NEHEMIA 4 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Lwa Sanibalati yahulila ndi khumbakhanga lisisi, yali nu vurima vululu muno, naraanga khuchaya Vayahudi.

² Yavoola imbeli wa vakhonyani veve voosi nende mukaanda kwa vasikali va Samaria, “Ni shina shia Vayahudi vateteshele yava vakholanga? Vanyala khumbakha vuyia lisisi liavo kilikali? Vanyala khukhola misango chi kilikali? Vanyala khumala muhinzilu kwenoko khulitukhu lilala? Vakanakananga vanyala khukalushitsa machina khurula khu shituma shia mashindi kavunzukhana nu khulaalitswa nu mulilu yaka, khukalukha khuli kavetsanga?”

³ Tobia wali Muamoni, wali nali himbi khuye yavoola, “Lolikhu shia vumbakhanga! Khali shivwe nishininakhu, machina kavumbashilanga lisisi kanyala khuvunzukhana!”

⁴ Nasaala, nimbola, “Yivi Nyasaye weru, ukhuhulishitsi, shichila khuchaywangwa. Vanzila vutamanu vuchilanga nu khunyekwa. Vakumilwi nu khuhilwa khuli vavohe mu shivala shia vandu vi tsimbia tsindi.

⁵ Uvuli khwivililakhu vindu vitamanu via vakholanga, inoho khulekha khuvasemeha vwoni vwavo; shichila vakhukholi khuva nu vurima, lwa vanyekanga vumbashi.”

⁶ Khwatsililila khumbakha vuyia lisisi, khutukha lwa lisisi liosi liatukha hakari hene, shichila vandu vakhola muhinzilu nu mwoyo kwosi.

⁷ Navutswa lwa Sanibalati, Tobia, Vaharabu, Vaamoni nende vandu vi litaala lia Ashidodi, vahulila ndi muhinzilu kukhutsililila khumbakha vuyia lisisi lia Yerusalemi kutsilililanga khumbeli, khandi ndi makova kali nikalikukha mu lisisi kililitswangwa, vali nu vurima vunyishi.

⁸ Voosi vikhala nivavoolelana khuli vanyala khukwana Yerusalemi, nu khuraanjitsa vukoyanu mu litaala likali.

⁹ Navutswa khwasaala khu Nyasaye weru, nu khurovola vandu vanyala khukhulinda mbasu nu vutukhu khurula khuvo.

¹⁰ Navutswa vandu va Yuda, vavoola, “Khuvwele tsingulu lwa khwitiukhanga misiko militoho, khali khushili nindakala inyishi khurulitswaho. Khuvula tsingulu tsiu khutsililila khumbakha lisisi.”

¹¹ Khali vatsiku veru vavoola khandi, “Khali nivashili khumanya inoho khulola, khuliitsa khuvaseera, khwiira shia mundu wosi khuvo; nu khutivitsa muhinzilu kwavo.”

¹² Navutswa Vayahudi vamenyanga himbi navo, vali vamenya ni vakhuchelihitsanga, nivavoola, “Valiitsa khumukwana, khurulila shia havundu hosi ha vamenyanga.”

¹³ Navoolela vandu viyavaale vivavi, marimu nende vura, nivavikha inyuma wi lisisi havundu halolekhanga havulavu, nimbikhaho vandu vaanje khulondokhana khu tsinzivulu tsiavo, havundu ha khwali nu khushili khumalila lisisi.

¹⁴ Lwa nali ninakhalola khuli vindu vitsilililanga, nasinjila nimbolela vimilili, varumishi nende vandu valala khu vandu venavo, “Leshi khuria vatsiku veru. Mwitsushitse khuli Mwami Nyasaye, ali ni tsingulu tsinyishi khandi wenyekhanga khuheelwa luyali. Neye utsitsanga khukwanila vandu vi shivala shienyu, vaana venyu, vakhali venyu nende tsingo tsienyu.”

¹⁵ Lwa vatsiku veru vahulila ndi khumanyi ka valoshitsi, khandi khuli Mwami Nyasaye yali navikalili khurweshitsa ka vali nivaloshitsi khukhola, khutsi voosi khwichoma vulunji khu lisisi, shia mulala nu muhinzilu kwekwe.

¹⁶ Khuraanjila khulitukhu lienelo, inusu ya varumishi va nali nindi navo, vakhola muhinzilu ku khumbakha. Nikhali, yavo vali nivarikala viyavaala marimu, tsingavo, vura, khandi nivifwala tsinguvu tsiu khukwanila; ma vimilili veru nivasinjila inyuma wa vandu va Yuda,

¹⁷ vali nivumbakhanga lisisi. Khali yavo vachinganga vindu viu khumbashila, vakhola muhinzilu kwavo nu mukhono mulala, khandi nivakumila shiuchi nu mukhono kundi.

¹⁸ Shia mumbashi wosi yiyavaala shivavi shieshie mu shisiindi mwemwe, lwa yali nakholanga muhinzilu. Navutswa mundu wakhuvanga shisiliva yarikala ninzi.

¹⁹ Nalwo lwa navoolela vimilili, varumishi nende vandu vali nivarikala, “Muhinzilu kwa khukholanga nu munyishi; khandi lisisi lia khwahukhanyinya, khali shiukhulolananga vulahi tawe.

²⁰ Havundu hosi ha muliitsa khuhulila shisiliva nishikhuvwangwa, naho ha mutsitsanga khwiyunga na khutsi; shichila Nyasaye weru aliitsa khukhukwanila!”

²¹ Khwatsililila khukhola muhinzilu, inusu ya vandu niviyavaale marimu, khuraanjila mu mavwevwe khutukha lwa tsinyining'ini tsilolekhanga mu vutukhu.

²² Mumatukhu kenako, navoolela vandu, “Shia mulala khu munyi aliitsa khukhola nashirikala mu Yerusalemi vutukhu vunu, nikanyakha ave khuli mulindi mu vutukhu khandi khukhola muhinzilu mbasu.”

²³ Khali inzi inoho vamwavo vaanje inoho varumishi vaanje inoho valindi va nali nindi navo, khwalekha khunavula tsinguvu tsieru; shia mulala yali wiyavaale shiuchi shieshie mu mukhono.