NEHEMIA 13 - IBIBILIA INDAKATIFU MU LUTIRICHI LWITAKHO NENDE LWISUKHA

Khwiyahula Haluveka Khurula khu Tsimbia Tsindi

¹ Khulitukhu lienelo, Malako ka Musa kasomwa ikulu nu mwoyo mukali, vandu nivakahulilanga; khandi vasoma havundu ha kali nikahandikwa ndi mundu avulakhuho wosi, ave Muamoni inoho Mumoabu anyala khuhuchililwa khwinjila mu shikhaalo shia Nyasaye;

² shichila vandu venavo vambakhana khuha Vaisraeli shiukhulia nende matsi, navutswa vali vasamulitsa Balamu khuvalaama. Khali ndio, Nyasaye weru yakalukhanyinya shilaamo shienesho khulera tsikhaavi.

³ Lwa vandu vahulila malako kenako, vahula haluveka vandu vi tsimbia tsindi tsiosi khurula mu Israeli.

Muhinzilu Chilikalukhanyinya chia Nehemia Yraanjitsa

⁴ Shikholwa shienesho nishishili khwikholekha, musalisi Eliashibu yali warovolwa khusinjilila tsinzu tsi livishilu li Litempeli lia Nyasaye weru; khandi wali mwiikho wa Tobia,

⁵ khandi yali waha Tobia inzu ingali ya vavikhamu vihanwa vi imu, vubani nende vindu viarumikhanga mu Litempeli, injeso yi imu, idivai, nende makura ka vandu vu lwivulu lwa Levi vaheelwa varumishile, vandu vimbanga tsinyimbo nende valindi vi vilivwa venyekhanga khuheelwa, khali khumeetakhu vindu via vasololanga khulu khuha vasalisi.

⁶ Navutswa lwa shikholwa shienesho shiali nishikholekhanga, shinali nindi mu Yerusalemi tawe, shichila khumuhika kwa makhomi kavaka na chivili nali natsia khulola Mwami Aratashasita wa Babilonia. Matukhu mati nikakhavira, nareeva Mwami Aratashasita nayaanza ambe vwiyangu vu khuhulukha,

⁷ maningalukha Yerusalemi. Nalwo lwa niitsa khumanya vutamanu vu musalisi Eliashibu yali nakholi, lwa yalombela Tobia inzu mu lwanyi lwi Litempeli lia Nyasaye.

⁸ Khulwa yako, nali nu vurima vunyishi, manisiuva ilwanyi vindu viosi via Tobia yarumishilanga mu inzu yeneyo.

⁹ Nahaana lilako, manivatakasa inzu yeneyo. Khu, nakalushitsamu vindu viali vi Litempeli lia Nyasaye, halala ni vihanwa vi imu nende vubani.

¹⁰ Niitsa khumanya khandi ndi vandu vu lwivulu lwa Levi vali nivali khuheelwa vindu via venyekhanga vave nivanyolanga. Khulwa yako kachila vandu vu lwivulu lwa Levi nende vimbanga tsinyimbo, nivali yavo vakholanga muhinzilu khwilukha, shia mulala khukalukha mu mulimi kwekwe.

¹¹ Nakondeshela vimilili nivareeva, “Shichila shina mwivilila Litempeli lia Nyasaye?” Navavunjelitsa halala nivavoolela vakalushi khukhola muhinzilu kwavo ha vakholanga.

¹² Khali ndio, vandu voosi va Yuda valera injeso yavo yi imu, idivai nende makura mu tsinzu tsi livishilu.

¹³ Narovola musalisi Shelemia, mwechitsi wa malako Zadoko, nende mundu wundi warulanga mu vandu vu lwivulu lwa Levi walaangwangwa Pedaya, khusinjilila tsinzu tsi livishilu. Narovola Hanani mwana wa Zakuri, mwana wa Matania khuva mukhonyani wavo, shichila vandu venavo vali vavukulwa khuva vasuuvilwa. Vaheelwa muhinzilu ku khukavulila veshie vindu via venyekhanga khuheelwa.

¹⁴ Yivi Nyasaye wanje, unzitsushitse, khulondokhana khu kenako; khandi uvuli khwivilila vikholwa vilahi, via nakhola mu Litempeli liolio yivi Nyasaye nende muhinzilu kwokwo kwosi kukholeshelamu.

¹⁵ Mumatukhu kenako, nalola vandu va Yuda nivakhamululanga matunda ki misabibu khulitukhu li Lisabato; khandi vandi nivachinganga khu tsipunda tsiavo vivoho vi imu, idivai, matunda ki misabibu, makhuyu nende misiko chindi vutswa khulera Yerusalemi khulitukhu li Lisabato. Mumatukhu kenako, navachelihitsa vavuli khukuulitsa shiukhulia.

¹⁶ Vandu valala khandi khurula mu litaala lia Tiro, vamenyanga mu litaala likali, valeranga tsisutsi nende vindu vindi vinyishi lukanu na lukanu, mavakuulitsila vandu vamenyanga Yuda nende Yerusalemi khulitukhu li Lisabato.

