NEHEMIA 3 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Mukali wa vasalisi voosi Eliashibu nende vasalisi veshie, varaanga muhinzilu ku khumbakha vuyia lisisi li Shilivwa shia Makondi. Valitakasa, nivarechekha khulio miliango. Valitakasa khali khutsia khutukha khu Munaara kwi Imia Indala nende Munaara kwa Hananeli.

² Vandu vi litaala lia Yeriko vumbakha vuyia luveka lundi lulonda khu lwelwe. Zakuri mwana wa Imuri yumbakha vuyia luveka lundi lulonda khu lwavo.

³ Tsinzivulu tsia vandu vi inzu ya Hasena tsiumbakha vuyia Shilivwa shi Tsisutsi. Navo varechekha tsirilu nende miliango chiashio; varechekhakhu vivia nende milondi chiu khwikala shilivwa shienesho.

⁴ Merenotsi mwana wa Uria, wali mwana wa Hakozi yumbakha vuyia luveka lundi lulondakhu. Meshulamu mwana wa Berekia, wali mwana wa Meshezabeli yumbakha vuyia luveka lulondakhu. Zadoko mwana wa Bahana yumbakha vuyia luveka lundi.

⁵ Vandu vi litaala lia Tekoha, navo vumbakha luveka lundi khu lwavo; navutswa vimilili vi litaala lienelo, vambakhana khukhola ni tsingulu muhinzilu kwa vimilili va vasinjililanga vali ni vavaheele khukhola.

⁶ Yohada mwana wa Paseha nende Meshalumu mwana wa Besodeya, navo vumbakha vuyia Shilivwa shia Yeshana. Varechekha mikulu nende miliango chiashio; vavikhakhu vivia nende milondi chiu khwikalila shilivwa shienesho.

⁷ Melatia wi litaala lia Gibioni, Yadoni khurula havundu halaangwangwa Meromotsi nende vandu va mataala ka Gibioni nende Mizipa, navo vumbakha luveka lundi, khali khutsia khutukha havundu ha gavana yamenyanga, khuluveka luli imbo wu Muchela kwa Efurate.

⁸ Uzieli mwana wa Harahaya, nali mwiraanyi wi vindu khu itsahabu yumbakha luveka lundi. Mundu walombanga makura ku khwivekha walaangwangwa Hanania yumbakha luveka lulondakhu, khali khutukha havundu ha Lisisi Liavambalala.

⁹ Refaya mwana wa Huri, nali mwimilili wamihanga inusu yu lusomo lwa Yerusalemi, yumbakha vuyia luveka lundi.

¹⁰ Yedaya mwana wa Harumafa yumbakha vuyia luveka lundi lulondakhu, lwali nululi khuluveka lundi khu inzu yeye. Hatushi mwana wa Hashabuneya yumbakha vuyia luveka lundi.

¹¹ Malukiya mwana wa Harimu nende Hashubu mwana wa Pahatsi-moabu, navo vumbakha vuyia luveka lundi lulondakhu nende Munaara kwa Ovenzi.

¹² Shalumu mwana wa Haloheshi, nali mwimilili wamihanga inusu yu lusomo lwa Yerusalemi yumbakha vuyia lusomo lundi lulondakhu. (Mwana wewe wi shikhana yakhonyana muhinzilu kwenoko.)

¹³ Mundu walaangwangwa Hanuni nende vandu vi litaala lia Zanoha, navo vumbakha vuyia Shilivwa shiu Luhoongo; vumbakha shilivwa shienesho, nivarechekha miliango, vivia nende milondi khushio. Vumbakha vuyia lisisi tsimita 440, khali khutsia khutukha khu Shilivwa shiu Masiingo.

¹⁴ Malukiya mwana wa Rekabu, wali nali mwimilili wu lusomo lwa Betsi Hakukeremi, yumbakha vuyia Shilivwa shiu Masiingo. Yarechekhakhu miliango, vivia, nende milondi chiu khwikala shilivwa shienesho.

¹⁵ Shalumu mwana wa Koluhozehi, wali nali mwimilili wamihanga lusomo lwa Mizipa, yumbakha vuyia Shilivwa shiu Musinji. Yakhunikha vwinjililu vwi shilivwa khandi narechekhakhu miliango, vivia, nende milondi chiu khwikala. Yumbakha lisisi lili himbi khu mulimi kwa vandu vi inzu yu vwami, ha lituvwi lialaangwangwa Lituvwi lia Shela, khali khutsia khutukha khu viko viu khuseenakhu nu kholomokhanga khurula mu litaala likali lia Daudi.

¹⁶ Nehemia mwana wa Azibuku, wali nali mwamihi wu lusomo lundi lwa Betsi-zuri, yumbakha vuyia lusomo lundi, khali khutsia khutukha khu Shilindwa shia Daudi, lituvwi, nende havundu ha vasikali vamenyanga.

