MWILWATSI 10 - IBIBILIA INDAKATIFU MU LUTIRICHI LWITAKHO NENDE LWISUKHA

¹ Tsinji tsiakhutsa tsichilanga makura katuumukha likuundu; khali vuyiingwa vuli ni tsingulu khuvira vusitsa nende luyali.

² Mundu uli nu vusitsa yimililwangwa ni likhola liu vulunji; navutswa mundu muyiingwa akholanga vindu vitamanu.

³ Khali lwa mundu muyiingwa achendanga khu muhaanda, avula vucheli; khandi avoolelanga shia mundu wosi ndi mwene neye muyiingwa.

⁴ Niiva mwamihi wowo anyala khukhuvukulila vurima, vwichehitsi vurulitsaho vutamanu vunyishi.

⁵ Shindu shiliho shitamanu shia nalola ni shikholekhanga mu shivala shinu; vindu vitamanu viu mwamihi akholanga.

⁶ Vandu vayiingwa navo vaheelwangwa visoko viu vunyali, vahinda vaheelwa visoko vivula luyali.

⁷ Mali khulola varukwa nivanini khu tsifarasi, navutswa vimilili nivachendanga khu vilenje khuli ni varukwa.

⁸ Mundu uyeevanga vwina neye mwene ukwitsanga muvwo; khandi inzukha ilumanga mundu uyeevululanga mu lisisi.

⁹ Mundu ulimanga machina mu mayeevo asalilitswangwa na machina kenako; khandi woyo wisiakanga tsikhuyi akwitsanga mu maraava shichila tsikhuyi tsienetso.

¹⁰ Niiva ihaywa iliitsa khuva yatuuha, ma mundu avuli khuvaho unyala khuchiyiakala; kenyekhanga mundu wisiakanga arumishile tsingulu tsinyishi; navutswa vusitsa navwo vuchilanga mundu akuura.

¹¹ Niiva inzukha ilaluma mundu nishili khurindilwa, mundu uchirindilanga avula vukhonyi vwosi.

¹² Lilomoloma liu mundu uli nu vusitsa lichilanga aheelwa luyali; navutswa makhuva ku mundu muyiingwa avoolanga mwene kamutivitsanga.

¹³ Mundu muyiingwa aranganga khuvoola vuyiingwa; mamalila lilomoloma lielie khuli mulalu mutamanu.

¹⁴ Mundu muyiingwa yilomolominyanga khuvira shichelo; khali niiva mundu avulakhuho umanyi katsitsanga khwikholekha, ni viina unyala khumanya kaliitsa khwikholekha namali khulomoloma khuye namali khukhutsa?

¹⁵ Muhinzilu ku mundu muyiingwa kumumalanga tsingulu; khuvula khumanya khuli anyala khutukha mu litaala likali.

¹⁶ Wooyi! Muli khu vutiinyu munyi shivala shiu mwami ushili mwana yamihanga; khali vimilili venyu khwikhoyela mu milukha chi lilia mu mavwevwe.

¹⁷ Muli ni ikhaavi, munyi shivala shiu mwami wenyu yaheelwa luyali! Khandi vimilili venyu vikhoyelanga mu milukha chi lilia mumatukhu kaviritswa, nivakholanga muhinzilu ku khuvumbakha, navutswa khutanda tawe.

¹⁸ Vukaara vuchilanga shisechese shiyoongovela mukari mwi inzu; khwikhala vuchila muhinzilu kwosi khuchilanga imbula iroonya mu inzu.

¹⁹ Lilia lichilanga mundu ava nu vuyaanzi, khali idivai isangalitsanga mundu mu limenya lielie; khandi tsisenti tsiliitsa khuva khuli lichipu khu shia shindu shiosi.

²⁰ Uvuli khulaamakhu mwami, khali mu tsinganakani tsiotsio, inoho khali nukoni khu shitali shioshio ulaame mundu muhinda; shichila linyonyi linyala khuhulila mwoyo kwokwo inoho shilombe shindi shili ni tsimbaha shivoole likhuva lienelo.