MWILWATSI 12 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Witsushitse Muloonji wowo mumatukhu ka ushili muvukha, matukhu ka uvula tsingulu nikashili khutukha, mihika nichishili khutukha, lwa nuvoole, “Mbulakhu shia nyanzililanga mu kenako.”

² Mumatukhu ku vulavu vwi liuva, mweli, nende tsinyining'ini viliitsa khukwa shisuundi; malesi ki imbula khukhuva khuvula khuvira.

³ Nalwo lwa mikhono chiochio, nichili yechio chikhulindanga chiliitsa khutechela khandi vilenje viovio vilolekhanga, khuli vili ni tsingulu viliitsa khuvwa tsingulu. Shiuliitsa khuva na miino manyishi kanyala khuluma shiukhulia shienyu tawe; khandi yavo vaheenzelanga mu matirisha khumwama tsimoni,

⁴ nu khuvula khuhulilakhu liyooko liosi lilaanjilitswangwa mu litaala likali. Shiuliitsa khuhulilakhu khali hati hene luchina nulusietsanga inoho lwimbo nu lwimbwangwa tawe; navutswa khutsiula khwa manyonyi khuliitsa khuchila mwavukha numukonanga.

⁵ Muliitsa khuria shia havundu hosi ha vakholelanga misango, khali kaloleshe ndi khuchenda khuchilanga maraava nikavula khuvaho. Liswi lienyu liliitsa khukalukhana khukwa lilavu, khali shiuliitsa khwinyalitsa khwisuundakhu khali hatititi hene tawe; khandi likomba lienyu liosi livuli khuvaho. Mundu atsitsanga havundu hehe wu khumalilikha ma vandu valilila nu khwikhula mu tsinjila tsi litaala likali.

⁶ Mumatukhu kenako, luvusi lwi ifetsa luliitsa khukutuukha khandi ibakuli yalombwa khu itsahabu iliitsa khwatikha; Inyungu ya matsi iliitsa khwatishila mu shisima, khandi likulutumu liu khukhwesa matsi liliitsa khutong'okhamu,

⁷ ma lukuushi lulikalukha hasi halwarula, khandi miuya chihaananga vulamu khukalukha khu Nyasaye , wachila vulamu nu vuvaho.

⁸ Mwilwatsi avoolanga, “Ni shikhaya vutswa! Ni shikhaya vutswa!” Shia shindu shiosi ni shikhaya vutswa.

⁹ Khali nikava mwilwatsi yali mundu uli nu vusitsa, yechitsa vandu khuva nu vucheli; yechela makhuva khu tsinganu, manarunishitsa shia tsivoolanga.

¹⁰ Mwilwatsi yachelitsa khukhava makhuva kukhuleminya vandu mwoyo, nahandika munjila yu vulunji vindu viatoto.

¹¹ Livoola liu mundu uli nu vusitsa, lili khuli visala viuchi via mwayi arumishilanga khwaya makondi. Liaheelwa na Nyasaye uli khuli mwami mulala.

¹² Yivi mwana wanje, uve numanyi ndi shindu shiliho shikali khuvira yaka; khuhandika vitabu shiukhuli nakhwo likhola liu khumalilikha tawe. Khusoma vitabu vinyishi khuliitsa khukhumala tsingulu.

¹³ Yaka koosi nikakhavwa, ndi ni shindu shilala shia nyenyanga khulomoloma khulondokhanakhu: Uhe Nyasaye luyali; ulonde malako keke, shichila nakwo muhinzilu kwa mundu yenyekhanga ave nakholanga.

¹⁴ Nyasaye aliitsa khukhalachila shia shindu shiosi shia khukholanga, kave ni vindu vilahi inoho vitamanu, shia shindu shiosi shikholwangwa muvwivisi.