MWILWATSI 8 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Ni viina wilekhanyinyanga khu mundu uli nu vusitsa? Ni viina unyala khwivaala shivune shichilanga vindu nivikholekha? Vusitsa vuchilanga mundu amwenya mumoni mwemwe, vulombanga mundu uli nu vuveleli mu mwoyo akalukhana.

Muhe Mwami Wamihanga Luyali

² Utsililile khulonda malako ku mwami, shichila nako ka wisuuha ulakhola khu Nyasaye vuchila liheenda mwoyo.

³ Uvuli khutsililila khwikhala naye, inoho khwilola shichila vindu vitamanu, lwa mwami akholanga ka mwene alolanga ni malahi.

⁴ Shia likhuva liosi liu mwami alomolomanga lili nu vunyali. Ni viina unyala khumureeva, “Ni shina shia wu kholanga?”

⁵ Mundu ulondanga malako keke, aliitsa khuvula khusalilitswa. Mundu uli nu vusitsa wamanya inyinga yenyekhananga khandi ka mwene anyala khukhola.

⁶ Shia shindu shiosi shikholekhanga mu tsinyinga tsienyekhanga, khandi khuli kenyekhananga khukholwa, khali niiva vandu vavirilanga mu linyakhana.

⁷ Ni kilikali, mundu avulakhuho wamanya katsitsanga khwikholekha mumatukhu kaliitsa khuvaho. Ni viina unyala khukhuvoolela khuli kaliitsa khwikholekha?

⁸ Mundu avulakhuho khali mulala khu khutsi, unyala khukhwikalila khukhutsa inoho khwikalila litukhu lieru liu khukhutsa. Mundu avulakhuho unyala khwilukha khukwana mu liihe, inoho khwihonyinya khurula mu vutamanu vwa mwene akholanga.

Vandu Valunji nende Vatamanu

⁹ Inzi mwene nalola kenako koosi ni kakholekhanga, lwa nakanakana makhuva khu vindu vikholekhanga mu shivala, mwa vandu vi tsingulu vanyashitsanga vandu vavula tsingulu.

¹⁰ Nalwo lwa nalola vandu vatamanu nivamali khuyeveelwa mu vilindwa. Vali vamenya nivinjilanga Havundu Hatakatifu khandi nivarulayo. Vandu vandi va vitsominyilanga mu litaala likali, wa vandu venavo vakholelanga vindu vienevo. Khali kenako koosi ni shikhaya vutswa.

¹¹ Lwa mundu ukholi vutamanu avulanga khukhalachilwa vwangu, vandu vikombanga mu mioyo chiavo khwirechekha khukhola vindu vitamanu.

¹² Navutswa khali niiva mundu mwoni wamenya hali khanyishi nakholanga vwoni, nu khutsililila khuhindila; namanya vulahi ndi vandu vaheetsanga Nyasaye luyali, valiitsa khumenya limenya lilahi, lwa vamuheetsanga luyali.

¹³ Navutswa mundu mutamanu aliitsa khuvula khuhindila. Vulamu vwevwe vuli vutswa khuli shinini, shichila wa yambakhana khuha Nyasaye luyali.

¹⁴ Navutswa kenako koosi ni shikhaya vutswa. Lolikhu, yaka nako kakholekhanga mu shivala shinu: Matukhu malala vandu vi likhola liu vulunji vasalilitswangwa, shichila vikholwa via vandu vatamanu vakholanga. Vandu vatamanu vasalilitswangwa shichila vikholwa via vandu vi likhola liu vulunji vakholanga. Ni kilikali, khali kenako koosi ni shikhaya vutswa.

¹⁵ Khulwa yako, nzitsominyanga yavo vali nu vuyaanzi mu ka vakholanga mu limenya liavo; shichila mundu avulakhu shindu shilahi shia akholanga mu shivala shinu, khuvira khulia nu khung'wa khandi khuva nu vuyaanzi mu limenya lielie. Namali khukhola kario, nalwo lwa yihulilanga ali nu vuyaanzi mu muhinzilu kwekwe kwa mwene akholanga, nu kuli kwa Nyasaye yamuha akhole mu shivala shinu.

¹⁶ Lwa nali ninganakani yu khwenya khumanya makhuva khu vusitsa, khandi khulola khuli vindu vikholekhanga mu shivala shinu, khuli mundu yambakhana khukonakhu tsindolo mbasu nu vutukhu;

¹⁷ nalwo lwa nalola muhinzilu kwosi kwa Nyasaye akholanga. Mundu avulakhuho wamanyakhu muhinzilu kukholekhanga mu shivala shinu. Khali niiva mundu akholanga muhinzilu kwekwe ni tsingulu tsietsie tsiosi, shianyala khumanyakhu shikholekhanga tawe. Khali niiva mundu uli nu vusitsa alolanga ndi wamanya vulahi vwene, avulakhu shindu shia yamanyakhu khu kenako.