MWILWATSI 2 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Nalola nu vulahi khuva nu vuyaanzi nu khwenya khumanya makhuva khu vuyaanzi. Navutswa nanyola ndi khali kenako ni shikhaya vutswa.

² Nanyola ndi khusekha khuli vutswa khuli vuyiingwa; khandi khwiyaanzitsa nu khwi shikhaya vutswa.

³ Nachelitsa khwiyaanzitsa mwene lwa nang'wetsanga idivai, nu khwenya khumanya shivune shichilanga vandu nivava vayiingwa, inzi mwene nishitsililila khuva nu vusitsa. Nenyanga manye ni shindu shina shilahi shia vandu vanyala khukhola mu shivala shinu khumatukhu mati ka vashili mwoyo.

⁴ Narweshitsa mihinzilu mikali yichi: Inzi mwene numbakha tsinzu khandi nindaka misala chi misabibu.

⁵ Nalomba, nindaka misala na mawua mu milimi, khandi nindakamu matunda kandi lukanu na lukanu.

⁶ Nayeeva mativwi ka matsi ka vanyala khutehamu matsi ku khusama misala chimeelanga.

⁷ Nakuula varukwa vasatsa nende vakhali; khandi nimba na varukwa vandi, vali nivivulwa mu inzu yanje. Nali khandi ni shiayo shikali shi miruku nende makondi manyishi khuvira mundu wundi wosi wamenyanga mu Yerusalemu, inzi nishili khumenyamu.

⁸ Ninyolela mwene ifetsa nende itsahabu inyishi, khandi livishilu lia vami vi shivala nende tsisomo tsia namihanga. Nanyola vandu vu khwimba tsinyimbo, nende vakhali vanyishi vamenyinywa, vu khuyaanzitsa vutswa mundu musatsa.

⁹ Ni kilikali, nali ni tsingulu tsinyishi khuvira vandu vandi voosi vamenyanga mu Yerusalemu, nishili khumenyamu. Vusitsa vwanje vwatsililila khuva mwinzi.

¹⁰ Navukula shia shindu shiosi, shia nali ninzikombi. Nayaanzitswa na shia shindu shiosi, shichila nali nu vuyaanzi mu muhinzilu kwanje kwa nakholanga kwosi; khandi nakwo kwali khuli murungu kwekwe.

¹¹ Lwa nakanakana makhuva khulondokhana khu shia shindu shiosi, shia nali nikholi khandi khuli nakhola ni tsingulu ninjemulila, nalwo lwa nalola ndi shia shindu shiosi ni shikhaya; shili vutswa khuli mundu yilukhanyinyanga vushindu; khandi vukhala vuvulakhuho vwa khunyala khunyola mu shivala shinu.

¹² Nalwo lwa navukula vwiyangu vwanje khwenya khumanya makhuva khu vusitsa, vulalu nende vuyiingwa; nireeva ndi, ni shina shiu Mwami wundi muyia anyala khukhola shiu wundi yavula khukhola?

¹³ Nalwo lwa niitsa khumanya ndi nu vulahi khuva nu vusitsa khuvira khuva muyiingwa, khuli vulavu vuli vulahi khuvira shisuundi.

¹⁴ Mundu uli nu vusitsa alolanga imbeli wa atsitsanga, navutswa mundu muyiingwa achendanga mu shisuundi. Navutswa namanyishitsa ndi makhuva malala mele kakwilanga vandu venavo voosi.

¹⁵ Nakanakana, nimbola, “Makhuva kakwilanga mundu muyiingwa kaliitsa khungwila khandi. Nu vukhala shina vwa nanyola lwa ndi nu vusitsa vunyishi?” Nanyola lichipu ndi khali kenako koosi ni shikhaya vutswa.

¹⁶ Khali mundu uli nu vusitsa nende mundu muyiingwa voosi vakhutsanga. Mundu avulakhuho uliitsa khuvitsushitsa mumatukhu kaliitsa khuvaho!

¹⁷ Khulwa yako, navukula vulamu vwanje khuli ni shindu vutswa; shichila muhinzilu kwa nakholanga mu shivala kwanderelanga vutiinyu. Shia shindu shiosi shia nakholanga shiali shikhaya vutswa, khandi nali khuli mundu yilukhanyinyanga vushindu.

¹⁸ Navukula muhinzilu kwosi, kwa nali nikholi mu shivala shinu khuli ni shindu vutswa; shichila nali namanya ndi nimali khukhutsa wundi aliitsa khuvukula.

¹⁹ Ni viina unyala khumanya, niiva mundu mwenoyo aliitsa khuva nu vusitsa inoho khuva muyiingwa? Khali ndio, neye uliitsa khuva muruchi wa shia shindu shiosi shia narweshitsa khurulana khu muhinzilu kwosi kwa nakhola, nindumishila vusitsa vwanje mu shivala shinu. Khali kenako ni shikhaya vutswa.

²⁰ Nalwo lwa nishevukha iyi neyo, nindanga khuheenda mwoyo khu mihinzilu chianje chiosi, chia nakholanga ninjemulila mu shivala shinu;

²¹ shichila tsisaa tsindala, mundu wanyakhana nakhola muhinzilu kwekwe khuvirila khu vusitsa vwevwe, vucheli vwevwe nende limanya, shiali ye uliitsanga lucheeli lwelwe tawe; navutswa wundi mundu, vuchila khucheemulilakhu neye uliitsanga lucheeli lwenolo. Khali kenako ni ki shikhaya vutswa, khandi nu vutamanu muno.

²² Mundu aliitsa khunyola vukhala shina khurulana khu muhinzilu kwosi kwa akholanga nacheemulila mu shivala shinu?

²³ Aliitsa khutsililila khunyakhana muno khumatukhu koosi ka aliitsa khuva nashili mwoyo. Muhinzilu kwekwe ni kwi shikhaya vutswa. Khali wamenya naheendanga mwoyo mu vutukhu vwosi, vuchila khukonakhu tsindolo tsiosi. Khali kenako ni ki shikhaya vutswa.

²⁴ Shindu shivulakhuho shilahi shiu mundu anyala khukhola, khuvira khulia nu khung'wa; khandi khumenya limenya lilahi khurulana khu muhinzilu kwekwe kwa akholanga. Khali ndio, nalola ndi koosi karulanga khu Nyasaye;

²⁵ shichila nikakhavele kario, ni viina unyala khulia inoho khumenya limenya lilahi?

²⁶ Nyasaye aheetsanga mundu umuyaanzitsanga vusitsa, vucheli nende vuyaanzi; navutswa achilanga mundu mwoni akhola muhinzilu ku khuvunjitsa nu khuvikha haluveka, khu alihaana khu mundu umuyaanzitsanga. Khali kenako ni shikhaya vutswa; kali vutswa khuli mundu yilukhanyinyanga vushindu.