MWILWATSI 9 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Navutswa nakanakana makhuva khu vindu vienevo viosi, manimalila ndi Nyasaye neye ulindanga vandu vi likhola liu vulunji nende vandu vali nu vusitsa mu vikholwa viavo via vakholanga viosi; khali nikava nu vuyaanzi inoho vuhimwa shivulakhuho shiu mundu amanyi. Shia shindu shiosi shia valolanga ni shikhaya;

² shichila kakwilanga mundu mulala, nako kakwilanga voosi, vave vandu vi likhola liu vulunji nende vatamanu, valahi nende vakholanga vindu vitamanu, vaseletse nende voneshe, vakholanga musango nende vavulanga khukhola musango. Mundu wu kholanga vindu vilahi shiaviri mundu mwoni tawe; khandi mundu wisuuhanga shiaviri woyo wambakhane khwisuuha tawe.

³ Yishi nashio shindu shitamanu mu vindu viosi vikholekhanga mu shivala shinu: Kakwililanga mundu mulala, nako khandi kakwililanga vandu voosi. Vandu vakanakananga nu mwoyo kwosi khukhola vindu vitamanu; khandi valolekhanga khuli valalukha khumatukhu koosi ka vashili mwoyo. Kenako nikamali khuvwa, vakhutsanga ma mivili chiavo chiyeveelwa mu shilindwa.

⁴ Navutswa mundu uli nu vulamu mu shivala shinu, ali ni lisuuvilitswa, shichila isiimbwa ishili mwoyo yavira isimba imali khukhutsa.

⁵ Vuchila khuveha, vandu vashili mwoyo vamanya ndi ni kilikali valiitsa khukhutsa; navutswa vandu vakhutsa shivamanyakhu shindu shosi tawe. Vavula shihanwa shivanyala khunyola. Mundu avulakhuho unyala khuvitsushitsakhu.

⁶ Vindu viosi via vakholanga nivashili mwoyo viativa khale navo, kave vuyaanzi, vuhimwa nende khushendekha; shivatsitsanga khusangakhu khandi mu shia shindu shiosi shikholekhang mu shivala shinu tawe.

⁷ Mutsililile khukhola ka mwenyanga! Mukhole numulia shiukhulia shienyu numwikhoya, khandi mung'wi idivai yenyu numusangala; shichila Nyasaye wamala khulola ndi ka mukholanga ni malahi khuye.

⁸ Shia khase khosi muve nu vuyaanzi, mamusangale.

⁹ Wikhoye nu mukhali wowo wa wayaanza khumatukhu koosi ki shikhaya, ka ushili mwoyo mu shivala shia Nyasaye yakhuleramu yishi; shichila navwo vwiyangu vwovwo mu limenya khandi mu muhinzilu kwa wu kholanga mu shivala shinu.

¹⁰ Ukhole shia shindu shiosi shia wu kholanga nu vunyali vwovwo vwosi; shichila muhinzilu kwosi inoho tsinganakani inoho vucheli inoho vusitsa, shiuvulakhuho shinyala khunyolekha mu shihatisi, nali havundu ha mutsitsanga khumenya.

¹¹ Nalwo lia namanya khandi ndi vilukhachi vamanya khwilukhaka vwangu, shivali navo vatukhanga khu mukoye vwangu vandi nivashili khutukhakhu, inoho vasikali vi tsingulu shivali navo vakuuranga liihe; inoho vandu vali nu vusitsa, shivali navo vanyolanga shiukhulia shia valia tawe; inoho vandu vali nu vucheli, shivali navo vanyolanga miandu tawe; inoho khandi vandu vamanya khukhola muhinzilu, shivali navo vaheelwangwa luyali tawe; navutswa shia mundu wosi anyolanga ikhaavi yeye mu vwiyangu vwevwe.

¹² Khali mundu avulakhuho wamanya lwa isaa yeye iliitsa khutukha. Vali vutswa khuli tsisutsi tsia valuvilanga mu ineti indamanu; khuli manyonyi ka vakumililanga mu mureeko. Vandu vareekwangwa nu khukumilwa mu tsisaa tsindamanu tsia vashili khumanyikhu.

Makhuva khu Vusitsa nende Vuyiingwa

¹³ Yishi nashio shimanyilu shiu vusitsa shia nalola khandi mu shivala shinu; khandi nashio shia nyanzitsa muno:

¹⁴ Mumihika chindi litaala lindi lialiho, navutswa isavu ya vandu vati vonyene vutswa, navo vamenyanga mulio. Litukhu lindi, mwami wi tsingulu tsinyishi yalikwana, nalivotokhana, niyirechekha khuli anyala khwinjila mulio khuvirila mu masisi.

¹⁵ Navutswa mundu mumanani wali nali nu vusitsa yamenyanga mulio; yahonyinya litaala lienelo khurulana khu vusitsa vwevwe vwa yali navwo. Nikhali, khali mundu avulakhuho witsushitsakhu mundu mumanani mwenoyo.

¹⁶ Navutswa mbolanga katoto ndi khuva nu vusitsa khwavira khuva nu vunyali; khali niiva mundu mumanani wali nu vusitsa yalechelitswa, khandi vandu nivambakhana khumuhulishitsakhu.

¹⁷ Khuhulishitsa makhuva ku mundu uli nu vusitsa alomolomanga nahonjeli khwavira khulaanjilila khwa mwamihi alaanjililanga mu shikhaalo shia vandu vayiingwa.

¹⁸ Khuva nu vusitsa khwavira khukwanila viuchi; navutswa mwoni mulala achilanga vindu vilahi vionekha.