Vandu Vuluhia lwa Levi Vahinzila khu Lisisi

¹⁷ Vandu vuluhia lwa Levi va mira kavo kahandikwa yava, navo vumbakha vuyia tsimbeka tsindi tsilondakhu tsi lisisi. Rehumu mwana wa Bani, yumbakha vuyia luveka lundi lulondakhu. Mwamihi Hashabia wamihanga inusu yu lusomo lwa Kehila, yumbakha vuyia luveka lulondakhu havukono wu lusomo lwelwe;

¹⁸ Binuhi mwana wa Henadadi, nali mwamihi wi inusu yindi yu lusomo lwa Kehila, yumbakha vuyia luveka lundi lulondakhu.

¹⁹ Ezeri mwana wa Yeshwa, nali mwamihi wi litaala lia Mizipa, neye yumbakha luveka lundi luli imbeli wa havundu ha vavikhanga viuchi, khali khutsia khutukha havundu hi lisisi liashiamila.

²⁰ Baruku mwana wa Zabahi neye yumbakha vuyia luveka lundi lulondakhu, khali khutsia khutukha mu vwinjililu vwi inzu yu Mukali wa vasalisi voosi Eliashibu.

²¹ Meremotsi mwana wa Uria, mwana wa Hakozi, yumbakha vuyia luveka lundi, khali khutsia khutukha khundulu khwi inzu ya Eliashibu.

Vasalisi Vakhola Muhinzilu khu Lisisi

²² Vasalisi navo vumbakha vuyia munyuma mwemwe, tsimbeka tsindi lukanu tsi lisisi. Vasalisi venavo vali vu lusomo luli himbi Yerusalemi.

²³ Benyamini nende Hashubu, navo vumbakha vuyia luveka lundi lwali imbeli wi inzu yavo. Azaria mwana wa Maseya, mwana wa Anania neye yumbakha vuyia luveka lundi lwali imbeli wi inzu yavo.

²⁴ Binuhi mwana wa Henadadi, yumbakha vuyia luveka lundi yolo, khuraanjila khu inzu ya Azaria khutsia khutukha mumbeka yi lisisi.

²⁵ Palali mwana wa Uzahi, yumbakha vuyia luveka lundi, khuraanjila mumbeka yi lisisi nende munaara kwi inzu yu vwami himbi mu lwanyi lwa valindi. Pedaya mwana wa Paroshi, yumbakha vuyia munyuma mwemwe;

²⁶ nende varumishi vakholanga muhinzilu mu Litempeli vali nivamenya Ofeli, navo vumbakha vuyia luveka lundi nivatukha havundu handi ivukwi, himbi ha Shilivwa shia Matsi nende munaara muraambi kwaliho hambeli.

Mira ka Vumbashi Vandi

²⁷ Vandu va valonda mu likhola muhinzilu inyuma wavo, ni vandu vi litaala lia Tekoha. Navo vumbakha vuyia luveka lundi yolo. Nalwo lwali lwa khavili, khuraanjila havundu handi khuluveka luli khu munaara mukali kuli hambeli, khali khutukha khu lisisi lili himbi Ofeli.

²⁸ Vasalisi navo vumbakha vuyia havundu handi ikulu hi Shilivwa shi Ifarasi; shia mulala yumbakha khuluveka lundi lwi inzu yeye mwene.

²⁹ Zadoko mwana wa Imeri, yumbakha vuyia luveka luli khuluveka lundi himbi khu inzu yeye, munyuma mwavo. Shemaya mwana wa Shekania, mundu walindanga Shilivwa shi Ivukwi, neye yumbakha vuyia luveka lundi lulondanga lwavo.

³⁰ Hanania mwana wa Shelemia nende Hanani, mwana wa sita wa Zalafu yumbakha vuyia luveka lundi lwa khavili yolo. Meshulamu mwana wa Berekia, yumbakha vuyia luveka lundi lwali imbeli wi inzu yeye.

³¹ Malukiya, wali mulala khu vandu viraanyi vi vindu khurula khu itsahabu, yumbakha vuyia luveka lundi, khali khutsia khutukha khu inzu ya varumishi vi Litempeli nende vandu vakholanga vukhala, khuluveka lundi himbi khu Shilivwa shia Mifikadi, khandi havundu handi ikulu mukena mwi lisisi khuluveka luli ivuluka imbo.

³² Vandu viraanya vindu khurula khu itsahabu nende vakholanga vukhala, vumbakha vuyia luveka lundi lukhumalilikha, khuraanjila havundu handi mumbeka khali khutsia khutukha khu Shilivwa shia Makondi.