MATAYO 7 - IBIBILIA INDAKATIFU MU LUTIRICHI LWITAKHO NENDE LWISUKHA

Muvuli Khukhalachila Vandi

¹ “Muvuli khukhalachila vandi, khu Nyasaye alivula khumukhalachila munyi khandi.

² Khuli lwa mukhalachilanga vandi, nindio khandi munyi muliitsa khukhalachilwa. Shipimu shia mupimilamu vandi, nashio shia Nyasaye aliitsa khurumishila khupima munyi.

³ Shichila shina ulolanga shisala shili mumoni mwa amwavo wowo, navutswa yivi mwene shiunyala khulola kusala kuli mumoni mwomwo tawe?

⁴ Inoho unyala khuvoolela ndi amwavo wowo, ‘Lekha khurulitsi shisala shili mumoni mwomwo, nivi mwene nuli nu kusala mumoni mwomwo?’

⁵ Yivi wikhola kholanga khuva wi likhola liu vulunji! Raanga urulitsi shisala shili mumoni mwomwo, ulole vulahi vwene khuli unyala khurulitsa kusala kuli mumoni mwa amwavo wowo.

⁶ “Muvuli khuha tsingulume vindu vienyu viu vukuuli; shichila tsilatuvachila hasi; inoho khusiuvila tsisiimbwa shindu shili shitakatifu, shichila tsilakhuluma.

Savi, Khavi, Ikulitsi

⁷ “Savi, muliitsa khuheelwa; khavi, muliitsa khunyola; mwikulitsi, muliitsa khwikulilwa;

⁸ shichila mundu usavanga aheelwangwa; khandi mundu wukhavanga anyolanga, khandi mundu wikulitsanga, yikulilwangwa.

⁹ Inoho ni tata shina khu munyi wa mwana wewe amusava mukati, naye amuhe lichina?

¹⁰ Inoho namusava isutsi, naye amuhe inzukha?

¹¹ Niiva munyi vamuli vatamanu, mwamanya khuha vaana venyu vindu vilahi, ni vindu vianga vilahi mu vunyishi, via Tata wenyu uli mwikulu aheetsanga vandu vamusavanga!

¹² “Ka mwenyanga vandi vamukholele munyi, khali munyi muvakholele malala mele. Yaka nako ka Malako ka Musa kavoolanga, khandi nako kanyolekhanga mu mechitso ka vaprofeti.

Shilivwa Shinyelele

¹³ “Mwinjilili mu shilivwa shinyelele, shichila injila ikhuhilanga mulitivitswa ni injila imbambalalu, khandi shilivwa shiu khwinjililamu ni shivambalalu. Vandu vanyishi vachendelanga khu injila yeneyo.

¹⁴ Navutswa shilivwa shinjilanga mu vulamu ni shinyelele, khandi injila ikhuhilanga muvwo nindinyu; khandi ni vandu vatititi vonyene vachinyolanga.

Musala nende Matunda Kakwo

¹⁵ “Muve vacheli khu vaprofeti vu vuvehi vitsanga khu munyi nivalolekha khuli makondi, navutswa mukari mwavo ni vihulukhu vinyala khumumala.

¹⁶ Muliitsa khuvamanya khulondokhana khu vikholwa viavo. Toto, matunda ki misabibu kanyala khwatuulwa khu misala chia mavwa inoho mikhuyu khu marakalu?

¹⁷ Khulwa yako, shia musala mulahi kwamanga matunda malahi, navutswa musala mutamanu kwamanga matunda matamanu.

¹⁸ Musala mulahi shiukunyala khwama matunda matamanu, inoho musala mutamanu khwama matunda malahi tawe.

¹⁹ Shia musala kukhamanga matunda malahi kureemwangwa khandi kusiuvwa mu mulilu.

²⁰ Khulwa yako, muliitsa khuvamanya khulondokhana khu vikholwa viavo.

Litukhu liu Khukhalachilwa

²¹ “Shikali mundu unanganga ‘Mwami, Mwami’ aliitsa khwinjila mu Vwami vu mwikulu tawe; navutswa woyo wonyene wu kholanga ka Tata wanje uli mwikulu yenyanga neye uliitsa khwinjilamu.

²² Khulitukhu lienelo, vandu vanyishi valiitsa khumbolela, ‘Mwami, Mwami, khwaprofeta khuvirila mu lira liolio, khandi nukhukhunga matimoni khuvirila mu lira liolio. Khwakhola khandi viloleshitsu vinyishi khuvirila mu lira liolio.’

²³ Nalwo lwa niitsa khuvavoolela havulavu, ‘Munyi vandu vatamanu, shinyala khuva namumanya munyi tawe; ruli imbeli wanje.’

Vumbashi Vavili vi Inzu

²⁴ “Khulwa yako, mundu uhulilanga makhuva kaanje, khandi akalonda ali khuli mundu wali nu vusitsa yumbakha inzu yeye khu lwanda.

²⁵ Lwa imbula yakhuva, michelelo chia matsi chiakholomokha, ma imbuutsa ninuyanyinya inzu yeneyo; navutswa shiyakwa hasi tawe, shichila yali yayumbakhwa khu lwanda.

²⁶ “Mundu uhulilanga makhuva kaanje, nu khwambakhana khukalonda, ali khuli mundu muyiingwa yumbakha inzu yeye khu muyeeshe.

²⁷ Lwa imbula yakhuva, michelelo chia matsi chiakholomokha, ma imbuutsa nihuutsa inzu yeneyo, nikwa hasi yosi.”

Vunyali vwa Yesu

²⁸ Lwa Yesu yali namali khuvoola vindu vienevo, shituma shia vandu vali nilichenya khulondokhana khuli yechitsanga;

²⁹ shichila yaveechitsa khuli mundu uli nu vunyali, khuvira veechitsi vavo va Malako.