MWILWATSI 4 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Nalwo lwa nalola khandi khuli vandu vatambitswangwa mu shivala shinu. Vandu vatambitswangwa valilanga tsikhwili, vuchila mundu unyala khuvaleminya mwoyo! Vandu va vatambitsanga vali ni tsingulu tsinyishi khuvalechelela; vuchila mundu unyala khuvaleminya mwoyo.

² Nakanakana makhuva shichila vandu vakhutsa, khuli vali ni ikhaavi khuvira khali yavo vashili mwoyo nunundi.

³ Navutswa woyo ushili khwivulwa ali ni ikhaavi khuvira voosi; shichila ashili khukholakhu vindu vitamanu vikholekhanga mu shivala shinu.

⁴ Nalwo lwa niitsa khulola ndi, lishiendekha lia mundu alolelanga mureende wewe, nalio lichilanga nakhola muhinzilu kwekwe kwosi ni tsingulu khandi khuvirila mu vucheli vwa yeka mwene. Khali kenako khandi ni shikhaya; khandi kali vutswa khuli mundu wilukhanyinyanga vushindu.

⁵ Mundu muyiingwa yambakhananga khukholakhu muhinzilu kwosi; navutswa achilanga inzala imumala.

⁶ Nu vulahi khuva nashio shiti nu mwoyo mulahi khuvira khuva navio vinyishi, khuvirila mu vutiinyu; kali vutswa khuli mundu yilukhanyinyanga vushindu.

⁷ Nalola khandi vindu vi shikhaya vutswa via vandu vakholanga mu shivala shinu.

⁸ Nalola mundu mulala wumenyanga wonyene vuchila mwana wosi inoho amwavo wewe; khali ndio, atsilililanga khukhola muhinzilu. Miandu chiali nachio chishili khumutukha; khali shialekhanga khureeva, “Ni viina wakholelanga muhinzilu nu khuvula khuva nu vuyaanzi?” Khali kenako ni shikhaya; khandi nu muhinzilu kuvula vuyaanzi.

⁹ Nu vulahi khuva vavili khuvira khuva mundu mulala wonyene, shichila nivali halala vakholanga muhinzilu kwavo vulahi vwene.

¹⁰ Khali niiva mulala khuvo aliitsa khukwa hasi, weshie anyala khumusinjilitsa. Navutswa ali khu vutiinyu muno mundu wumenyanga wonyene nakwili hasi, vuchila mundu unyala khumusinjilitsa!

¹¹ Khumeeta khu kenako, khali vandu vavili nivakoni halala, vanyolanga luya; navutswa mundu anyala khunyola luya munjila shina niyamenya wonyene vutswa?

¹² Khali niiva mundu nali wonyene anyala khukuurwa nu mutsiku, vavili vanyala khumukwana nu khumukuura. Mukoye kwavaswa hali khavaka, kunyala khuvula khukatuukha vwangu.

¹³ Nu vulahi khuva nu muvukha mumanani uli nu vusitsa khuvira khuva nu mwami wasakhula uli muyiingwa, wambakhananga khuhulishitsa inganakani indahi;

¹⁴ khali niiva yali wavohololwa khurula mucheela niyikhala khu shisoko shiu vwami, inoho mu vwami vwevwe yali wayivulwa mu vandu vi inzu yu vumanani.

¹⁵ Nalola vandu voosi vali mwoyo mu shivala shinu, khali muvukha mwenoyo, nali woyo wali natushili khwamiha havukono wu mwami tsana.

¹⁶ Khwaliho na vandu vanyishi khuvirana. Neye wa vamihanga voosi. Khali ndio, yavo vivulwa namali khwamiha, vambakhana khumwitsominya. Ni kilikali, khali kenako ni shikhaya vutswa; khandi kali vutswa khuli mundu yilukhanyinyanga vushindu.