khukhola mihinzilu navo, nalokota navo khutukha matukhu kukhuchesa ishayiri nende inganu kavwa; natsililila khumenya na nakukhulu wewe.