¹⁷ Khulwa yako, nakondeshela vimilili va vandu vamenyanga Yuda, nivareeva, “Ni shikhola shina shitamanu shia mukholanga--mukholanga litukhu li Lisabato khuvula khuva litakatifu?

¹⁸ Shikali katoto vakuuka venyu vakhola malala mele, khandi shikali nako kachila Nyasaye weru nakhukhola khukwa mu matiinyu, halala ni litaala likali lieru? Khali ndio, mutsilililanga khukhola Nyasaye khulolela Vaisraeli vurima lwa mukholanga litukhu li Lisabato khuvula khuva litakatifu.”

¹⁹ Khu, lwa shivala shiaranga khumwama ha vilivwa via Yerusalemi, litukhu li Lisabato nilishili khutukha, nahaana lilako miliango khwikalwa maningaya mundu wosi khuvula khwikulakhu miliango chienecho, litukhu li Lisabato nilishili khuvira. Nalwo lwa narovola valala khu varumishi vaanje khusinjilila vilivwa vienevo, khwikalila misiko chia vandu vachinganga nivaleramu khulitukhu li Lisabato.

²⁰ Vandu vakholanga vukhala inoho vakuulanga vindu lukanu na lukanu vakona vutukhu ilwanyi wi litaala lia Yerusalemi, khulitukhu lilala inoho kavili.

²¹ Navutswa navachelihitsa nu vululu, nimbola, “Shichila shina mukonanga vutukhu vwosi himbi khu lisisi? Niiva mulakalushila khukhola ndio namusalilitsa.” Khuraanjila khulitukhu lienelo, shivakalukhakhuyo khulitukhu li Lisabato tawe.

²² Khu, navoolela vandu vu lwivulu lwa Levi vitakase vene, nu khutsia khulinda vilivwa, khukhola litukhu li Lisabato khutsililila khuva litakatifu. Nyasaye wanje, saalanga ndi unzitsushitse khandi khulondokhana khu kenako; khandi undolele tsimbavasi khurulana khu vuyaanzi vwovwo vunyishi.

²³ Mumatukhu kenako, nalola khandi Vayahudi vali nivahila vakhali khurula Ashidodi, Amoni nende Moabu.

²⁴ Inusu ya vaana vavo valomoloma lulomolomo lwa vandu va Ashidodi, navutswa vakhaywa khulomoloma lulomolomo lwa vandu va Yuda; nikhali lulomolomo lwa vandu vi tsimbia tsindi.

²⁵ Navakondeshela khandi nivalaama. Narumula vasatsa venavo, khuvanyiilanyiila liswi khu mirwi chiavo. Nachila nivisuuha khuvirila khu lira lia Nyasaye, nimbola, “Muvuli khuvekha vaana vi shikhana venyu khu vaana vi shiyayi vavo, inoho vaana vi shikhana vavo khu vaana vi shiyayi venyu inoho munyi vene khuvahila.

²⁶ Shikali katoto ndi Mwami Solomoni wa Israeli yakhola vwoni, shichila yali wahila vakhali khuli venavo? Mu vandu vi tsimbia tsindi tsiosi, mwami avulakhuho wali khuli Mwami Solomoni. Nyasaye wewe yali wamuyaanza, khandi neye wamurovola khuva Mwami wa Israeli. Khali ndio, vakhali vi tsimbia tsindi va yali niyahila, navo vachila nakhola vwoni.

²⁷ Khulwa yako, ni kilikali mulolanga nu vulahi khumuhulishitsa munyi nu khukhola mwima mutamanu yuku khu Nyasaye weru, lwa khuhilanga vakhali khurula mu vandu vi tsimbia tsindi?”

²⁸ Yohada yali mwana wu Mukali wa vasalisi voosi Eliashibu; navutswa mulala khu vaana va Yohada venavo, yali wahila mwana wi shikhana wa Sanibalati, mundu wi litaala lia Betsi-horoni; namukhunga khurula imbeli wanje shichila kenako.

²⁹ Nyasaye wanje, saalanga ndi witsushitse, vandu venavo, shichila vononyinya vandu vuluhia lu vusalisi, lilakano lia vasalisi nende lia vandu vu lwivulu lwa Levi.

³⁰ Nalwo lwa natakasa vandu khurula mu vindu vi tsimbia tsindi viosi; khandi ningavila vasalisi nende vandu vu lwivulu lwa Levi mihinzilu chiu khukhola. Shia mundu wosi yakhola mwene muhinzilu kwekwe.

³¹ Nahaana khandi tsikhuyi tsiu khusambila vihanwa viu khusambwa mumatukhu kenyekhanga; khandi nimbolela vandu khulera vihanwa viavo vi imu yu khuraanga khucheswa nende matunda ku khuraanga khwenga. Nyasaye wanje, saalanga ndi witsushitse kenako koosi, ma ungasitsi.