NEHEMIA 1 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Yaka nako makhuva kahandikwa khulondokhana khu ka Nehemia mwana wa Hakalia yakhola. Khumweli kwa Kisilevu, khumuhika kwa makhomi kavili, lwa nali nindi mu litaala likali lia Susa,

Khuli Nehemia Yaheendela Mwoyo Yerusalemi

² mulala khu vamwavo vaanje Hanani yatukhaho, halala na vandu vandi khurula Yuda. Namureeva makhuva shichila Vayahudi vashieru vali nivihonolokha khuhilwa mu vuhaambe, khandi mareevo kandi khulondokhana khu litaala likali lia Yerusalemi.

³ Vanjipa, “Vandu vihonolokha khuhilwa mu vuhaambe, vamenyanga mu lusomo lwenolo vavirilanga mu vutiinyu vunyishi nu khuheelwa tsisoni. Lisisi lia Yerusalemi limali khupomolanyinywa, khandi vilivwa vi litaala likali vialaalitswa nu mulilu.”

⁴ Lwa nahulila makhuva kenako koosi, nikhala hasi nindanga khulila. Natsililila khwikhula khumatukhu manyishi, khuhonga vuchila khulia, nu khusaala khu Nyasaye wu mwikulu.

⁵ Nalwo lwa nasaala nimbola, “Yivi Mwami Nyasaye, uli Nyasaye uli mwikulu, nivi wi tsingulu khandi warilwa. Nivi urweshitsilanga lilakano yavo vakhuyaanza khumatukhu koosi, khandi valondanga malako koko.

⁶ Mwami Nyasaye, hulishitsa lisaala lianje inzi murumishi wowo, lwa saalilanga varumishi vovo, nivali Vaisraeli mbasu nu vutukhu. Nziyamanga havulavu ndi khali inzi nende Vaisraeli khwakhola vwoni imbeli wowo. Ni kilikali, inzi nende vakuuka vaanje khwakhola vwoni.

⁷ Khwakhola vutamanu imbeli wowo. Khwayivilila khulonda malako, mivaalo, nende mechitso koko ka wakhuha khuvirila khu murumishi wowo Musa.

⁸ Yitsushitsakhu nunundi makhuva ka wavoolela murumishi wowo Musa; lwa wavoola, ‘Niiva muliitsa khusambakhana khuva vasuuvilwa, niitsa khumusalanyinya mu vandu vi tsimbia tsindi.

⁹ Navutswa niiva muliitsa khukalukha khwinzi, mulonde malako kaanje nu khukakhola, khali niiva muliitsa khuva mwasalanyinywa ihale wene khulilova, niitsa khumulera halala khandi khurulayo khumura havundu handovole, ha mutsitsanga khusaalanga khwinzi.’

¹⁰ “Vaisraeli ni varumisahi vovo yivi Mwami Nyasaye. Navo va yivi mwene wahavina, khuvirila mu tsingulu tsiotsio tsinyishi nende vunyali vwovwo.

¹¹ Mwami Nyasaye, nuyaanza umbulishitsi inzi murumishi wowo nunundi, khuli saalanga khu yivi; khandi khuli varumishi vovo, yavo vayaanza vakhuheetsanga luyali, vasaalanga khu yivi. Umbe inzi murumishi wowo likuura nunundi, khandi ukhole Mwami wa Perisia khundolela tsimbavasi.” Mumatukhu kenako, ninzi wali murumishi waheetsanga Mwami wa Perisia idivai yeye yu khung'wa.